އައިދޫ ޓޫރިޒަމަށް ބޭނުން ނުކުރޭ: އާ މެނޭޖްމެންޓް

ބ. އައިދޫގެ އާ މެނޭޖްމެންޓުން އެރަށް ޓޫރިޒަމުގެ ބޭނުމަށް ބޭނުން ނުކުރާ ކަމަށާއި، އެރަށުގައި ކުރިއަށް ގެންދަން ރާވަނީ ދަނޑުވެރިކަމުގެ މަސައްކަތްތައް ކަމަށް މިދިޔަ މަހުގެ 31 ގައި އެ ރަށާ ހަވާލުވި، މޯލްޑިވިއަން މާމެޑް ޕްރައިވެޓް ލިމިޑެޓުން ބުނެފި އެވެ.

އެކުންފުނިން ބުނީ، އާއިދޫ ދަނޑުވެރިކަމުގެ ރަށެއްގެ ގޮތުގައި ތަރައްގީ ކުރަނީ ބޭރުގެ އިންވެސްޓަރެއްގެ އެހީ އާ އެކު ކަމަށެވެ. އަދި ވޭތުވެދިޔަ ތިން ހަފްތާގައި އެރަށާ ގުޅޭ މަސައްކަތްތައް ފަށައިފައިވާ ކަމަށެވެ.

އެކުންފުނީގެ އޮފިޝަލަކު ވިދާޅުވީ، ކުރިން އެރަށުގައި ގެސްޓް ހައުސް އުސޫލުން ކޮޓަރި ދޫކުރިތޯ، ނޫން ތޯ ބުނަން ނޭނގޭ ކަމަށެވެ. އޭނާ ވިދާޅުވީ، އެރަށުގައި ޓޫރިޒަމާ ގުޅޭ އެއްވެސް ހަރަކާތެއް ނުހިންގާނެ ކަމަށެވެ. އަދި އެފަދަ އެއްވެސް ހަރަކާތެއް މިހާރު ކުރިއަށް ނުދާނެ ކަމަށެވެ.

މިދިޔަ މަހުގެ 31 ގެ ކުރިން އެރަށް ފިޝަރީޒް މިނިސްޓްރީން ދޫކޮށްފައި އޮތީ މުހައްމަދު ސައީދު ކިޔާ މީހަކަށެވެ. އެރަށް 2017 ގައި ދޫކުރީ 21 އަހަރަށެވެ. މި ރަށުގައި 3.1 ހެކްޓަރު ހުރެ އެވެ.