އާސެނަލްގެ އުންމީދުތައް ފަނޑުކޮށް ސިޓީން ކޮންޓްރޯލް ނަގައިފި

މެންޗެސްޓާ (އޭޕްރީލް 27) - އިނގިރޭސި ޕްރިމިއާ ލީގުގެ އެއް ވަނައިގައި އޮތް އާސެނަލް އަތުން 4-1 އިން މޮޅުވެ މެންޗެސްޓާ ސިޓީން ލީގުގެ އެއް ވަނައަށް އެރުމުގެ އަމިއްލަ ބާރު ހޯދައިފި އެވެ.

ސިޓީ އިން މެޗު ކާމިޔާބު ކުރިއަސް އަދި އެއް ވަނައިގައި އޮތީ އާސެނަލް އެވެ. އާސެނަލް އެ މަގާމުގައި އޮތީ 33 މެޗުން 75 ޕޮއިންޓް ހޯދައިގެންނެވެ. ސިޓީ ދެ ވަނައިގައި އޮތީ ދެ މެޗު މަދުން ކުޅެގެން 72 ޕޮއިންޓާ އެކު އެވެ. އާސެނަލް އާ މެޗުގެ ގޮތުން އެއްވަރުކޮށްގެން ސިޓީ އަށް މިވަނީ އެއް ވަނައިގައި ހަތަރު ޕޮއިންޓުގެ ލީޑެއް ހޯދުމުގެ ފުރުސަތު ފަހިވެފަ އެވެ.

މިއާ އެކު 2003/2004 ސީޒަންގައި މެޗަކުން ބަލިނުވެ ލީގު ކާމިޔާބުކުރި ފަހުން ފުރަތަމަ ފަހަރަށް ލީގު ހޯދަން މަސައްކަތް ކުރާ އާސެނަލްގެ އުންމީދުތައް މިވަނީ ފަނޑުވެފަ އެވެ.

އާސެނަލްގެ ކޯޗު މިކެލް އާޓެޓާ ބުނީ މިއީ ހަޖަމު ކުރަން އުނދަގޫ ބައްޔެއް ކަމަށާއި، ނަމަވެސް ކުރިއަށް ދާނީ ބާކީ މެޗުތަކުން މޮޅުވެގެން ލީގު ކާމިޔާބު ކުރެވޭނެ ކަމަށް އުއްމީދު ކޮށްގެން ކަމަށެވެ.

"އަހަރެންނަކަށް ނޭނގޭ ކޮބައިކަން [ލީގު ހޯދަން] ބޭނުންވާ ކަމަކީ. މިވަގުތު ޖެހޭނީ ކުޅުންތެރިންނަށް ހިތްވަރު ދޭން. މިއީ ހަޖަމު ކުރަން އުނދަގޫ ވަގުތުކޮޅެއް،" ގާޑިއޯލާގެ އެސިސްޓެންޓެއްގެ ގޮތުގައި 2016 އިން 2019 އަށް ސިޓީގައި މަސައްކަތް ކުރި އާޓެޓާ ބުންޏެވެ.

"އަހަރެމެން މި މެންޗެސްޓާ ސިޓީ ޓީމާ ވާދަ ކުރާކަމީ ވެސް ވަރަށް ހާއްސަ ކަމެއް. ބާކީ ފަސް މެޗު އޮތްއިރު ކޮންމެ ގޮތެއް ވެސް ވެދާނެ. ފާއިތުވި އަހަރުތަކުގައި ލީގުގައި ބައިވަރު ކަންކަން ހިނގާފާނެ ކަން އަހަރެން ދެކެފިން. އަހަރެމެން ގަބޫލު ކުރަން ޖެހޭ ބަލިވީ އާދައިގެ ޓީމެއް އަތުން ނޫން ކަމަށް."

ސިޓީގެ ދަނޑުގައި ކުޅުނު މެޗުގެ ފުރަތަމަ ހާފުގައި އެ ޓީމުން ވަނީ އާސެނަލް ކޮޅަށް ދެ ގޯލު ޖަހައިފަ އެވެ. ފުރަތަމަ ލަނޑު އާލިން ބްރައުޓް ހާލަންޑްގެ ޕާހެއް ހޯދައިގެން ކުރިއަށް އަރައި އޭރިއާ ބޭރުން ފޮނުވާލި ހަމަލާއަކުން ކާމިޔާބު ކުރީ ކެވިން ޑިބްރޭނާ އެވެ. އަދި ހާފް ނިމެނިކޮށް ޑިބްރޭނާ ނަގައިދިން ހުރަހެއް ބޮލުން ޖަހައި ދެ ވަނަ ގޯލު ޖަހައިދިނީ ޑިފެންޑަރު ޖޯން ސްޓޯންސް އެވެ. މި ހާފުގައި ހާލަންޑާއި ޑިބްރޭނާ އަށް ވަނީ ގޯލު ޖަހާނެ ގިނަ ފުރުސަތުތަކެއް ލިބި ނާކާމިޔާބު ވެފަ އެވެ.

ދެ ވަނަ ހާފުގެ ފުރަތަމަ ދިހަ މިނިޓު ތެރޭ ސިޓީ އިން ވަނީ އިތުރު ލަނޑެއް ޖަހައި އާސެނަލްގެ ކެތްތެރި ސަޕޯޓަރުން މާޔޫސް ކޮށްލައިފަ އެވެ. މި ލަނޑު ވެސް ޑި ބްރޭނާ އޭނާ ޖެހީ ހާލަންޑްގެ އެހީތެރިކަމާ އެކު އެވެ.

