އީދު ބަންދުގައި ބީއެމްއެލް ހުޅުވާނީ މި މަހުގެ 18 ގައި އެކަނި

އެމްއެމްއޭގެ ނިންމުމާ އެއްގޮތްވާ ގޮތުގެ މަތިން، ކުރިއަށް އޮތް އަޟްހާ އީދުގެ ބަންދު ދުވަސްތަކުގެ ތެރޭގައި އެ ބޭންކު ހުޅުވާނީ މި މަހުގެ 18 ގައި ކަމަށް ބީއެމްއެލް އިން ބުނެފި އެވެ.

ބީއެމްއެލް އިން ބުނީ އަންނަ ހަފުތާގެ އަންގާރަ ދުވަހުގެ ހެނދުނު 8:30 އިން މެންދުރު 2:00 އަށް ބޭންކުން ހިދުމަތްތައް ދޭނެ ކަމަށެވެ.

މި ބަންދު ދުވަސްތަކުގައިވެސް ރާއްޖޭގެ އެކި ކަންކޮޅުތަކުގައި ހުރި ސެލްފް ސާވިސް ބޭންކިން ސެންޓަރުތައް މެދުވެރިކޮށް ޖަމާކުރުމާއި ފައިސާ ނެގުމާއި ފައިސާ ފޮނުވުމުގެ ހިދުމަތް 24 ގަޑިއިރު ލިބޭނެ އެވެ.

މީހުން ދިރިއުޅޭ ރަށްތަކުގައި ހުންނަ ކޭޝް އެޖެންޓުން މެދުވެރިކޮށް އަސާސީ ބޭންކިން ހިދުމަތްތައް ވެސް އީދު ބަންދުގެ ދުވަސްތަކުގައި ކަސްޓަމަރުންނަށް ލިބޭނެ އެވެ. އަދި އިންޓަނެޓް ބޭންކިން އާއި މޯބައިލް އެޕް މެދުވެރިކޮށް ވެސް ކަސްޓަމަރުންނަށް ހިދުމަތް ލިބޭނެ އެވެ.

އަޟްހާ އީދާ ދިމާކޮށް ލިބޭ ޗުއްޓީގައި ހަފްތާ ބަންދުގެ ދުވަސްތައް ހިމަނައިގެން ނުވަ ދުވަސް ލިބެ އެވެ. އަންނަ ހުކުރު ދުވަހުން ފެށިގެން ބޮޑު އީދުގެ ޗުއްޓީ ފެށޭނެ އެވެ. ބޮޑު ބަންދަކަށް ފަހު ދެން ސަރުކާރު ހުޅުވޭނީ މި މަހުގެ 23 ގަ އެވެ.