ދަނޑުގެ ލައިޓްތަކުގެ މަރާމާތު ނިންމައި، މުބާރާތް ފެށި ފަހުން ރޭގަނޑު މެޗުތައް ކުޅެން ހުއްދަ ދީފި

ގަލޮޅު ދަނޑުގެ ލައިޓުތަކުގެ މަރާމާތު ނިންމުމުން، ރޭގަނޑު މެޗު ކުޅުމުގެ ހުއްދަ ދިނުމުން، މުބާރާތް ފެށިފަހުން ޝެޑިއުލަށް ބަދަލު ކޮށްފި އެވެ.

އެގޮތުން ހެނދުނު 8 ޖަހާއިރު ކުޅެން ތާވަލް ކޮށްފައިވާ މެޗުތައް މީގެ ފަހުން ކުޅޭނީ ހަވީރު 4 ޖަހާއިރު އެވެ. އަދި ހަވީރު 4 ޖަހާއިރު ކުޅުމަށް ތާވަލް ކުރި މެޗުތައް ދެން ކުޅޭނީ ރޭގަނޑު 9 ޖަހާއިރު އެވެ.

ދަނޑުގެ ލައިޓުތަކުގެ މައްސަލަ ހައްލު ކުރެވެންދެން ތިން ފަހަރު މަތިން ލަސްކުރި ޔޫތު ޗެމްޕިއަންޝިޕް، އިއްޔެ ފެށީ ހެނދުނު 8 ޖެހިއިރު އޮޑި ސްޕޯޓްސް ކްލަބާއި ޓީސީ ސްޕޯޓްސް ކްލަބް ބައްދަލުކުރި މެޗުންނެވެ.

އަބްދުالله ފިޒާންގެ ގޯލުން އެ މެޗު 1-0 އިން ކާމިޔާބު ކުރީ ޓީސީ އެވެ. މި މެޗުގެ ދެ ހާފުގައި ވެސް ވަނީ 25 މިނިޓުގެ ކުޅުމަށް ފަހު ވޯޓާބްރޭކެއް ނަގައިފަ އެވެ.

ހެނދުނު މެޗުތައް ކުޅެން ބޭނުން ނުވާ ކަމަށް ބުނެ މީގެ ކުރިން ޓީމުތަކުގެ ކޯޗުން ކަންބޮޑުވުން ފާޅު ކުރި އެވެ. ނަމަވެސް އޭރު ޝެޑިއުލަށް ބަދަލު ނުގެނެވުނީ ލައިޓުތައް މަރާމާތު ކުރުމުގެ މަސައްކަތް ކުރިއަށް ދާތީ ސްޕޯޓްސް މިނިސްޓްރީން ރޭގަނޑު މެޗު ކުޅެން ހުއްދަ ނުދިނުމުންނެވެ.

ރޭގަނޑު މެޗު ކުޅުމުގެ ހުއްދަ، ސަރުކާރުން ދިނުމާ އެކު އެފްއޭއެމުން ވަނީ މުބާރާތުގެ ޝެޑިއުލަށް ބަދަލު ގެނެސްފަ އެވެ. އިއްޔެ ހަވީރު ކުޅެން އޮތް ބުރު ސްޕޯޓްސް ކްލަބާއި ސުޕަ ޔުނައިޓެޑް ސްޕޯޓްސް (ސަސް) ގެ މެޗު ކުޅުނީ ރޭ 9 ޖެހިއިރެވެ. މި މެޗު 6-2 އިން ކާމިޔާބު ކުރީ ސަސް އެވެ.

