ކަންގަނާގެ ޕާސްޕޯޓް އާކޮށް ނުދީގެން ބޮމްބޭ ހައި ކޯޓަށް ހުށަހަޅައިފި

އެކި ކަންކަމާ ގުޅިގެން ބޮލީވުޑްގެ ބަތަލާ ކަންގަނާ ރަނާވަތާ ދެކޮޅަށް ކޯޓުތަކަށް ގިނަ މައްސަލަތަކެއް ހުށަހަޅާފައިތީ ގައުމުން ބޭރަށް ދަތުރުކުރަން ހުރި ހުރަސްތަކާ ހެދި އޭނާގެ ޕާސްޕޯޓް އާނުކުރެވިގެން އެ މައްސަލަ ބޮމްބޭ ހައި ކޯޓަށް ހުށަހަޅައިފި އެވެ.

މީޑިއާތަކުން ބުނީ ކަންގަނާގެ ފަރާތުން އެ މައްސަލަ ކޯޓަށް މި ހަފުތާގެ ތެރޭގައި ހުށަހެޅީ އޭނާގެ ވަކީލު ރިޒްވާން ސިއްދީގީ ކަމަށެވެ. އޭގައި ބުނެފައި ވަނީ ފިލްމު "ދާކަޅް" ގެ ޝޫޓިން އަށް މި މަހުގެ 15 ގައި ކަންގަނާ ހަންގޭރީ އަށް ދާން އޮތް ނަމަވެސް ޕާސްޕޯޓް އާކޮށްނުދީ ހިފަހައްޓާފައި އޮތުމުން ބޮޑެތި ދަތިތަކެއް ދިމާވެފައިވާ ކަމަށެވެ. ކޯޓަށް ހުށަހެޅި މައްސަލާގައި ބުނެފައި ވަނީ ހަންގޭރީ އަށް ކުރާ ޝޫޓިން ދަތުރަކީ އޮގަސްޓް މަހުގެ 30 އަށް އަށް ދެމިގެންދާނެ ދަތުރެއް ކަމަށެވެ. އެހެންވެ ޕާސްޕޯޓް ވީހާ ވެސް އަވަހަކަށް އާކޮށްދޭން އެދޭ ކަމަށާއި މިހާރު އޮތް ގޮތުން ކަންގަނާގެ ޕާސްޕޯޓްގެ މުއްދަތު ސެޕްޓެމްބަރު 30 އަށް ހަމަވާނެ ކަމަށް ބުނެފައިވެ އެވެ.

ޕާސްޕޯޓް އާކޮށްދޭން ކޯޓަށް ހުށަހެޅި އިރު ކަންގަނާގެ މައްޗަށް ދައުވާކުރަން 700 ވުރެ ގިނަ މައްސަލަ އެކި މީސްމީހުން އެކި ކޯޓްތަކަށް ހުށަހަޅާފައިވެ އެވެ. އޭގެ ތެރޭގައި ސޯޝަލް މީޑިއާ ޕްލެޓްފޯމްތަކުގައި އެކި ކަންކަކަމާ ގުޅިގެން ކޮށްފައިވާ ބޮޑެތި ތުހުމަތުތަކާ ގުޅޭ މައްސަލަތައް ގިނަ އެވެ.

ކަންގަނާއާ ދެކޮޅަށް ކޯޓަށް މައްސަލަ ހުށަހަޅާފައިވާ މީހުންގެ ތެރޭގައި މަޝްހޫރު ޅެންވެރިޔާ އަދި ސްކްރީން ރައިޓަރު ޖާވިދު އަޚްތަރު ވެސް ހިމެނެ އެވެ. އޭނާ ކަންގަނާއާ ދެކޮޅަށް ކޯޓަށް ދިޔައީ މީގެ އަހަރެއް ކުރިން ދަންޖެހިގެން އަމިއްލަ އަށް މަރުވި އެކްޓަރު ސުޝާންތު ސިންގް ރާޖްޕޫތުގެ މަރާ ގުޅިގެން ޖާވިދަށް ތުހުމަތުކޮށް ދެއްކި ވާހަކަތަކަކާ ގުޅިގެންނެވެ.

ހިތުހުރިހާ އެއްޗެއް މީސްމީހުންނަށް ދިމާއަށް ގޮވައި، ގައުމުގައި ހުރި ބޮޑެތި މައްސަލަތަކުގެ ތެރެއަށް ވަދެ، ބޮޑުވަޒީރު ނަރެންދިިރަ މޯދީގެ ސަރުކާރަށް ސަނާ ކިޔައި، ސަރުކާރާ ދެކޮޅު މީހުންނާއި އަދި ވަކިން ހާއްސަކޮށް މުސްލިމުންނަށް ކުޑައިމިސްކުރެވޭ ގޮތްގޮތަށް ކަންގަނާ ދެއްކި އެތައް ވާހަތަކަކާ ގުޅިގެން ވެސް އޭނާއާ ދެކޮޅަަށް އެތައް މައްސަލައެއް ކޯޓުތަކަށް ހުށަހަޅާފައިވެ އެވެ.

ބޮލީވުޑްގެ އެންމެ ހުނަރުވެރި ބަތަލާއިންގެ ތެރޭގައި ހިމެނޭ ކަންގަނާ އަކީ ހަތަރު ވަނަ ފަހަރަށް މި އަހަރު ނެޝަނަލް އެވޯޑް ވެސް ކަށަވަރުކުރި ބަތަލާއެކެވެ. އޭނާގެ ކުރިއަށް ހުރި ފިލްމުތަކުގެ ތެރޭގައި "ދާކަޅް" ގެ އިތުރުން "ތަލައިވީ" އާއި "ތޭޖާސް" ހިމެނެ އެވެ.