ރާޖް ކުންދުރާގެ ބަޔޮޕިކް އޭނާ އަމިއްލަ އަށް ކުޅެފި

ބޮލީވުޑްގެ ބަތަލާ ޝިލްޕާ ޝެޓީގެ ފިރިމީހާ، ރާޖް ކުންދުރާ އޭނާގެ ބަޔޮޕިކް ފިލްމު "ޔޫޓީ 69" އަމިއްލަ އަށް ކުޅެފި އެވެ.

އަމިއްލަ ފިލްމެއްގެ މަސައްކަތް ކުރަމުން އަންނަ ކަމަށް ރާޖް ކުރިން ބުނެފައިވެ އެވެ. ނަމަވެސް، އެއީ އޭނާގެ ބަޔޮޕިކް ކަމަކަށް ނުބުނެ އެވެ.

މިހާރު މަސައްކަތްތައް އެއްކޮށް ނިމިފައި އޮތް މި ފިލްމުގެ ޓްރެއިލާ ކުއްލިއަކަށް އާންމުކުރީ އޭނާ އިއްޔެ ބޭއްވި އިވެންޓެއްގަ އެވެ.

ބަރަހަނާ ފިލްމު ހަދައި އެއިން އާމްދަނީ ހޯދަމުން ދިޔަ ކަމަށް ބުނެ ކުރި ތުހުމަތުތަކަކާ ގުޅިގެން ރާޖް ވަނީ 2021 ވަނަ އަހަރު ގިނަ ދުވަސްތަކެއް ޖަލުގައި ހޭދަކޮށްފަ އެވެ. މި ފިލްމުގައި ދައްކާނީ ވެސް އޭނާ ޖަލުގައި ހޭދަކުރި ދުވަސްތަކުގައި އުޅެން ޖެހުނު ގޮތެވެ.

ރަޖް ޖަލުން ނުކުތީ ކަފާލާތުގެ ދަށުންނެވެ. އޭނާގެ މައްޗަށް މަނީލޯންޑަރިންގެ ތުހުމަތު ވެސް ކުރެ އެވެ. އޭނާ އަށް ކުރާ ތުހުމަތުތަކާ ގުޅިގެން ކުރި ދައުވާގެ ޝަރީއަތް އަދި ނުނިމެ އެވެ.

އެ ހުރިހާ ތުހުމަތުތައް އޭނާ ދޮގުކުރެ އެވެ.

މި ފިލްމު ޑައިރެކްޓުކުރީ ކުރިން ބޮލީވުޑްގެ ފިލްމުތަކުގައި އެޑިޓިންގެ މަސައްކަތް ކުރި ޝާހުނަވާޒް އަލީ އެވެ.

"ޔޫޓީ 69" ސިނަމާތަކުގައި ދައްކަން ފަށަނީ އަންނަ މަހު ތިނެއްގަ އެވެ.