މަސައްކަތްތެރިންގެ ޖަމިއްޔާތަކަށް ގާނޫނީ ބާރުވެރިކަން ދޭ ބިލު ރައީސް ތަސްދީގު ކުރައްވައިފި

މަސައްކަތްތެރިންގެ ޖަމިއްޔާތައް އުފެއްދުމާއި އެ ޖަމިއްޔާތަކުގައި ބައިވެރިވުމުގެ ހައްގު ލިބޭ ގޮތަށް އެކުލަވައިލި އިންޑަސްޓްރިއަލް ރިލޭޝަންސް ބިލު ރައީސް ޑރ. މުހައްމަދު މުއިއްޒު މިއަދު ތަސްދީގު ކުރައްވައިފި އެވެ.

މަސައްކަތްތެރިންގެ ޖަމިއްޔާތައް އުފެއްދުމާއި އެ ޖަމިއްޔާތަކުގެ ހަރަކާތްތަކުގައި ބައިވެރިވުމަކީ ގާނޫނުއަސާސީން ކަށަވަރު ކޮށްދީފައިވާ ހައްގެކެވެ. އޭގެ ފަހުން މަސައްކަތްތެރިންގެ ޖަމިއްޔާތައް އުފެދުން ނަމަވެސް އެކަމާ ގުޅޭ ހާއްސަ ގާނޫނެއް ނެތުމުގެ ސަބަބުން އެފަދަ ޖަމިއްޔާތަކަށް އެކަށީގެންވާ ގާނޫނީ ބާރުވެރިކަމެއް ނުލިބެ އެވެ.

އެ މައްސަލައިގެ ކަންބޮޑުވުން ފާޅުކުރާތާ ދުވަސްތަކެއް ފަހުން ކުރީ ސަރުކާރުން ހުށަހަޅައިގެން ޑިސެމްބަރު 18، 2023 ގައި ރައްޔިތުންގެ މަޖިލީހުން އިންޑަސްޓްރިއަލް ރިލޭޝަން ބިލު ފާސް ކުރި އެވެ.

އެ ގާނޫނުގައި މަސައްކަތްތެރިންގެ ޓްރޭޑް ޔޫނިއަންތަކާއި ވަޒީފާ ދޭ ފަރާތްތަކުގެ ޔޫނިއަންތައް އުފެއްދުމާއި އެފަދަ ޔޫނިއަންތައް ހިންގުމާ ގުޅޭ އުސޫލުތައް ވަނީ ބަޔާން ކޮށްފަ އެވެ. އޭގެ ތެރޭގައި މަސައްކަތްތެރިންނާއި ވަޒީފާދޭ ފަރާތްތަކުގެ ދެމެދުގައި އުފެދޭ މައްސަލަތަކާއި ދެބަސްވުންތައް ހައްލު ކުރުމާ ގުޅޭ އުސޫލުތަކާއި ޓްރޭޑް ޔޫނިއަންތަކާ ގުޅޭ ކަންކަން އިންތިޒާމް ކުރުމުގެ އުސޫލުތައް ވެސް ވަނީ ބަޔާން ކޮށްފަ އެވެ.

އެ ގާނޫނުގައިވާ ގޮތުން ބިލު ތަސްދީގު ކުރާތާ 30 ދުވަސް ތެރޭގައި ރަޖިސްޓްރާ އޮފް ޔޫނިއަންސްގެ މަގާމަށް ރައީސް މީހަކު އައްޔަން ކުރަން ޖެހެ އެވެ. ޔޫނިއަންތައް ރަޖިސްޓާ ކުރުމާއި ގާނޫނާ ހިލާފުވާ ޔޫނިއަންތަކާ މެދު ފިޔަވަޅު އެޅުމުގެ ބާރު އޭނާ އަށް ލިބޭނެ ކަމަށް އެ ގާނޫނުގައި ބުނެފައި ވެއެވެ.

ޔޫނިއަންތައް ރަޖިސްޓަރީ ކުރުމަށް އެކުލަވާލާ ގަވާއިދަށް އަމަލުކުރަން ފަށާތާ ތިން މަސް ތެރޭގައި ކުރިން އެހެން ގާނޫނެއްގެ ދަށުން ރަޖިސްޓާ ކޮށްގެން ހިންގަމުން އައި މަސައްކަތްތެރިންގެ ޓްރޭޑް ޔޫނިއަންތަކާއި ވަޒީފާ ދޭ ފަރާތްތަކުގެ ޔޫނިއަންތައް އެ ގާނޫނުގައި ބަޔާންކޮށްފައިވާ ގޮތުގެ މަތިން ރަޖިސްޓްރާ އޮފް ޔޫނިއަންސް އަށް ހުށަހަޅައިގެން ރަޖިސްޓަރީ ކުރަންޖެހެ އެވެ.

އަދި އަށް މެންބަރުންގެ މައްޗަށް އެކުލެވޭ "ޓްރައިޕާޓައިޓް އެޑްވައިޒަރީ ބޯޑު" ގެ ނަމުގައި ބޯޑެއް އުފެއްދުމާއި ހަމަ "އިންޑަސްޓްރިއަލް ޑިސްޕިއުޓް ރިޒޮލިއުޝަން ޑިވިޝަން" ގެ ވަކި ޑިވިޝަނެއް ވަޒީފާއާ ބެހޭ ޓްރައިބިއުނަލްގައި ވެސް އުފައްދަން ޖެހޭ ކަމަށް ގާނޫނުގައި ބުނެފައި ވެއެވެ.