ފެނުނީ ވަޒަނެއް ކަން އެމްއެންޑީއެފަށް ޔަގީންވޭ، ބަޔާން ނެގުމަށް ފަހު މީހާ ދޫކޮށްލައިފި

ހދ. ކުޅުދުއްފުށީ އެއާޕޯޓަށް ފުރަން ދިޔަ މީހަކު ބަލައި ފާސްކުރިއިރު، އޭނާ އަތުން ވަޒަނެއް ފެނުނު މައްސަލައިގައި އެ އަންހެންމީހާގެ ބަޔާން ނެގުމަށް ފަހު އޭނާ ދޫކޮށްލާފައިވާ ކަމަށް ފުލުހުން މިއަދު ބުނެފި އެވެ.

މާލެ އަންނަން ވެގެން ކުޅުދުއްފުށީ އެއާޕޯޓަށް ފުރަން ދިޔަ އެ މީހާގެ އަތުން އެ ވަޒަން ފެނުނީ މިދިޔަ ހުކުރު ދުވަހުގެ ރެ އެވެ.

އެ މީހާގެ އަތުން ފެނުނީ ތަޅުދަނޑިއަށް ލައްވާ އެއްޗެއް ކަމަށް ބުނެ ސޯޝަލް މީޑިއާގައި ދައްކަމުންދާ ވާހަކަތަކާ ގުޅޭގޮތުން ސުވާލު ކުރުމުން އެމްއެންޑީއެފުން ބުނީ މިހާތަނަށް ބެލި ބެލުމުން އެއީ ވަޒަނެއް ކަމަށް ވަރަށް ބޮޑަށް ޔަގީން ކުރެވޭ ކަމަށެވެ.

އެ މައްސަލަ ތަހުގީގު ކުރަމުން އަންނައިރު، އެކަމާ ގުޅިގެން އެއްވެސް މީހަކު މިހާތަނަށް ހައްޔަރުކޮށްފައި ނުވާ ކަމަށް ވެސް ފުލުހުން ބުންޏެވެ. އެ މީހާއާ ވެސް ސުވާލުކޮށް، ބަޔާން ނެގުމަށް ފަހު މި ވަގުތަށް ދޫކޮށްލީ ކަމަށް ފުލުހުން ބުންޏެވެ.

މަދުން ނަމަވެސް އެފަދަ ހާދިސާތައް ހިނގާއިރު، މީގެ ކުރިން ސްރީ ލަންކާގައި ދިވެއްސަކު ބަޑިއެއް ގެންގުޅެނު ކަމަށް ތުހުމަތުކޮށް ހައްޔަރު ވެސް ކުރި އެވެ.