ލޯނު ލިބޭ ވަގުތީ ލިސްޓުގައި 806 ދަރިވަރުން

ސްޓޫޑެންޓް ލޯނަށް އެދި 1،338 ދަރިވަރުން ކުރިމަތި ކަމަށާއި އޭގެ ތެރެއިން 806 ދަރިވަރަކު ލޯނަށް ޝަރުތު ހަމަވާ ކަމަށް ކަނޑައަޅައި ހަޔަ އެޑިޔުކޭޝަން މިނިސްޓްރީން ލިސްޓު މިއަދު އާންމުކޮށްފި އެވެ.

އެ ލޯން ސްކީމުގެ ދަށުން މި އަހަރު ހުޅުވާލީ 500 ފުރުސަތެވެ.

ލޯނު ލިބޭ ދަރިވަރުންގެ ވަގުތީ ލިސްޓު މިނިސްޓްރީން އާންމުކޮށްފައި ވާއިރު ޝަރުތު ހަމަނުވާ ދަރިވަރުންނަށް އެކަމުގެ ސަބަބު ލިސްޓުގައި ބަޔާންކޮށްފައިވެ އެވެ.

މިނިސްޓްރީން ބުނީ ވަގުތީ ލިސްޓަށް ޝަކުވާ ހުށަހެޅުމުގެ ފުރުސަތު މިހާރު ހުޅުވާލާފައިވާ ކަމަށާއި އަންނަ މަހުގެ ތިން ވަނަ ދުވަހުގެ ނިޔަލަށް ޝަކުވާ ހުށަހެޅޭނެ ކަމަށެވެ.

ލޯނު ސްކީމުގެ ދަށުން ދެ ބަޔަކަށް ލޯނު ދޫކުރެ އެވެ. އެއީ އަލަށް ކިޔަވަން ފަށާ ދަރިވަރުންނާއި މިހާރު ކިޔަވަމުން އަންނަ ދަރިވަރުން (ޓޮޕްއަޕް ލޯން) އެވެ.

މިފަހަރު ޓޮޕްއަޕް ލޯނު ދޫކުރަން ނިންމާފައި ވަނީ 700،000ރ. އަށް ވުރެ ބޮޑުނުވާ އަދަދަކަށެވެ.