މެޗުގެ ފުރިހަމަ ވަގުތު ހަމަވާން ހަތަރު މިނިޓަށް ވެފައި ވަނިކޮށް ލިއަންޑްރޯ ޓްރޮސާޑް ހުރަސް ކޮށްލި ބޯޅައަކުން ޑިފެންޑަރު ރޮބް ހޯލްޑިން، އާސެނަލް އަށް ލަނޑެއް ޖަހައިދިން ނަމަވެސް، އިތުރު ވަގުތުގެ ތެރޭގައި ހާލަންޑް ވަނީ ފިލް ފޮޑެން ދިން ޕާހެއް ކޮންޓްރޯލް ކޮށްލާފައި ގޯލު ތެރެއަށް ފޮނުވާލައިގެން ސިޓީގެ ހަތަރު ވަނަ ގޯލު ޖަހައިފަ އެވެ.

މިއީ މި ސީޒަނުގައި ސިޓީއަށް ބަދަލުވި ހާލަންޑް އެޓީމަށް ކާމިޔާބު ކޮށްދިން 50 ވަނަ ގޯލެވެ. އޭނާ ވަނީ ސިޓީއަށް މިހާތަނަށް 44 މެޗު ކުޅެދީފަ އެވެ. ލީގުގެ ލަނޑު ލިސްޓުގެ އެއް ވަނައިގައި އޭނާ އޮތީ 30 މެޗުން 34 ގޯލު ޖަހައިގެންނެވެ.

މެޗަށް ފަހު ސިޓީގެ ކޯޗު ޕެޕް ގާޑިއޯލާ ބުނީ މިހާރު އަމިއްލަ ބާރު ލިބިފައި އޮއްވައި ކުރިއަށް އޮތް މެޗުތަކަށް ނުކުންނައިރު ފޯކަސް ގެއްލުވާލައިގެން ނުވާނެ ކަމަށެވެ.

"ކުޅުންތެރިންނަށް އެނގޭ އަދި ލީގު ލިބުނީ ނޫންކަން އެކަމަކު ކާމިޔާބާ ވަރަށް ގާތް ވެއްޖެކަން. އެހެންވެ މޮޅުވެގެން ރޭހުގައި ދެމިތިބުމަކީ މުހިއްމު ކަމެއް،" ގާޑިއޯލާ ބުންޏެވެ.

"ކުޅުމުގައި އެންމެ މުހިއްމު ކަމަކީ މޮޅުވުން ނޫން އިތުރު ގޮތަކަށް ވިސްނުން ނުގެންގުޅުން. ކޮންމެ މެޗެއް ވެސް ކުޅެނީ މޮޅުވާން ބޭނުން ވެގެން ކަން ކުޅުންތެރިން ދައްކައިދީފި."

ލީގުގައި ރޭ ކުޅުނު އިތުރު މެޗުތަކަށް ބަލައިލާއިރު ލިވަޕޫލުން ވަނީ ފަހަތުން އަރައި 2-1 އިން ވެސްޓް ހޭމް ޔުނައިޓެޑް ބަލިކޮށްފަ އެވެ. ވެސްޓް ހޭމްގެ ދަނޑުގައި ކުޅުނު މެޗުގެ 12 ވަނަ މިނިޓުގައި ލޫކަސް ޕަކޭޓާ އެޓީމަށް ލީޑު ނަގައިދީފައި ވަނިކޮށް ހަ މިނިޓު ފަހުން ލިވަޕޫލަށް އެއްވަރު ކޮށްދިނީ ކޯޑީ ގަކްޕޯ އެވެ. އަދި މޮޅުވި ގޯލު ފަހު ހާފުގައި މެޗުގެ 67 ވަނަ މިނިޓުގައި ޖަހައިދިނީ ޑިފެންޑަރު ޖޮއެލް މަޓިޕް އެވެ.

ހަމަ އެއާ އެކު ނޮޓިންހަމް ފޮރެސްޓުން ވަނީ ލީގުގެ އަށްވަނައިގައި އޮތް ބްރައިޓަން އާ ވާދަކޮށް ފަހަތުން އަރައި 3-1 އިން މެޗު ކާމިޔާބު ކޮށްގެން ރެލިގޭޝަން ޒޯނުން މައްޗަށް ޖެހިލައިފަ އެވެ. ފޮރެސްޓް މިވަގުތު އޮތީ 33 މެޗުން 30 ޕޮއިންޓް ހަމަކޯށްގެން ލީގުގެ 17 ވަނައިގަ އެވެ.

އަންގާރަ ދުވަހުގެ ރޭ ލީޑްސް ޔުނައިޓެޑާ ވާދަކޮށް 1-1 އިން އެއްވަރުވި ލެސްޓާ ސިޓީ އޮތީ 29 ޕޮއިންޓާ އެކު 18 ވަނައިގަ އެވެ. މީގެ އިތުރުން އަންގާރަ ދުވަހުގެ ރޭ ވުލްވްސް ވަނީ 2-0 އިން ކްރިސްޓަލް ޕެލަސް ބަލިކޮށްފަ އެވެ. އަދި އެސްޓަން ވިލާ ވަނީ 1-0 އިން ފުލަމް ބަލިކޮށް ލީގުގެ ފަސް ވަނައަށް ޖެހިލައިފަ އެވެ.

އެސްޓަން ވިލާ ފަސް ވަނައިގައި އޮތީ 33 މެޗުން 54 ޕޮއިންޓް ހޯދައިގެންނެވެ. ހަ ވަނައިގައި ލިވަޕޫލް އޮތްއިރު ހަތް ވަނައިގައި އޮތީ ޓޮޓެންހަމް ހޮޓްސްޕާ އެވެ. ލިވަޕޫލާއި ޓޮޓެންހަމް ވެސް ވަނީ 32 މެޗުން 53 ޕޮއިންޓް ހޯދައިފަ އެވެ.