މިސްޓަ ބީސްޓް 1،000 މީހެއްގެ ލޮލުގެ ސާޖަރީއަށް އެހީވަނީ

މަޝްހޫރު ޔޫޓިއުބް ތަރި މިސްޓަ ބީސްޓުގެ އެންމެ ފަހުގެ ސްޓަންޓަކީ "ކެޓަރެކްޓް ރިމޫވަލް" ސާޖަރީ ހެދުމުގެ މާލީ ގާބިލްކަން ނެތް 1،000 މީހަކަށް ސާޖަރީތައް ސްޕޮންސާކޮށްދީ، އެ މީހުންގެ ފެނުން އަލުން ހޯދައިދިނުމެވެ.

މިސްޓަ ބީސްޓް ނުވަތަ އަސްލު ނަމުން ނަމަ ޖިމީ ޑޮނަލްޑްސަނަކީ، އޭނާގެ ޔޫޓިއުބް ވީޑިއޯތަކުގައި ގިނަ އަދަދަކަށް ފައިސާ އާއި ހަދިޔާ ބަހާ މީހެކެވެ.

މިދިޔަ ހޮނިހިރު ދުވަހު އަޕްލޯޑުކުރި، "“އަހަރެމެން މި ފަރުވާ ހޯދަނީ 1،000 މީހުންގެ ފެނުން ހޯދަދޭން" ނަން ދީފައިވާ ޔޫޓިއުބް ވީޑިއޯ މިހާތަނަށް 40 މިލިއަނަށް ވުރެ ގިނަ މީހުން ވަނީ ބަލައިފަ އެވެ. މި ވީޑިއޯއަށް ގިނަ ބަޔަކު އަންނަނީ ތައުރީފް ކުރަމުންނެވެ.

އެ ވީޑިއޯގައި ސާޖަރީގެ ކުރިންނާއި، ފަހުން ބަލި މީހުންނަށް ސާފުކޮށް ފެންނަ މަންޒަރު ފެންނަ ފުޓޭޖުތައް ހިމެނެ އެވެ. އަދި ޖިމީ ވަނީ ބައެއް ބައިވެރިންނަށް ފައިސާގެ ހަދިޔާތައް ދީފަ އެވެ.

ތިން ހަފްތާއެއްގެ މަތިން، ޖުމްލަ ނުވަ ގައުމަކުން ހޯދި ލޯފަން 1،000 މީހުންގެ ތެރެއިން އެމެރިކާގެ ފްލޮރިޑާގެ 40 މީހުން، އަދި ފުރަތަމަ ރައުންޑުގެ ސާޖަރީ ކޮށްދީފައި ވަނީ 20 އަހަރު ދުވަހު ހިލޭ ކެޓަރެކްޓް ސާޖަރީ ކޮށްދިނުމުގައި އުޅުނު ލޮލުގެ ޑޮކްޓަރު އަދި ސާޖަން، ޖެފް ލެވެންސަނެވެ.

ލެވެންސަނާ ހަވާލާދީ ސީއެންއެން އިން ބުނީ ފުރަތަމަ 40 މީހުންގެ ސާޖަރީ ކުރީ އެއް ދުވަސްތެރޭގައި ކަމަށެވެ.

"ލޮލަށް ނުފެންނަ މީހުންގެ ދެބައިކުޅަ އެއްބައި މީހުންނަކީ 10 މިނެޓްގެ އޮޕަރޭޝަނެއް ކޮށްލަން ޖެހޭ މީހުން،" ކެޓަރަކްޓް ސާޖަރީ އަށް ހަރަދުކުރުމުގެ ގާބިލުކަން އެތައް މިލިއަން މީހުންގެ ނެތްކަން ފާހަގަކޮށް އޭނާ ކިޔައިދިނެވެ.