ރަބަރޭގެ މަރުގެ ދައުވާލިބޭ މީހާއަށް ވަކީލަކު ހަމަޖައްސަން އިތުރު ފުރުސަތެއް

މަރާލުމަށް ފަހު ސްރީލަންކާގެ ސަރަހައްދަކަށް އެއްލާލާފައި އޮއްވާ ފެނުނު ހުސައިން ރަޒީން (ރަބަރޭ) މަރާލަން ފައިސާ ޚަރަދުކުރި ކަމަށް ބުނެ ދައުލަތުން ދައުވާކުރާ މީހާއަށް ވަކީލަކު ހަމަޖައްސަން އިތުރު ފުރުސަތެއް ކްރިމިނަލް ކޯޓުން މިއަދު ދީފި އެވެ.

ނޮވެމްބަރު، 2015 ގައި މަރާލުމަށް ފަހު ލަންކާގެ ސަރަހައްދަކަށް އެއްލާލާފައި އޮއްވާ ފެނުނު މައްސަލާގައި، އެކަމަށް ޚަރަދުކުރި ކަމަށް ބުނެ ދައުލަތުން ދައުވާކުރަނީ ރ. ކަނދޮޅުދޫ ފީރޯޒުގޭ އިބްރާހިމް އަބްދުއްރަހުމާންގެ މައްޗަށެވެ. އޭނާގެ މައްޗަށް ކުރަނީ އެނގިހުރެ މީހަކު މަރެއް ފޮރުވުމުގެ ދައުވާ އާއި ނުރައްކާތެެރި އެއްޗެއް ބޭނުންކޮށްގެން ގަސްދުގައި މީހަކު މެރުމުގައި ބައިވެރިވުމުގެ ދައުވާ އެވެ.

އެ މައްސަލާގައި ވަކީލަކު ހަމަޖައްސަން ކުރިން އިބްރާހިމަށް ފުރުސަތު ދީފައި އޮތަސް މިއަދު ބޭއްވި އަޑުއެހުމުގައި އޭނާގެ ވަކީލަކު ނެތެވެ. އިބްރާހިމް ބުނީ މާލީ ދަތިކަމާ ހެދި ވަކީލަކު އަދި ހަމަނުޖެހެނީ ކަމަށެވެ. އެހެންވެ ކޯޓުން ވަނީ އިތުރު 15 ދުވަހުގެ މުއްދަތެއް އޭނާއަށް ދީފަ އެވެ.

ލަންކާގެ ފުލުހުންނާއި ދިވެހި ފުލުހުން ގުޅިގެން ހިންގި ތަހުގީގުގައި އިބްރާހިމް ހައްޔަރުކުރީ ރާއްޖެއިންނެވެ. އިތުރު މީހަކު ލަންކާއިން ވެސް ހައްޔަރުކުރި އެވެ. ލަންކާ ފުލުހުން ބުނެފައިވާ ގޮތުގައި ރަބަރޭ މަރާލީ މީހެއްގެ މަރުގެ ބަދަލު ހިފުމަށެވެ. އެކަންކުރި މީހާއަށް 140 މިލިއަން ލަންކާ ރުޕީސް ދީފައިވާ ކަމަށް ލަންކާ ފުލުހުން އޭރު ބުނެފައިވެ އެވެ.