ޔާމީންގެ ޖަލު ހުކުމުގެ އިސްތިއުނާފް އިސްލާހުކުރުމަށް ފަހު އަލުން ހުށަހަޅައިފި

ކުރީގެ ރައީސް އަބްދުﷲ ޔާމީންގެ ޖަލު ހުކުމުގެ އިސްތިއުނާފް އިސްލާހު ކުރުމަށްފަހު ހައި ކޯޓަށް އަލުން ހުށަހަޅައިފި އެވެ.

ވ. އާރަށް ކުއްޔަށް ދިނުމުގެ މުއާމަލަތާ ގުޅިގެން ރިޝްވަތު ގަބޫލު ކުރުމާއި މަނީ ލޯންޑްރިންގެ ކުށް ސާބިތުވެ، ޔާމީން 11 އަހަރަށް ޖަލަށްލާން ކްރިމިނަލް ކޯޓުން ކުރި ހުކުމް އިސްތިއުނާފް ކުރަން އެމަނިކުފާނުގެ ފަރާތްޕުޅުން ހުށަހެޅި އިސްތިއުނާފް އިސްލާހުކުރަން ހައި ކޯޓުން ކުރިން އެންގި އެވެ.

އެ އެންގުމާ އެއްގޮތަށް، އިސްތިއުނާފް އިސްލާހު ކުރުމަށްފަހު ޔާމީންގެ ފަރާތްޕުޅުން އަލުން ހުށަހަޅާފައިވާކަން ހައި ކޯޓުން މިއަދު ކަށަވަރުކޮށްދިނެވެ. އެކަމަކު މައްސަލަ ބަލައިގަތުމާ މެދު އަދި އެ ކޯޓުން ވަކި ގޮތެއް ނުނިންމަ އެވެ.

ޔާމީންގެ ޖަލު ހުކުމުގެ އިތުރުން އެ މައްސަލާގައި ލޯންޑާކުރި 3.4 މިލިއަން ޑޮލަރު (52 މިލިއަން ރުފިޔާ) ދައުލަތަށް ދައްކަން ކްރިމިނަލް ކޯޓުން ޔާމީންގެ މައްޗަށް އަމުރެއް ނެރެފައިވާތީ އެ އަމުރު ވެސް އެމަނިކުފާނުގެ ފަރާތްޕުޅުން މިހާރު އޮތީ އިސްތިއުނާފަށް ހުށަހަޅައިފަ އެވެ.

ޔާމީންގެ ވަކީލުން ވިދާޅުވަމުން ގެންދަވަނީ މިމަސް ތެރޭގައި އެމަނިކުފާނު މިނިވަންވާނެ ކަމުގެ އުއްމީދު ބޮޑު ކަމަށެވެ. އަދި މައްސަލަ ނިމެންދެން އެމަނިކުފާނު ކަފާލާތުގެ ދަށުން ބަންދުން މިނިވަންކުރަން ހައި ކޯޓުގައި އެދޭނެ ކަމަށް ވެސް ވަކީލުން ބުނެފައިވެ އެވެ.