މަތީ ތައުލީމުގެ ލޯނުގެ 50 ޕަސެންޓް އެންމެ ޓެކްނިކަލް ދާއިރާތަކަށް

މަތީ ތައުލީމަށް ދޫކުރާ ލޯނުގެ 50 ޕަސެންޓު، އެންމެ ޓެކްނިކަލް ދާއިރާތަކަށް ހާއްސަކުރަން ސަރުކާރުން ނިންމައިފި އެވެ.

ރައީސް އޮފީހުގެ ވެބްސައިޓުގައި ބުނީ، ޓެކްނިކަލް ދާއިރާތަކަށް ހަޔާ އެޑިއުކޭޝަން މިނިސްޓްރީން ދޫކުރާ ލޯނުގެ ބައެއް ހާއްސަ ކުރަން ނިންމީ އިއްޔެ ބޭއްވި ކެބިނެޓު ބައްދަލުވުމުގައި ކަމަށެވެ.

ހައިލީ ޓެކްނިކަލް ދާއިރާތަކުގެ ތެރޭގައި ހިމެނެނީ އިންޖީނިއަރިން އާއި ސުޕަ ސްޕެޝަލައިޒޭޝަން އަދި ކޯޑިން ފަދަ ދާއިރާތަކެވެ.

ލޯނު ދޫކުރާއިރު ވަކި ދާއިރާއަކަށް މީގެ ކުރިން ހާއްސަ ކޯޓާއެއް ކަނޑައަޅާފައެއް ނުވެ އެވެ. ނަމަވެސް، ޑިޕްލޮމާ އިން ފެށިގެން ޕީއެޗްޑީއާ ހަމައަށް ކިޔަވަން ހުޅުވާލާ އެ ފުރުސަތުގައި ޖުމްލަކޮށް ހުރިހާ ދާއިރާއަކަށް އެހީ ދެ އެވެ. އޭގެ ތެރޭގައި ޓެކްނިކަލް ދާއިރާތައް ވެސް ހިމެނެ އެވެ.

ސަރުކާރުން ވަނީ މަތީ ތައުލީމުގެ 500 ފުރުސަތަށް މިދިޔަ ފެބްރުއަރީ މަހު ހުޅުވާލައިފަ އެވެ. އެ އަށް ކުރިމަތިލުމުގެ މުއްދަތު އަންނަ ބުރާސްފަތި ދުވަހު ހަމަވާނެ އެވެ.