ސައުދީގެ އެހީގައި މި އަހަރުގެ ޓާޓަލް ފެސްޓިވަލް ބާއްވައިފި

ރާއްޖޭގައި ހުންނަ ސައުދީ އެމްބަސީގެ އެހީގައި މި އަހަރުގެ ޓާޓަލް ފެސްޓިވަލް ބާއްވައިފި އެވެ.

މިއީ ނައިފަރު ޖުވެނައިލް އިން އިންތިޒާމުކޮށްގެން މިދިޔަ އަހަރުން ފެށިގެން ބާއްވަމުން އަންނަ ފެސްޓިވަލެކެވެ.

މި އަހަރުގެ ފެސްޓިވަލް ބޭއްވީ ޅ. އަތޮޅުގެ ރަށްތަކުގަ އެވެ. އެ ފެސްޓިވަލްގެ މި އަހަރުގެ ޓައިޓަލް ސްޕޮންސަރަކީ ސައުދީ އެމްބަސީ އެވެ.

ސައުދީ އެމްބަސީން މިއަދު ބުނީ "ޅަވިޔަނި ޓާޓަލް ފެސްޓިވަލް 2023" ގައި ބައިވެރިވުމަކީ ލިބުނު ވަރަށް ބޮޑު އުފަލެއް ކަމަށެވެ.

އެ ފެސްޓިވަލްގައި، މި ދާއިރާގައި މަސައްކަތްކުރާ ތަޖުރިބާކާރުންނާއި އެހީތެރިންނާއި އާންމުން ބައިވެރިވެ، ތަފާތު ޕްރޮގްރާމްތައް ބޭއްވި ކަމަށާއި އަދި ވެލާކަހަނބު ހިމާޔަތްކުރުމުގެ ދިމާވާ ގޮންޖެހުންތަކާ ގުޅޭ ގޮތުން މަޝްވަރާ ކުރި ކަމަށް ވެސް އެމްބަސީން ބުންޏެވެ.

"ސައުދީ ގްރީން އިނީޝިއޭޓިވްގެ ދަށުން ތިމާވެށި ހިމާޔަތްކުރުމަށާއި ދެމެހެއްޓެނިވި ތަރައްގީގެ ލަނޑުދަނޑިތައް ހާސިލުކޮށް، އަމާން، ފެހި މުސްތަގުބަލެއް ހޯދުމަށް ގިނަ މަސައްކަތްތަކެއް ކުރެވޭ،" އެ އެމްބަސީން ބުންޏެވެ.

ތިމާވެއްޓާ ރައްޓެހި، ދެމެހެއްޓެނިވި މުސްތަގުބަލެއް ހޯދުމަށާއި ކަނޑުތަކާއި ދިރުންތައް ހިމާޔަތްކުރުމަށް ދުނިޔޭގެ ފެންވަރުގައި ގައުމުތަކާ ގުޅިގެން މަސައްކަތް ކުރުމަކީ ސައުދީ ސަރުކާރުން ވަރަށް ފަހުރުވެރިވާ ކަމެއް ކަމަށް ވެސް އެ އެމްބަސީން ބުންޏެވެ.