ބަލިވެ އުޅޭތީ ސަމަންތާ ފިލްމީ މަސައްކަތާ ދުރަށް

ދެކުނު އިންޑިއާގެ މަޝްހޫރު އެކްޓްރެސް، ސަމަންތާ ރޫތު ޕްރަބޫ ވަރަށް ބޮޑަށް ބަލިވެ އުޅޭތީ ދުވަސްކޮޅަކަށް އެކްޓުކުރުމާ ދުރަށް ދާން އޭނާ ނިންމައިފި އެވެ.

ބޮލީވުޑްގެ ހަބަރުތައް ގެނެސްދޭ ނޫސްތަކުން ރިޕޯޓްކުރި ގޮތުގައި، ސަމަންތާ ވަނީ އެކްޓިން އިން ހަ މަހުގެ ބްރޭކެއް ނަގަން ނިންމައިފަ އެވެ. އަދި އޭނާ މި ބްރޭކް ނަގަނީ ބޮޑު ބައްޔަކަށް ބޭސްފަރުވާކުރަން ޖެހިގެން އެމެރިކާއަށް ދިއުމަށް ކަމަށް ވެސް ރިޕޯޓްތައް ބުނެ އެވެ.

ނޫސްތަކުގައި ބުނީ ސަމަންތާ އެމެރިކާއަށް ދަނީ މަޔޯސައިޓިސްއަށް ފަރުވާ ހޯދުމަށް ކަމަށެވެ. މަޔޯސައިޓިސްއަކީ ހަށިގަނޑުގެ އެކި ތަންތަން ދުޅަވެ، މީހާ ވަރަށް ބޮޑަށް ބަލިކޮށްލާ ބައްޔެކެވެ. މިއީ ވަރަށް މަދުން ނޫނީ ނުފެންނަ ބައްޔެއް ވެސް މެ އެވެ.

މި ބައްޔަށް ޑައިގްނޯސްވި ކަމަށް، މިދިޔަ އަހަރު މީޑިއާއަކަށް ދިން އިންޓަވިއުއެއްގައި ސަމަންތާ އަމިއްލައަށް ވެސް ބުނެފައިވެ އެވެ.

ސަމަންތާއަކީ ދެކެނު އިންޑިއާގެ ސިނަމާގެ އިތުރުން ބޮލީވުޑްގައި ވެސް މިހާރު ފިޔަޖަހަމުން އަންނަ ތަރިއެކެވެ. އޭނާގެ ކުރިއަށް އޮތް ފިލްމަކީ އަންނަ ސެމްޓެމްބަރު މަހު އެކެއްގައި ސިނަމާތަކުގައި އަޅުވާ ތެލުގޫ ފިލްމު "ކުޝީ" އެވެ.

ބަލިވެ އުޅޭތީ ސަމަންތާ އިތުރު ފިލްމަކަށް އަދި ސޮއިނުކުރާ ކަމަށް ވެސް ރިޕޯޓްތައް ބުނެ އެވެ.