ރާއްޖޭގައި ޑްރަގުގައި ނުޖެހޭ ރަށެއް ނެތް: ލުބްނާ

ރާއްޖޭގައި މީހުން ދިރިއުޅޭ ހުރިހާ ރަށެއްގައި މަސްތުވާތަކެތި ބޭނުންކުރާ މީހުން އެބަތިބި ކަމަށް ނޭޝަނަލް ޑްރަގް އެޖެންސީ (އެންޑީއޭ) ގެ ޗެއާމަން އަދި ހޯމް މިނިސްޓްރީގެ ސްޓޭޓް މިނިސްޓަރު ލުބްނާ ޒާހިރު ހުސައިން މިއަދު ވިދާޅުވެއްޖެ އެވެ.

އެންޑީއޭ އިން ބޭއްވި މީޑިއާ ބްރީފިންއެއްގައި، މިދިޔަ ފަސް އަހަރު ދުވަހުގެ ފުލުހުންގެ ތަފާސްހިސާބުތަކަށް އިޝާރާތް ކުރައްވައި ލުބްނާ ވިދާޅުވި ގޮތުގައި މަސްތުވާތަކެއްޗާ ގުޅޭ އެއްވެސް މައްސަލައެއް ނުހިނގާ އެއްވެސް ރަށެއް ނެތެވެ.

"ރާއްޖޭގައި މަސްތުވާތަކެތީގެ މައްސަލައިގެ އިންސިޑެންޓެއް ނުހިނގާ އެއްވެސް ރަށެއް ނެތް. މާނައަކީ މަސްތުވާތަކެތި ބޭނުން ނުކުރާ އެއްވެސް ރަށެއް ނެތޭ،" މަސްތުވާތަކެއްޗާ ދެކޮޅަށް ރާއްޖޭގައި ކުރެވޭ މަސައްކަތްތަކާ ގުޅޭ ގޮތުން އިސްކަންދަރު ކޮށީގައި ބޭއްވި ޕްރެސްގައި ލުބްނާ ވިދާޅުވި އެވެ.

އެހެންވެ ލުބްނާ ވިދާޅުވީ، މަސްތުވާތަކެއްޗަށް ދެވިހިފާފައިވާ މީހުންނަށް ފަރުވާ ދިނުމަށް އަތޮޅު ތެރޭގައި ވެސް އިންތިޒާމުތަކެއް ހަމަޖެއްސުމަކީ ވަރަށް މުހިއްމު ކަމެއް ކަމަށެވެ.

އޭނާ ވިދާޅުވި ގޮތުގައި ސަރުކާރުން މިހާރު މަސައްކަތްކުރަނީ ނ. ވެލިދު އާއި ކ. ކާށިދު އާއި ލ. ގަމުގައި ކޮމިއުނިޓީ ރިހެބިލިޓޭޝަން ސެންޓަރުތައް ގާއިމުކުރުމަށެވެ. އެކި ސަރަހައްދުތަކުގައި އައުޓްޕޭޝަންޓް ފަރުވާގެ އިންތިޒާމު ހަމަޖެއްސުމަށް ވެސް ހުއްދަ ލިބިފައިވާ ކަމަށާއި އޭރުން އެކި ހޮސްޕިޓަލްތައް މެދުވެރިކޮށް ފަރުވާ ދެވޭނެ ކަމަށް ސްޓޭޓް މިނިސްޓަރު ވިދާޅުވި އެވެ.

"މިސަރައްހަދުތަކުގައި ފަރުވާދެވޭނެ އިންތިޒާމުތައް ހަމަޖެއްސުމުގެ އިތުރަށް މިނިސްޓްރީ އޮފް ހެލްތާ ވާހަކަ ދައްކައިގެން ހޮސްޕިޓަލު ސެޓިންގެ ތެރެއިން އައުޓްޕޭޝަންޓް މަސްތުވާތަކެތީގެ ފަރުވާ ދެވޭނެ ނިޒާމު ގާއިމުކުރުމަށް ވާހަކަ ދެއްކެވި، މިހާރު އެ ހުއްދަތައް ލިބިފައި ވަނީ،" ލުބްނާ ވިދާޅުވި އެވެ.

ޕްރެސް ކޮންފަރެންސްގައި ފާހަގަކުރި އިތުރު ކަންކަން:

- ހުޅުމާލޭގައި ވަރަށް އަވަހަށް އައުޓްޕޭޝަންޓް ފަރުވާގެ ކްލިނިކެއް ހުޅުވާނެ.

- މެތަޑޮންގެ ފަރުވާ މިހާރު ހުޅުމާލޭގައި ވެސް ލިބޭނެ. ކުރިން ލިބެމުން އައީ ހަމައެކަނި މާލެއިން.

- ރިމާންޑް ސެންޓަރެއް ކ. ހިންމަފުއްޓާއި ހުޅުމާލޭގައި ވަނީ ގާއިމްކޮށްފައި.

- ފަރުވާގެ ކިއުއެއް މިހާރު ނެތް، މިހާރު ފަރުވާ އަށް ނުގެންދެވި ވަނީ މެޑިކަލް މައްސަލަތަކެއް ތިބި މީހުން އެކަނި.

