ހަތް މަސް ދުވަހަށް ފަހު އަންނަ މަހު ފުޓްބޯޅަ ސީޒަން ފަށަނީ

ރާއްޖޭގެ ފުޓްބޯޅަ ސީޒަން ހަތް މަސް ދުވަހަށް ފަހު، އަންނަ އޭޕްރިލް 3 ވަނަ ދުވަހުގެރޭ ޗެރިޓީ ޝީލްޑުން ފަށަން އެފްއޭއެމުން ނިންމައިފި އެވެ.

އެންމެ ފަހުން ފުރަތަމަ ޑިވިޝަނުގެ މެޗެއް ކުޅެފައިވަނީ މިދިޔަ އަހަރުގެ އޮގަސްޓް 21 ވަނަ ދުވަހުގެރޭ އެވެ.

ޗެރިޓީ ޝީލްޑް މެޗުގައި ބައްދަލުކުރާނީ މިދިޔަ ސީޒަނުގެ ދިވެހި ޕްރިމިއާ ލީގު ޗެމްޕިއަން މާޒިޔާ އާއި ރަނަރަޕް އީގަލްސް އެވެ. މި މެޗުން އީގަލްސް އަށް ފުރުސަތު ލިބުނީ، އެފްއޭ ކަޕުގެ ޗެމްޕިއަންކަން މާޒިޔާ ހޯދާފައިވާތީވެ އެވެ.

ރޯދަ މަަސް ކަމަށްވާތީ މި މެޗު ކުޅޭނީ އޭޕްރިލް 3 ވަނަ ދުވަހުގެރޭ 10 ޖަހާއިރު އެވެ.

މާޒިޔާ އާއި އީގަލްސް އަކީ އާ ސީޒަނަށް އެންމެ ބޮޑަށް ތައްޔާރުވެފައިވާ ދެ ޓީމެވެ. މި ދެ ޓީމުން ވެސް ވަނީ ކުޅުންތެރިންގެ ސޮއި ހޯދައި ޕްރެކްޓިސް ފަށައިފަ އެވެ. މާޒިޔާ އިން ކޯޗަކަށް ހަމަޖައްސާފައިވަނީ އިންޑޮނީޝިއާ ގައުމީ ޓީމުގެ ކުރީގެ ކޯޗު ބަލްގޭރިއާގެ އީވާން ކޮލޭފް އެވެ. އީގަލްސް އިން ޓީމަށް ގެނައީ ކުރީގެ ކޯޗު އިހުސާން އަބްދުލްގަނީ (ސާންތީ) އެވެ.

މި މެޗު އޮންނަ ދުވަސް އެފްއޭއެމުން ހާމަކުރި ނަމަވެސް، ލީގު ފަށާނެ ތާރީހެއް އިއުލާންނުކުރެ އެވެ. ބެލެވޭ ގޮތުގައި އޭޕްރިލް މަހު ލީގު ވެސް ފަށާނެ އެވެ.

ލޯކަލް ސީޒަން ނުފެށި ނަމަވެސް މިދިޔަ ޑިސެމްބަރު މަހާއި މި މަހު ގައުމީ ޓީމު ވަނީ އެކުވެރިކަމުގެ މެޗުތަކެއް ކުޅެފަ އެވެ. ގައުމީ ޓީމުން ތައްޔާރުވަނީ އަންނަ ޖޫން މަހު އިންޑިއާގެ ބެންގަލޫރުގައި ފަށާ ސާފް ޗެމްޕިއަންޝިޕަށެވެ.