ޕާސްޕޯޓް ނުލާ ދިއުމުން މޯނީ ރޯއީއަށް ނުފުރުނު

ބޮލީވުޑްގެ ތަރި މޯނީ ރޯއީ ޕާސްޕޯޓް ނުލާ އެއާޕޯޓަށް ދިއުމުން، އެއާޕޯޓްގެ ސެކިއުރިޓީން އޭނާ އެތަނަށް ނުވެއްދުމުން ގިނަ ބައެއްގެ ސަމާލުކަން އެކަމަށް ހުއްޓިއްޖެ އެވެ.

ނޫސްތަކުން ރިޕޯޓްކޮށްފައިވާ ގޮތުގައި މިދިޔަ އަންގާރަ ދުވަހު މޯނީއަށް ބޮންބޭ އެއާޕޯޓަށް ދިޔައީ ހަނދާން ނެތިގެން ގޭގައި ޕާސްޕޯޓް ބާއްވައިފަ އެވެ. އެކަމަކު، އޭނާއަކީ މަޝްހޫރު މީހަކަށް ވިޔަސް، ޕާސްޕޯޓް ނުގެންނަނީސް އެއާޕޯޓަށް ނުވައްދަން އެއާޕޯޓްގެ ސެކިއުރިޓީން ނިންމީ އެވެ. އަދި ޕާސްޕޯޓް ހިފައިގެން އަންނަން، އަނބުރާ ގެއަށް ދިއުމަށް ސެކިއުރިޓީން އޭނާއަށް އެންގީ އެވެ.

ބޮންބޭ އެއާޕޯޓްގައި އެ ވަގުތު ތިބި ޕަޕަރާޒީން ވަނީ އެ މަންޒަރުތައް ވީޑިއޯކޮށް، ސޯޝަލް މީޑިއާގައި އާންމުކޮށްފަ އެވެ.

މޯނީ އެއާޕޯޓަށް ދިޔައީ ދުބާއީގައި އޮތް ފެޝަން އިވެންޓަކަށް ދިއުމަށެވެ. އެންމެފަހުން، އެހެން ފްލައިޓެއްގައި އޭނާ ވަނީ އިއްޔެ ދުބާއިއަށް ގޮސްފަ އެވެ.

މޯނީ އެންމެފަހުން ފެނުނީ މިދިޔަ އަހަރު ސިނަމާތަކުގައި އެޅުވި "ބްރަމާސްތުރާ" އިންނެވެ. އޭނާގެ ކުރިއަށް އޮތް ފިލްމަކީ "ދަ ވާޖިން ޓްރީ" އެވެ. އެ ފިލްމު އަޅުވާ ދުވަހެއް އަދި އިއުލާންނުކުރެ އެވެ.