މިދިޔަ ސީޒަންގައި ގަލޮޅު ދަނޑޫގެ ލައިޓްތަކަށް ގިނަ މައްސަލަތަކެއް ދިމާވި އެވެ. މެޗުތައް ކުރިއަށް ގެންދަން ދަތިތަކެއް ކުރިމަތިވި އެވެ. އެގޮތުން މިދިޔަ އަހަރުގެ ޑިސެމްބަރު ފަސްވަނަ ދުވަހުގެ ރޭ މާޒިޔާ އާއި ބުރު ސްޕޯޓްސް ކުޅުނު މެޗުގެ ދެވަނަ ހާފު ފެށިތަނާހެން ދަނޑުގެ ހުރިހާ ލައިޓެއް ނިވިގެން މެޗު މެދުކަނޑާލި އެވެ. އަދި މައްސަލައަށް ވަގުތީ ހައްލެއް ހޯދައި, މެޗު ކުރިއަށް ގެންދިޔައީ 32 މިނިޓު ފަހުންނެވެ. އެއަށް ފަހު ލީގުގައި ކުޅެން އޮތް ދެ މެޗު ވެސް ހަވީރު ކުޅޭގޮތަށް ހަމަޖެއްސި އެވެ. އަދި މިއާ ގުޅިގެން ދެވަނަ ޑިވިޝަންގެ ހުރިހާ މެޗެއް ވެސް ކުޅުނީ ހަވީރު އެވެ.

ސްޕޯޓްސް މިނިސްޓްރީން ދަނޑުގެ ލައިޓިން ސިސްޓަމްތައް މަރާމާތު ކުރަން ސިފައިންގެ ވެލްފެއާ ކުންފުނި, ސިވެކާ ހަވާލު ކުރީ މިއަހަރުގެ ޖެނުއަރީ މަހުގެ 31 ވަނަ ދުވަހު އެވެ. މަސައްކަތް ފަށާތާ 30 ދުވަހުގެ ތެރޭގައި ނިންމަން 3.9 މިލިއަން ރުފިޔާގެ އަގަކަށް ހަވާލު ކުރި މި މަސައްކަތުގެ އަމަލީ މަސައްކަތް ފަށާފައި ވަނީ މިދިޔަ މަހުގެ 26 ވަނަ ދުވަހު އެވެ.

ހަމަ އެއާ އެކު މި މަހުގެ ކުރީކޮޅު މަރާމާތުގެ މަސައްކަތް ނިންމާލެވޭނެ ކަމަށް ވެސް މިނިސްޓްރީން މީގެ ކުރިން ހާމަ ކުރި އެވެ.

ސަސްގެ ފުރަތަމަ ގޯލަކީ ބުރުގެ ކުޅުންތެރިއެއްގެ އަތުން ބައިކޮޅަށް ވަން ގޯލެކެވެ. އެއަށް ފަހު ލަނޑުތައް ޖަހައިދިނީ އަހުމަދު ނަވާފް ފައުޒީ, މުހައްމަދު ހޫދު އަހުމަދު, މުހައްމަދު އައިމަން އަލީ އަދި މުހައްމަދު އިޒާން އަލީ އެވެ. އިޒާން ވަނީ ދެ ގޯލު ޖަހައިފަ އެވެ. ބުރުގެ ދެ ގޯލު ވެސް ފުރަތަމަ ހާފުގައި ޖަހައިދިނީ މުހައްމަދު ނިހާން އެވެ.

ޖުމްލަ އަށް ޓީމާ އެކު މުބާރާތް ކުރިއަށް ގެންދަނީ ދެ ގުރޫޕަކަށް ބަހާލައިގެންނެވެ. އިއްތެ ގުރޫޕް އޭގެ ދެ މެޗު ކުޅުނުއިރު މިއަދު ކުޅޭނީ ގުރޫޕް ބީގެ ދެ މެޗެވެ. ހަވީރު 4 ޖަހާއިރު މާޒިޔާ އާއި ގްރީން ސްޓްރީޓްސް ބައްދަލު ކުރާއިރު ރޭގަނޑު 9 ޖަހާއިރު ބައްދަލުކުރާނީ ކްލަބް އީގަލްސް އާއި ޔުނައިޓެޑް ވިކްޓަރީ (ޔޫވީ) އެވެ.