ގޭސް ލީކުވެފައި ހުއްޓާ ރޯކުރުމުން ފިހުނު މީހަކަށް ފަރުވާ ދެނީ

މާލޭގެ ގެއެއްގައި ގޭސް އުނދުނެއް ރޯކުރަނިކޮށް ހުޅުގަނޑު ފަޅައިގެންގޮސް ފިހުނު މީހަކަށް ފަރުވާދޭން ފަށައިފި އެވެ.

މ. ދިލީވިލާގައި މި ހާދިސާ ހިނގީ އެމްއެންޑީއެފުން ބުނި ގޮތުގައި ގޭސް ލީކުވެފައި ހުއްޓާ އުނދުން ރޯކުރުމުންނެވެ.

އެމްއެންޑީއެފުން ބުނީ މި ހާދިސާގައި އަނިޔާވި އަންހެން މީހާގެ މޫނު ފިހިފައިވާ ކަމަށާއި ހޮސްޕިޓަލްގައި އޭނާއަށް ފަރުވާ ދެމުން އަންނަ ކަމަށެވެ.

ގޭސް ލީކުވެފައި ހުއްޓާ ރޯކުރުމުން ނުރައްކާތެރި ހާދިސާތައް ހިނގައި އެތައް ބަޔަކަށް އަނިޔާވެފައިވެ އެވެ. މި އަހަރާއި މިދިޔަ އަހަރު ވެސް މިފަދަ އެތައް ހާދިސާއެއް ހިނގާފައި ވާއިރު މިދިޔަ އަހަރު ފިހުނު އަންހެނަކަށް ފަރުވާދެނިކޮށް ނިޔާވެފައި ވެސް ވެ އެވެ.