ސްޓޫޑަންޓް ލޯނުގެ ތަކުލީފު ކުޑަކޮށްދެއްވާނެ ކަމުގެ އިޝާރާތެއް

މަތީ ތައުލީމަށް އިންޓްރެސްޓް ބޮޑުކޮށް ލޯނު ނަގައިގެން ކިޔެވި ދަރިވަރުންނަށް އެ ލޯނު ނުދެއްކި ބޮޑު ތަކުލީފެއް އުފުލަން ޖެހިފައިވާ މައްސަލައަށް ހައްލެއް ހޯއްދަވައި ދެއްވަން މަސައްކަތް ކުރައްވާނެ ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.

މި އަހަރުގެ ރިޔާސީ ބަޔާނުގައި ރައީސް ވިދާޅުވީ މި ވެރިކަމުގައި ހިލޭ ޑިގްރީގެ ފަހި ފުރުސަތު އޮތަސް މީގެ ކުރިން ލޯނު ނަގައިގެން ކިޔެވި ދަރިވަރުންގެ ކަންބޮޑުވުންތަކެއް އެބަހުރި ކަމަށެވެ. ތައުލީމީ ދާއިރާއަށް ގެންނަވާ ބަދަލުތަކުގެ ތެރޭގައި އެއީ ހައްލު ހޯއްދަވައި ދެއްވާނެ ކަމެއްގެ ގޮތުގައި ބަޔާނުގައި ފާހަގަކުރެއްވި އެވެ.

"މީގެކުރިން ސްޓޫޑަންޓް ލޯނު ނަގައިގެން ކިޔެވި ކުދިންގެ ކަންބޮޑުވުންތަކެއް އަދިވެސް އެބަހުރި. ކުރިއަށް އޮތްތަނުގާ އަޅުގަނޑު މަސައްކަތްކުރާނީ އުފެއްދުންތެރި ހަރުދަނާ ޒިންމާދާރު ދިވެހި ޒުވާނުންގެ ހުރި މިފަދަ ހުރިހާ ބުރައެއް ލުއިކޮށްދިނުމަށް،" ރައީސް ވިދާޅުވި އެވެ.

އެ ދަރިވަރުންގެ ޝަކުވާއަކަށް ވެފައި އޮންނަނީ ކިޔަވައި ނިންމާފައި، ލިބޭ މުސާރައިން ސްޓޫޑަންޓް ލޯނު ދެއްކުމުގެ ބުރައާ އެކު އެހެން ހަރަދުތައް ދެކޮޅު ނުޖެއްސޭ ކަމެވެ. ކިޔަވާ ނިންމައި ދިރިއުޅުން ފެށި ވަރަށް ގިނަ މީހުންނަށް ލޯނު އަނބުރާ ދެއްކޭނެ ގޮތެއް ނެތުމަކީ ބޮޑު ހާސްކަމެކެވެ.

ރައީސް ވިދާޅުވި ގޮތުގައި ޒުވާނުންނަށް ބޭނުންވާ ތައުލީމާއި ތަރުބިއްޔަތު ދިނުމަށްވުރެ ބޮޑު އިންވެސްޓްމެންޓެއް ގައުމަކުން ނުކުރާނެ އެވެ. ބިނާކުރަނިވި އާ ޖީލެއް އުފެއްދުމަށްޓަކައި އެޅުނު އެންމެ މުހިންމު ބިންގަލަކީ ހިލޭ ޑިގްރީ ޕްރޮގްރާމް ކަމަށާއި މި ޕްރޮގްރާމަކީ ކޮންމެ މަޔަކާ ބަފައެއްގެ އަދި ބެލެނިވެރިއަކަށް މިސަރުކާރުން ދިން ތަސައްލީއެއް ކަމަށް ވިދާޅުވި އެވެ.

"އެ ކަންބޮޑުވުން މުޅި ރާއްޖެއިން ނައްތާލެވިއްޖެ. ފުރަތަމަ ޑިގްރީއާ ހަމައަށް ހިލޭ ކިޔެވުމުގެ ފުރުސަތު ހަމަ ކޮންމެ ދިވެހި ޒުވާނަކަށް މިއަދު އެބަ އޮތް. މިއަދާ ހަމައަށް 16315 ދަރިވަރުން ސަރުކާރުގެ ހިލޭ ޑިގްރީ ޕްރޮގްރާމްގައި ބައިވެރި ވެއްޖެ. 6500 އަށްވުރެ ގިނަ ދަރިވަރުން ދަސްވެނިވެއްޖެ،" ރައީސް ވިދާޅުވި އެވެ.

އެމަނިކުފާނު ވިދާޅުވީ މިހާތަނަށް 1،986 ދަރިވަރަކަށް ސްޓޫޑަންޓް ލޯނުގެ ފުރުސަތު މި ސަރުކާރުން ދީފައިވާ ކަމަށެވެ. މި ލޯނުތަކުގެ ތަކުލީފު ކުޑަކުރުމަށްޓަކާ ސްޓޫޑަންޓް ލޯނު ސަރުކާރުން ރީސްޓަރަކްޗަކޮށް ކުރިން 5 ޕަސެންޓުގައި ހުރި އިދާރީ ފީ އެއް ޕަސެންޓަށް ކުޑަކޮށްފައިވާ ކަމަށް ވިދާޅުވި އެވެ.

"ލޯނު އަނބުރާ ދެއްކުން 20 އަހަރަށް އިތުރުކޮށްފިން. މިގެނެވުނު ބަދަލާއެކު ކުރީގެ ބޮޑު ރޭޓްގާ ދެއްކި ފައިސާ ވާނީ ޖުމްލަ ލޯނު އަދަދުން އުނިކުރެވިފައި. އަދި ކޮންމެ މަހަކު ދަރިވަރުން އަނބުރާ ދައްކާ ފައިސާ މިހާރު ކުޑަވާނެ،" ރައީސް ވިދާޅުވި އެވެ.