އެންޑީއޭގެ އެކްޓިން ސީއީއޯ މުހައްމަދު ރާޝިދު ވިދާޅުވީ، މަސްތުވާތަކެތީގެ ފަރުވާ ހޯދާ މީހުން އަނބުރާ އެ ކުށުގެ ތެރެއަށް ވަންނަ ނިސްބަތް ރާއްޖޭގައި ވަރަށް ބޮޑު ކަމަށެވެ. އެކަމަކު އަނބުރާ މުޖުތަމައަށް އައުމަށް ފަހު، ރަނގަޅުވާން އެ މީހުން މަސައްކަތް ކުރިޔަސް އެންޑީއޭ އަށް ވެސް އެ މީހުން އަނބުރާ ނެރުމަށް ފަހު ކުރަންޖެހޭ މަސައްކަތްތައް ނުކުރެވޭކަމަށް ރާޝިދު ވިދާޅުވި އެވެ.

އޭނާ ވިދާޅުވި ގޮތުގައި ފަރުވާ ހޯދައިގެން ނުކުންނަ މީހުންނަށް ވަޒީފާ ހޯދައިދީ، އެ މީހުންގެ އަހުލާގަށް ވަޒީފާގެ މާހައުލުން އަންނަ ބަދަލުތައް ވެސް ދެނެގަންނަން ޖެހެ އެވެ. އެކަމަކު މިހާތަނަށް އެ މަސައްކަތް އެންމެ ރަނގަޅަށް އޮތީ ނުކުރެވި ކަމަށް އެއްބަސްވެވަޑައިގަތެވެ.

"ވަރަށް ކުޑަ މިންވަރަކަށް ނޫނީ އެހީތެރިކަން ނެތް ފޯރުކޮށްދެވިފައި. ވަޒީފާ ހޯދައިދިނުމުގައި ވަރަށް ދަތި. އަމުދުން މިޒާތުގެ ކަމެއްގައި ހިސްޓްރީއެއް އޮތް މީހަކަށް ވަޒީފާއެއް ދޭންވެސް މީހުން ޖެހިލުންވޭ. އެހެންވީމާ އަޅުގަނޑުމެން މިހާރު ގަބޫލުކުރަނީ ކުއްޖާ އަށް ވަޒީފާ ހޯދައިދިނުމުގައި ވެސް އެހީތެރިކަން ފޯރުކޮށްދިނުން،" ރާޝިދު ވިދާޅުވި އެވެ. "ވަޒީފާ އަދާކުރުމުގައި ވެސް އަޅުގަނޑުމެންގެ އައުޓްރީޗް މުވައްޒަފުން އެ މީހުން ވަޒީފާ އަދާކުރާ ތަނަށް ގޮސް އޭނާގެ ސުޕަވައިޒާ ބައްދަލުކޮށް، އަހުލާގަށް އަންނަ ބަދަލުތައް ބަލައި އެހީތެރިކަން ދިނުން،"

އެހެން އެއް ބަޔަކަށް ފަރުވާ ދޭން ޖެހުމުގެ ސަބަބުން ފަރުވާ އަށް ދާ އެހެން މީހުންނަށް ޖާގަ ގެއްލޭ ކަމަށް ވެސް އޭނާ ވިދާޅުވި އެވެ.

ރާއްޖޭގައި މަސްތުވާތަކެތީގެ ހާލަތު ބެލުމަށް ސާވޭއެއް ނުކުރާތާ ގިނަ އަހަރުތަކެއް ވެފައިވާކަން ފާހަގަކުރައްވައި، ރާޝިދު ވިދާޅުވީ ނޭޝަނަލް ޑްރަގް ކައުންސިލުން މިހާރު އަންނަނީ މުޅި ރާއްޖޭގެ ހާލަތު ބެލުމަށް ސާވޭއެއް ހެދުމަށް ތައްޔާރުވަމުން ކަމަށެވެ. އޭރުން މަސްތުވާތަކެތީގެ އަވައިގައި ޖެހިފައިވާ މީހުންގެ ސީދާ އަދަދާއި އެކަން ރާއްޖޭގައި އޮތް ހާލަތު އެނގޭނެ ކަމަށް ވިދާޅުވި އެވެ.

ސްޕްރިޓެންޑެންޓް އޮފް ޕޮލިސް އަދި ޑްރަގު އެންފޯސްމެންޓް ޑިޕާޓްމަންޓުގެ ހެޑު ނާހިދު ހުސެއިން ވިދާޅުވީ މާލޭގެ މަގުތަކުގައި މަސްތުވާތަކެތީގެ ހާލަތުގައި އުޅޭ މީހުން ބަންދުކޮށް އެ މީހުންނަށް ފަރުވާ ދިނުމުގެ މަސައްކަތް ފަށާފައިވާ ކަމަށެވެ.

ނާހިދު ވިދާޅުވި ގޮތުގައި މަގުމަތީގައި ސަލާންޖަހަން އުޅޭ މަސްތުވާތަކެތި ބޭނުންކުރާ މީހުންނާއި ވައްކަމާއި ފޭރުމުގައި އުޅޭ އެފަދަ މީހުންނާއި މިސްކިތްތަކުގައި ނިދާ މީހުންގެ ތެރެއިން މަސްތުވާތަކެތި ބޭނުންކުރާ މީހުން ބަންދުކޮށް ރިމާންޑް ސެންޓަރަށް ސީދާ ގެންދިއުމުގެ މަސައްކަތް އެބަ ކުރެވެ އެވެ.

އޭނާ ވިދާޅުވީ މި މަހުގެ 9 އިން ފެށިގެން މިހާތަނަށް 14 މީހަކު ބަންދުކޮށްފައިވާ ކަމަށެވެ. އެ މީހުން ބަންދުން ދޫނުކޮށް ސީދާ ފަރުވާ އަށް ގެންދާއިރު އޭގެ ސަބަބުން މަގުމަތިން ހެޔޮ ބަދަލުތަކެއް ފެންނާނެ ކަމަށް ވިދާޅުވި އެވެ.