ސަރުކާރުގެ ސިޔާސަތާ ދެކޮޅަށް މަސައްކަތް ނުކުރާހާ ހިނދަކު ސިޔާސީ މަގާމެއް އަތުނުލާނެ: ރައީސް އޮފީސް

މި ސަރުކާރުގެ ސިޔާސަތުތައް ތަންފީޒުކުރުމާ ދެކޮޅަށް މަސައްކަތް ނުކުރާހާ ހިނދަކު، ސިޔާސީ މަގާމަކުން އެއްވެސް ބޭފުޅަކު ވަކި ނުކުރާނެ ކަމަށް ރައީސް އޮފީހުން މިއަދު ބުނެފި އެވެ.

ރައީސް އޮފީހުގެ ތަރުޖަމާން މިއުވާން މުހައްމަދު އެހެން ވިދާޅުވީ، ރައީސް އޮފީހުން ބޭއްވި މީޑިއާ ބްރީފިންގައި، ޖުމްހޫރީ ޕާޓީން މި އަހަރުގެ ރިޔާސީ އިންތިހާބުގައި ވަކިން ވާދަކުރަން ނިންމާފައި ވާއިރު، އެ ޕާޓީގެ ސްލޮޓްތަކުގައި މި ސަރުކާރުގެ ސިޔާސީ މަގާމުތަކުގައި ތިއްބެވި ބޭފުޅުން ވަކިކުރުމާ ގުޅޭ ގޮތުން ނޫސްވެރިއަކު ސުވާލު ކުރުމުންނެވެ.

އެ ސުވާލުގެ ޖަވާބުގައި މިއުވާން ވިދާޅުވީ، މި ސަރުކާރުން އެއްވެސް ބަޔަކަށް ވަޒީފާގެ ބިރު ނުދައްކާ ކަމަށެވެ. އަދި ކުރީގެ ރައީސް އަބްދުﷲ ޔާމީންގެ ސަރުކާރުން އެގޮތަށް ކަންތައް ކޮށްފައި އޮތަސް، މި ސަރުކާރުން އެގޮތަށް އަމަލު ނުކުރާނެ ކަމުގެ ޔަގީންކަން ވެސް ދެއްވި އެވެ.

މިއުވާން ވިދާޅުވި ގޮތުގައި، ސިޔާސީ މަގާމުތަކަށް ބޭފުޅުން އައްޔަން ކުރައްވަނީ ގާނޫނުއަސާސީން ރައީސުލްޖުމްހޫރިއްޔާ އަށް ލިބިގެންވާ ބާރުގެ ދަށުންނެވެ. އެ މަގާމުތަކުގައި ތިއްބަވާ ބޭފުޅުން ކުރައްވަން ޖެހޭ މަސައްކަތަކީ ރައީސްގެ ސިޔާސަތު ތަންފީޒުކުރަމާއި ރައީސް ހަވާލު ކުރައްވާ މަސައްކަތްތައް ކުރެއްވުމެވެ.

ސިޔާސީ މަގާމުތަކަކީ ވަޒީފާގެ އެއްބަސްވުމެއް އެކުލަވާލެވިގެން، އިއުލާން ކޮށްގެން މީހުން ހަމަޖައްސައިފައި ތިބޭ މަގާމުތަކެއް ނޫން ކަމަށް ވެސް މިއުވާން ވިދާޅުވި އެވެ. އެހެންވެ، ރައީސަށް ލިބިވަޑައިގަންވާ ބާރުގެ ދަށުން، ހަވާލުކުރައްވާ މަސްއޫލިއްޔަތު އަދާކޮށް ނިމުމުން ނުވަތަ އަދާ ނުކުރާ ނަމަ، އެ މަގާމުތަކުން ވަކި ކުރެވޭނެ ކަމަށް އޭނާ ވިދާޅުވި އެވެ.

"މީގެ އަނެއް ކަމަކީ ހެނދުނު ނުކުމެ ސަރުކާރުގެ ސިޔާސަތު ތަންފީޒުކުރަން އުޅެފައި ރޭގަނޑު އެއް ފިކުރެއްގެ މީހުންނާއެކު ނުކުމެ، ހެނދުނު ތަންފީޒުކުރަން އެ އުޅުނު ސިޔާސަތު ގޯސްކޮށް ވާހަކަ ދައްކާ ކަމަށް ވަންޏާ އެއީ އެއްގޮތަށް ދަންނަވާ ނަމަ ސިޔާސީ ގޮތުން ލޯ ނުހުޅުވެނިއްޔޭ ނުވަތަ އެ މަގާމުގައި ބޭފުޅަކު ހުރުމުގެ ބޭނުން ކެނޑެނިއްޔޭ،" މިއުވާން ވިދާޅުވި އެވެ.

އޭނާ ވިދާޅުވި ގޮތުގައި، ސިޔާސީ މަގާމުތަކުން ބޭފުޅުން ވަކި ކުރިޔަސް، ސިވިލް ސާވިސްގެ އެއްވެސް މުވައްޒަފަކަށް ވަޒީފާގެ ބިރެއް ނެތެވެ. އަދި ސިޔާސީ މަގާމުތަކުގައި ތިއްބެވި ބޭފުޅުން ވެސް ރައީސްގެ ސިޔާސަތާ ދެކޮޅަށް މަސައްކަތް ނުކުރާހާ ހިނދަކު، މި ސަރުކާރުން ވެފައިވާ ކޯލިޝަންގެ އެއްބަސްވުމާ އެއްގޮތަށް މަސައްކަތް ކުރުމުގެ ފުރުސަތު ރައީސް އިބްރާހިމް މުހައްމަދު ސޯލިހު ދެއްވާނެ އެވެ.

އެސްޓީއޯގެ ކުރީގެ މެނޭޖިން ޑިރެކްޓަރު ހުސެއިން އަމްރު ވަޒީފާއިން ވަކިކުރުމުން މި ސަރުކާރުން މުވައްޒަފުންނަށް ވަޒީފާގެ ބިރު ދައްކަމުން ދާ ކަމަށް ބުނާ އަޑުތައް ވަނީ ގަދަވެފަ އެވެ. މި ސަރުކާރުގެ ކޯލިޝަންގައި ހިމެނޭ ބައެއް ޕާޓީތަކުން ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހުގެ ފަހަތަށް އަރަން ދެކޮޅު ހަދައިފައި ވާތީ އެ ޕާޓީތަކަށް ނިސްބަތްވާ މީހުން މަގާމުތަކުން ވަކިކުރަން ވެސް ސަރުކާރަށް ވާގިދޭ ބޭފުޅުން ގޮވާލާފައިވެ އެވެ.

ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ޖުމްހޫރީ ޕާޓީގެ ލީޑަރު ގާސިމް އިބްރާހިމް ވަކިން ވާދަކުރައްވަން ނިންމެވުމުން ސިޔާސީ މަސްރަހު ވަނީ ހޫނުވެފަ އެވެ. އެއީ މިހާރު ވެސް މި ސަރުކާރުގެ ކޯލިޝަންގައި ޖޭޕީ އޮވެމެ، އެ ޕާޓީން ވަކިން އިންތިހާބަށް ނުކުންނައިރު އެ ޕާޓީގެ ސްލޮޓްގައި ސަރުކާރުގައި ބައެއް ބޭފުޅުން ތިއްބަވާތީ އެވެ.