ބޭބެއަށް ވަޅިން ހަމަލާދިން ލަމްހާ ޑްރަގާ އެކު ހައްޔަރުކޮށްފި

މާލޭގެ ގެއެއްގެ ތެރޭގައި ހިންގި މާރާމާރީއެއްގައި ބޭބެއަށް ވަޅިން ހަމަލާދިން މައްސަލައިގައި މީގެ ކުރިން ހައްޔަރުކުރި ލަމްހާ ނަސީރު ގިނަ އަދަދެއްގެ ޑްރަގާ އެކު ހައްޔަރުކޮށްފި އެވެ.

ހ. އަލަވަލުގެ، ލަމްހާ ނަސީރު ޑިސެމްބަރު 22، 2022 ގައި، އެއްބަނޑުއެއްބަފާ ބޭބެގެ ބޮލަށް ވަޅި ހެރި މައްސަލައިގައި ހައްޔަރުކޮށް ބަންދުގެ މުއްދަތު ވެސް އިތުރުކުރި އެވެ. އޭރު އޭނާ ހައްޔަރު ކުރި އިރު ވެސް ހުރީ މަސްތު ހާލަތުގައި ކަމަށް ތުހުމަތު ކުރި އެވެ.

މިދިޔަ ހުކުރު ދުވަހުގެރޭ ލަމްހާ ހައްޔަރުކުރީ އޭނާ ދިރިއުޅޭ ކޮޓަރިން ގިނަ އަދަދެއްގެ ޑްރަގާއި ރަލާ އެކުގަ އެވެ. އޭނާގެ ބަންދަށް ކްރިމިނަލް ކޯޓުން ވަނީ 20 ދުވަސް ދީފަ އެވެ.

ބަންދު އަމުރުގައިވާ ގޮތުގުން ޑްރަގާއި ބަނގުރާ ފެނިފައިވާ ތަނަކީ ލަމްހާ ދިރިއުޅޭ ކޮޓަރިން ކަަމަށް ހެއްކެއްގެ ބަޔާނުގައިވެ އެވެ. އަދި ޑްރަގާއި އެ ތަކެތި ބަންދުކޮށް، ކިރުމަށް ބޭނުންކުރާ އާލާތްތަކާއި ބަނގުރާކަމަށް ޝައްކުކުރެވޭ ދިޔާ އެއްޗެހި ހުރި ފުޅިތަކެއް ވެސް އެ ކޮޓަރިން ފެނިފައިވާ ކަަމަށް އަމުރުގައިވެ އެވެ.

ފެނުނު މަސްތުވާތަކެތީގެ ތެރޭގައި 318 ގްރާމް ކެނެބިސް ހުރި ކަމަށް އެ ތަކެތީގެ ތަހުލީލު ރިޕޯޓުން ދައްކަ އެވެ. އެއީ އިތުރު ބަޔަކާ ގުޅިގެން ހިންގާފައިވާ ކަމެއް ކަމަށާއި އެ މައްސަލައިގައި އިތުރު މީހަކު ވެސް ހައްޔަރު ކޮށްފައިވާ ކަމަށް ކޯޓު އަމުރުގައިވެ އެވެ.

އެ ކޮޓަރިން ލަމްހާގެ ޕާސްޕޯޓް ފެނުނު ކަމަށް ވެސް އެ ބަޔާނުގައިވެ އެވެ. ލަމްހާގެ ކުޑަކުމުދާތަކެތި ނަގައިގެން ހެދި ރިޕޯޓުން ޑްރަގަށް ވަނީ ޕޮޒިޓިވްވެފަ އެވެ.

މި ތުހުމަތުތަކަށް ލަމްހާ އިންކާރު ކުރާއިރު ދިފާއުގައި ބުނެފައި ވަނީ އެ ކޮޓަރިން ފެނުނު ތަކެއްޗާއި އޭނާއާ އެއްވެސް ގުޅުމެއް ނެތް ކަމަށެވެ. އެ ފެނުނު ތަކެއްޗަކީ ލަމްހާގެ ބެލުމުގެ ދަށުގައިވާ ތަކެއްޗެއް ނޫން ކަމަށާއި ފެނުނު ޑްރަގުން އޭނާގެ ފިންގާ ޕްރިންޓް ނުފެންނަ ކަމަށް ބުނެފައި ވާއިރު އެ ކޮޓަރީގައި އޭނާ ދިރިއުޅޭ ކަމަށް ވެސް ވަނީ އިންކާރުކޮށްފަ އެވެ.

ފުލުހުން ބުނީ ލަމްހާ އަކީ މި ބާވަތުގެ ހައްޔަރާއި ކުށުގެ ރެކޯޑު އޮންނަ މީހެއް ކަމަށެވެ.