ފޮޓޯ ސްޓޯރީ: މި ކަނބުރުގެއިން އަޅިއެއް ނުބުރާނެ, ބައި ގަރުނުވެއްޖެ

އަބްދުއްސަމަދު ހުސެއިން ކަނބުރުގޭގައި: އޭރުގެ ކަނބުރުވެރިކަމާއި މިހާރު އޭނާ މި މަސައްކަތް ކުރާ ގޮތަށް ވަރަށް ބޮޑަށް ތަފާތު. ބިމަށް މުޑި ޖަހައިގެން ފަންގަނޑަކުން ހިޔާކޮށްގެން ފެށިޔަސް މިހާރު އޭނާގެ ކަނބުރުގެއަކީ ޒަމާނީ ތަނެއް. ބްލޯވަރު ގުޅައިގެން މަސައްކަތް ކުރަނީ ކަރަންޓުން. އެކި ތައްގަނޑުތައް ހަދާފައި ހުންނައިރު ގަޔަށް އަޅި ނުބުރާ ގޮތަށް ބޭނުންވާ އެއްޗެއް ވިރުވައި ނިންމާލެވޭ. ނަގިލި ވެސް ބޭނުން ސައިޒަކަށް ހަދައިދޭ.

އަބްދުއްސަމަދު ހަދާފައި ހުރި ކަބީލާތަކެއް ދައްކާލަނީ: އަތުން ދަމާ ގިރުނބާ ބޭނުންކުރި އިރު މަސައްކަތް ލަސްވެފައި އުނދަގޫ. ގިރުނބާ ބޭނުންކޮށްގެން ކަބީލާ އެޅިއިރު އެއް އޮޑިއަށް އެންމެ ގިނައިން އެޅީ 11 ހަންދަރުގެ (ގާތްގަނޑަކަށް 500 ކިލޯގެ) ކަބީލާ. އެ ކަބީލާ އެޅީ އެލިޔާ، އަލީ އަބްދުﷲ އޮޑިއަކަށް ކަމަށް އޭނާ ބުނޭ.

ކަނބުރުގޭގައި އަބްދުއްސަމަދު: ކިއްސަރު ވަޑާންކުރަން ދަންނާތީ އެތައް އޮޑިއެއް ބަނުމުގައި ވެސް އޭނާ ހުނަރުވެރިކަން ބޭނުންކުރި.

ބާޒާރުން ގަންނަން ލިބޭ ތާސް ހުންނަނީ ތުނިކޮށް. އެކަމަކު އަބްދުއްސަމަދު ތާސްއަޅަނީ ކުރީ ޒަމާނުގައި ދިވެހިން ބޭނުންކުރި ތާސްތައް ހުންނަ ގޮތަށް ވަރަށް ބޯކޮށް. ވަރަށް ގިނަ ރަށްރަށުން މި ތާހަށް އޯޑަރުދޭ. ނުވަ އިންޗިން ފެށިގެން 29 އިންޗިއާ ހަމައަށް ތާސްއަޅާ.

ކަނބުރުގޭގައި އަބްދުއްސަމަދު މަސައްކަތާ ބެހޭގޮތުން މައުލޫމާތު ދެނީ: އެންމެ ގިނައިން އޯޑަރު ލިބެނީ އއ. އަތޮޅުން. ބައެއް ފަހަރަށް 20 ތާސް ވެސް އެއްފަހަރާ ފޮނުވަން ޖެހޭ. އެންމެ ބޮޑު ތާހެއް ވިއްކަނީ 2,600 ރުފިޔާއަށް.

ކަނބުރުގޭގައި އަބްދުއްސަމަދު ތާހުގެ މަސައްކަތް ކުރަނީ: އަބްދުއްސަމަދު ބުނި ގޮތުގައި އޭނާގެ ތާސްތައް ރާއްޖޭގެ ހުރިހާ ސަރަހައްދަކަށް ފޮނުވިއްޖެ ކަމަށް. އޭނާ ހަދާ ފެންވަރަށް ތާސް ނުހެދޭ ކަމަށް ގިނަ މީހުން ބުނާތީ އުފާވޭ. ތާސްއަޅަން ތައްގަނޑު ހަދާފައި ހުރީ ޕްލާސްޓިކް ބޮކިންނާއި ފައިބަރުން.

އަބްދުއްސަމަދު ކަނބުރުގޭގައި މަސައްކަތްކުރަން އިށީނދެލައިގެން: އެތައް ބަޔަކަށް އޭނާގެ ފަރާތުން ފައިދާވި މި މަސައްކަތުގައި އުމުރު ހުސްކުރިއިރު ގައުމީ އިނާމެއް އަދި ނުލިބޭ. އެއީ ފޯމެއް ފުރައިގެން އަމިއްލައަށް ހުށަހަޅައިގެން އިނާމު ހޯދަން ބޭނުން ނުވާތީ ކަމަށް އަބްދުއްސަމަދު ބުނި.