އޭދަފުށީގެ އެކްސިޑެންޓުގައި އަނިޔާވި ޒުވާނާ އިތުރު ފަރުވާ އަށް މާލެ ގެނެސްފި

ބ. އޭދަފުށީގައި މިއަދު ހަވީރު ހިނގި އެކްސިޑެންޓުގައި އަނިޔާވި ޒުވާނާ އިތުރު ފަރުވާ އަށް މިރޭ މާލެ ގެނެސްފި އެވެ.

ދެ ސައިކަލް ޖެހި ހިނގި އެކްސިޑެންޓުގައި އަނިޔާވި އުމުރުން 18 އަހަރުގެ ޒުވާނާއަށް އޭޑީކޭ ހޮސްޕިޓަލްގެ އައިސީޔޫގައި މިހާރު އަންނަނީ ފަރުވާދެމުންނެވެ. އޭނާގެ ހާލު އަދިވެސް ވަރަށް ސީރިއަސް ކަމަށް އެނގިފައި ވެ އެވެ.

އިތުރު ތަފުސީލު ލިބޭ ގޮތެއް އަދި ނުވެ އެވެ.

އެނގިފައިވާ ގޮތުގައި ހާލު ސީރިއަސްވި މި ޒުވާނާއަކީ މާޒިޔާ ސްޕޯޓްސް ކްލަބުގެ ފުޓްބޯޅަ ކުޅުންތެރިޔާ އަލީ ފާސިރު (ސެންޓޭ)ގެ ކޮއްކޮ އެވެ.

މި އެކްސިޑެންޓުގައި ދެން އަނިޔާވި 40 އަހަރުގެ މީހާއަށް މާ ބޮޑު އަނިޔާއެއް ނުލިބޭ ކަމަށާއި އޭނާގެ ހާލު ރަނގަޅު ކަމަށް ބ. އަތޮޅު ހޮސްޕިޓަލުން ބުންޏެވެ.

އެ ހޮސްޕިޓަލުން ބުނި ގޮތުގައި، އަނިޔާވި 18 އަހަރުގެ ޒުވާނާގެ ބޮލަށް ވަރަށް ބޮޑަށް ގެއްލުން ލިބި، ސިކުނޑިއަށް ލޭ އެޅިފައިވާ ކަމަށް ބެލެވެ އެވެ.

އޭދަފުށި ކައުންސިލްގެ ރައީސް މުހައްމަދު ފާތިހު ވިދާޅުވީ އެ އެކްސިޑެންޓް ހިނގީ އެ ރަށުގެ ބަނދަރު މަގުގައި ކަމަށެވެ. އެ އެކްސިޑެންޓް ހިނގަން މެދުވެރިވި ސަބަބު އަދި ޔަގީންނުވާ ކަމަށް އޭނާ ވިދާޅުވި އެވެ.