މަޖިލީހުގެ އިދާރާގައި ޖިމެއް ހުޅުވައިފި

ރައްޔިތުން މަޖިލިހުގެ އިދާރާގައި މިއަދު ޖިމެއް ހުޅުވައިފި އެވެ.

އެ ޖިމް ރަސްމީކޮށް ހުޅުއްވައި ދެއްވީ މަޖިލިހުގެ ރައީސް މުހައްމަދު ނަޝީދެވެ. ޖިމް ހުޅުއްވައި ދެއްވުމަށް ފަހު، އެ މަނިކުފާނު ބައެއް މެމްބަރުންނާއެކު އެ ތަން ބައްލަވައިލެއްވި އެވެ.

މަޖިލިހުގެ އިދާރާގެ އާ އިމާރާތުގެ 12 ވަނަ ފްލޯގައި ޖިމް ހެދީ ޕާކިސްތާނުގެ ސަރުކާރުން މަޖިލިހުގެ އިދާރާ އަށް ދީފައިވާ ހިލޭ އެހީގެ ދަށުން ކަމަށް އެ ތަނުން ބުންޏެވެ.

މަޖިލިހުގެ އިދާރާގެ ޖިމަށް މި ވަގުތަށް ވަދެވޭނީ މަޖިލިހުގެ މެމްބަރުންނާއި އެ އިދާރާގެ މުވައްޒަފުންނަށް އެކަންޏެވެ.

މަޖިލީހުގެ އިދާރާގައި ޖިމެއް ހެދުމަށް ހުޅުވާލާފައި ވަނީ 2020 ވަނަ އަހަރު އެވެ. އެ ތަނުގައި ރެސްޓޯރެންޓަކާއި ފިހާރައެއް ވެސް ހުުވުމަށް އޭރު ނިންމައި އެ ކަން އިއުލާންކުރި އެވެ. އެ ކަމަކު ފިހާރަ އާއި ރެސްޓޯރަންޓް އަދި ނުހަދަ އެވެ.