އަފްޣާނިސްތާނުން މެލޭޝިއާ ވެސް ބަލިކޮށްފި

ރާއްޖޭގައި މިހާރު ކުރިއަށްދާ ފޯ ނޭޝަން އިންޓަނޭޝަނަލް ވޮލީބޯޅަ މުބާރާތުގެ ފިރިހެން ޑިވިޝަނުގައި މިއަދު މެލޭޝިއާގެ މައްޗަށް ވެސް އަފްޣާނިސްތާނުން ކުރި ހޯދައިފި އެވެ.

ސޯޝަލް ސެންޓަރުގެ އިންޑޯ ހޯލްގައި މިއަދު މެންދުރު ފަހު ކުޅުނު މެޗު އަފްޣާނިސްތާނުން ކާމިޔާބު ކުރީ 3-1 ސެޓުންނެވެ. މުބާރާތުގެ ފުރަތަމަ މެޗުގައި އިއްޔެ އަފްޣާންގެ ޓީމުން ވަނީ ސިންގަޕޫރު ވެސް ބަލިކޮށްފަ އެވެ.

ރާއްޖެއާ ދެކޮޅަށް ރޭ ކުޅުނު މެޗުގައި ތަފާތު ދެއްކި މެލޭޝިއާގެ ޓީމަށް، މިއަދުގެ އަފްޣާނިސްތާނާ ދެކޮޅަށް އެކަމެއް ނުދެއްކުނެވެ. ފުރަތަމަ ސެޓް އަފްޣާނިސްތާނުން ކާމިޔާބު ކުރީ 25-22 ންނެވެ. ދެވަނަ ސެޓް ކާމިޔާބު ކުރީ 25-21 ންނެވެ.

މެލޭޝިއާއިން ކުރި ހޯދީ ތިންވަނަ ސެޓްގަ އެވެ. އެ ޓީމުން ރަނގަޅު ކުޅުމެއް ދެއްކި އެވެ. އެ ޓީމުން ސެޓް ކާމިޔާބު ކުރީ 25-19 އިންނެވެ. ތިންވަނަ ސެޓްގައި އަފްގާނިސްތާން ފެނުނީ ކޮމްބިނޭޝަން ގެއްލިފައި އޮތް ތަނަވެ. އެ ޓީމުން ބްލޮކް ކުރަން މަސައްކަތް ކުރި ގިނަ ބޯޅަތަކުގައި ވެސް ދޫވެގެން ވެއްޓުނީ އަމިއްލަ ކޯޓްގެ ތެރެއަށެވެ.

އަފްޣާނިސްތާނުން ހަތަރުވަނަ ސެޓްގައި ކަންކަން ރަނގަޅު ކުރި އެވެ. މެޗުގެ ތެރެއަށް އަނބުރާ އާދެވުނު ނަމަވެސް ދެން ޖެހިގެން އައި ސެޓްގައި މެލޭޝިއާގެ ކުޅުން ފަނޑުވި އެވެ. އަފްޣާނިސްތާނުން އެ ސެޓް 25-19 މޮޅުވެ މެޗު ވެސް ކާމިޔާބު ކުރި އެވެ.

މުބާރާތުގެ ސެމީ ފައިނަލުގައި އެއްވަނަ ހޯދާ ޓީމުން ވާދަ ކުރަން ޖެހޭނީ ހަތަރުވަނަ ޓީމާ ދެކޮޅަށެވެ. އަފްޣާނިސްތާނުން މިހާރު ވަނީ އެއްވަނަ މަގާމު ކަށަވަރު ކުރުމާ ގާތަށް ޖެހިލާފަ އެވެ. ފިރިހެން ޑިވިޝަނުގައި މިރޭ ރާއްޖެއިން ނުކުންނާނީ ސިންގަޕޫރާ ދެކޮޅަށެވެ.