ލިވަޕޫލް ފަސް ޕޮއިންޓް ކުރީގައި، ސަލާހު ވެސް ފަރުވާއަށް ގެންނަނީ

ޑާވިން ނޫނޭޒް އާއި ޑިއޯގޯ ޖޮޓާގެ ގޯލުތަކުން 4-0 އިން ބޯންމަތު ބަލިކޮށް ލިވަޕޫލުން އިނގިރޭސި ޕްރިމިއާ ލީގުގެ އެއްވަނައިގައި ފަސް ޕޮއިންޓްގެ ލީޑެއް ނަގައިފި އެވެ.

ފުރަތަމަ ހާފުގައި ގޯލެއް ނުފެނުނު އިރު، ލިވަޕޫލުން ލަނޑުތައް ޖެހީ ދެވަނަ ހާފުގަ އެވެ. ފުރަތަމަ ލަނޑު 49 ވަނަ މިނިޓުގައި ޖަހައިދިނީ ނޫނޭޒް އެވެ. ލީޑު ފުޅާކުރީ 70 ވަނަ މިނިޓުގައި ޖޮޓާ ޖަހައިދިން ގޯލުންނެވެ. އޭގެ ނުވަ މިނިޓު ފަހުން ޖޮޓާ އޭނާގެ ދެވަނަ ގޯލު ޖެހި އިރު، މެޗުގެ ފަހު ލަނޑު ނޫނޭޒް ޖެހީ މެޗުގެ އިތުރު ވަގުތުގެ ތެރޭގަ އެވެ.

މި ނަތީޖާއާ އެކު ލިވަޕޫލް އެއްވަނައިގައި އޮތީ 21 މެޗުން 48 ޕޮއިންޓް ހޯދައިގެންނެވެ. ދެވަނައިގައި އޮތް މެންޗެސްޓާ ސިޓީ ވަނީ 20 މެޗުން 43 ޕޮއިންޓް ހޯދައިފަ އެވެ.

ލީގުގެ ތިންވަނައިގައި އޮތީ 21 މެޗުން 43 ޕޮއިންޓް ހޯދާފައިވާ އާސެނަލް އެވެ. އާސެނަލް ވަނީ ހޮނިހިރު ދުވަހުގެ ރޭ އަމިއްލަ ދަނޑުގައި 5-0 އިން ކްރިސްޓަލް ޕެލަސް ބަލިކޮށްފަ އެވެ.

ރަނގަޅު ފޯމެއްގައި އޮތް ބޯންމަތާ ދެކޮޅަށް ލިވަޕޫލް ކުޅުނީ މުހިންމު ކުޅުންތެރިންތަކެއް ނުލަ އެވެ. ޓްރެންޓް އެލެކްޒެންޑާ އާނޯލްޑާއި އެންޑްރޫ ރޮބާޓްސަން އަދި ޑޮމިނިކް ސޮބޮސްލައި އަނިޔާގައި ހުރި އިރު ޖަޕާން މިޑްފީލްޑަރު ވަޓަރޫ އެންޑޯ ހުރީ ގައުމީ ޓީމާ އެކު އޭޝިއަން ކަޕަށް ގޮހެވެ. މިސްރުގެ ކެޕްޓަން މުހައްމަދު ސަލާހު ހުރީ ގައުމީ ޓީމާ އެކު އެފްރިކަން ކަޕް އޮފް ނޭޝަންސްގަ އެވެ.

އައިވަރީ ކޯސްޓުގައި ކުރިއަށްދާ އެފްރިކަން ކަޕް އޮފް ނޭޝަންސްގައި މިސްރު ކުޅުނު ގުރޫޕް ސްޓޭޖުގެ ދެވަނަ މެޗުގައި ސަލާހުގެ ހޭމްސްޓްރިންގަށް ވަނީ އަނިޔާ ވެފަ އެވެ. އަދި މުބާރާތުގައި މިސްރު ކުއާޓާ ފައިނަލަށް ގޮސްގެން ނޫނީ އޭނާ އަށް މުބާރާތުގައި އިތުރަށް ނުކުޅެވޭނެ ކަމަށް އެގައުމުގެ ފުޓްބޯޅަ އެސޯސިއޭޝަނުން ވަނީ ހާމަކޮށްފަ އެވެ.

ސަލާހުގެ އަނިޔާވެފައިވާ ފަޔަށް އަވަސް ފަރުވާއެއް ހޯދަން އޭނާ އަނބުރާ ލިވަޕޫލަށް ފޮނުވާލަން ވަނީ ނިންމައިފަ އެވެ. ލިވަޕޫލްގެ ކޯޗު ޔާގަން ކްލޮޮޕް ހާމަކުރާ ގޮތުގައި މިސްރު ފައިނަލަށް ގޮސްގެން ސަލާހު ކުޅުމުގެ ފުރުސަތު އެބަ އޮތެވެ.

"އެންމެ ބުއްދިވެރި ގޮތަކީ ވެސް އެއީ، އޭނާގެ [ސަލާހުގެ] ރީހެބް ކަންތައް އަހަރެމެންނާ އެކު ކުރިއަށް ގެންދިޔުން،" ކްލޮޕް ބުންޏެވެ.

"އަހަރެން ބުނާނީ، މިސްރު ފައިނަލަށް ހިނގައްޖެ ނަމަ، ސަލާހު ފިޓްކޮށް ހުރިއްޔާ އޭނާއަށް ފައިނަލް ކުޅެވޭނެއޭ."

މިސްރަކީ އެފްރިކަން ކަޕްގެ އެންމެ ކާމިޔާބު ޓީމެވެ. ހަތް ފަހަރު މުބާރާޓް ކާމިޔާބު ކުރިއިރު، އެންމެ ފަހުން ތަށި ނެގީ 2010 ގަ އެވެ. އެއީ ސަލާހު ގައުމީ ޓީމަށް ކުޅުމުގެ ކުރިންނެވެ. ކްލަބް ލެވެލްގައި ހުރިހާ ކާމިޔާބީއެއް ހޯދާފައިވާ ސަލާހު ހުރީ ގައުމީ ޓީމާ އެކު ސަރަހައްދީ މުބާރާތް ކާމިޔާބު ކުރުމުގެ އުންމީދުގަ އެވެ.

"އަހަރެން ވަރަށް ބޭނުންވޭ އެފްރިކަން ކަޕް ކާމިޔާބު ކުރަން. މިހާރު ނުވޮިއަސް އަހަރެން ގަބޫލު ކުރަނީ ކޮންމެވެސް ދުވަހަކުން ވާނެ ކަމަށް. އަހަރެން އުންމީދު ކޮށްގެން ވާނެ ކަމަށް ގަބލު ކުރެވެންނާ އެކަމެއް ހާސިލް ކުރަން، އަދިވެސް އެހެން ގަބޫލު ކުރަނީ،" ސަލާހު ބުންޏެވެ.