ޓްރީޓޮޕްގައި އައިވީއެފް ފަށަނީ 46،000ރ. އިން

ދަރިމައިވުމުގެ މައްސަލަތަކަށް ފަރުވާ ދިނުމަށް އައިވީއެފް ހަދަން ފަށަނީ 46،000ރ. އަށް ކަމަށް، ރާއްޖޭގައި އެ ފަރުވާ ފަށާ ޓްރީޓޮޕް ހޮސްޕިޓަލުން އިއްޔެ ބުނެފި އެވެ.

އެ ހޮސްޕިޓަލްގެ ސީއޯއޯ އާދިލް މޫސާ "މިހާރު" އަށް ވިދާޅުވީ އަންނަ ހޯމަ ދުވަހު ހުޅުވާ ސެންޓަރުން އައިވީއެފަށް އަގު ހަމަޖެއްސުމުގައި ވަރަށް ގިނަ ކަންކަމަށް ރިއާޔަތްކުރި ކަމަށެވެ. އެގޮތުން، މި ސަރަހައްދުގެ އެހެން ގައުމުތަކުގައި އެ ފަރުވާ ދޭ އަގުތަކަށް ބަލާފައިވާ ކަމަށް އާދިލް ވިދާޅުވި އެވެ.

ގުދުރަތީ ގޮތުން ދަރިން ލިބުމުގައި މައްސަލަ ދިމާވާ ނަމަ އެކަމަށް ދެން އޮތް ފަރުވާއަކީ އައިޔޫއައި އަދި އައިވީއެފް މެދުވެރިކޮށް ދަރިން ހޯދުމެވެ. އޭގެ ތެރެއިން ރާއްޖޭގައި މިހާތަނަށް ވެސް ލިބުނީ އައިޔޫއައި ފަރުވާ އެކަންޏެވެ. އެހެންވެ، އައިވީއެފް ހެދުމަށް ބޮޑު ހަރަދެއް ކޮށްގެން ޖެހެނީ ރާއްޖެއިން ބޭރުން ފަރުވާ ހޯދާށެވެ.

ގިނަ ދިވެހިން އައިވީއެފް ހަދަން ދަނީ އިންޑިއާ އަދި ލަންކާގެ ހޮސްޕިޓަލްތަކަށެވެ. އެ ތަންތަނުގައި ފަރުވާ ހޯދަން އެކަނި ވެސް އައިވީއެފްގެ ބުރަކަށް 2000-5000 ޑޮލަރު (30،840-77،100ރ.) ހޭދަވެ އެވެ. އޭގެ އިތުރުން ފަރުވާއަށް ގިނަ ދުވަހު ބޭރުގައި ހުރުމާއި ކެއުމަށް ބޮޑު ހަރަދެއް ހިނގަ އެވެ.

ދަރިމައިވުމުގެ މައްސަލަތަކަށް ފަރުވާ ހޯދަން އާސަންދަ ނުލިބޭތީ އެ ހުރިހާ ކަމަކަށް ހަރަދު ކުރަން ޖެހެނީ އަމިއްލައަށެވެ.

ނަމަވެސް، އާދިލް ވިދާޅުވީ ރާއްޖޭގައި އެ ފަރުވާ ދޭން ފަށަނީ 46،000ރ. އިން ކަމަށެވެ. އެއީ ކޮންސަލްޓޭޝަނުން ފެށިގެން އެމްބްރިއޮ ޓްރާންސްފާ ހިމެނޭ، އައިވީއެފްގެ އެއް ބުރެވެ.

"އަޅުގަނޑުމެން ފަށާއިރު މި ފަށަނީ ވަރަށް އެފޯޑަބްލް، އެކްސެސެބްލް އަދަދެއްގެ ގޮތުގައި 46،000ރ. އިން މި ފަށަނީ އައިވީއެފް. އޭގެ މާނައަކީ އޭގައި ހުރިހާ ކަމެއް ހިމެނިގެންނޭ ދާނީ،" އޭނާ ވިދާޅުވި އެވެ.

"ގިނަ ފަހަރަށް ދެ މީހުން ދަތުރުކުރުމާއި އެކޮމޮޑޭޝަނާއި ވަގުތަކީ ވެސް ވެލިއު ހުންނަ އެއްޗެއް، އެއަށް ވެސް އަގެއް ހުންނާނެ. އަޅުގަނޑުމެންގެ މި އަގާ ބަލާއިރު، އަޅުގަނޑުމެން މި ހުށަހަޅާ އަގަކީ ވަރަށް ރީޒަނަބަލް އަގެއް ކަމަށް ބަލަނީ. މިއީ، ފަށާއިރު ކުރިއަށްގެންދާ އަގެއް. މިއާއެކު، އާސަންދާ އެކު މި މަސައްކަތްކުރަނީ ކިހާ ކަވަރޭޖެއް މި ކަމުގައި ލިބޭނެތޯ."

އާދިލް ވިދާޅުވީ އައިވީއެފް އަށް އާސަންދަ ހޯދުމަށް ރަސްމީކޮށް މަޝްވަރާ ނުކުރިޔަސް، އެ ފަރުވާ އަށް އާއްމުންނަށް އެހީއެއް ދެވޭނެ ގޮތްތައް ބަލާ ކަމަށެވެ. އެގޮތަށް، އާސަންދަ އަށް ބޭނުންވާ މައުލޫމާތުތައް ފޮނުވަން އެ ކުންފުނިން އެދިފައިވާ ކަމަށް އޭނާ ވިދާޅުވި އެވެ

ޓްރީޓޮޕްގައި އައިވީއެފް ސެންޓަރު ހުޅުވަނީ އިންޑިއާގެ ސައިމާ ސެންޓަރާ ގުޅިގެންނެވެ.