މިނިސްޓަރު ރަމީޒާއި ޝަމްނާޒު ސަސްޕެންޑްކޮށްފި

ރައީސް އޮފީހުގެ މިނިސްޓަރު އާދަމް ރަމީޒު އަދި އޭނާގެ ކުރީގެ އަނބިކަނބަލުން، އެންވަޔަރަމެންޓް މިނިސްޓްރީގެ ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް މަގާމުން ސަސްޕެންޑްކޮށްފި އެވެ.

ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވީ ރަމީޒާއި ޝަމްނާޒް ސަސްޕެންޑް ކުރީ ބަލަމުންދާ މައްސަލައަކާ ގުޅިގެން ކަމަށެވެ. އެއީ ކޮންމެ މައްސަލައެއް ކަމެއް ވިދާޅެއް ނުވެ އެވެ.

ނަމަވެސް، ޝަމްނާޒް ވަނީ ސިހުރު ހެދި ކަމުގެ ތުހުމަތުގައި ހައްޔަރުކޮށް، ބަންދުކޮށްފަ އެވެ. އޭނާއާ އެކު އިތުރު ދެ މީހަކު ވެސް ހައްޔަރުކުރި އެވެ. ހައްޔަރުކުރި މީހުންގެ ތެރޭގައި ރަމީޒެއް ނުހިމެނެ އެވެ.

އަދި މި މައްސަލާގައި އޭނާއަށް ތުހުމަތެއް ކުރެވޭ ކަމެއް ވެސް ސާފެއް ނޫނެވެ.

ރަމީޒަކީ ރައީސް ޑރ. މުހައްމަދު މުއިއްޒާ އެކު މާލެ ސިޓީގައި ކައުންސިލްގައި ވެސް މަސައްކަތް ކުރެއްވި އެ މަނިކުފާނުގެ އަރިސް ބޭފުޅެކެވެ. އެންމެ ފުރަތަމަ ރައީސް އޮފީހަށް އައްޔަން ކުރެއްވި ބޭފުޅުންގެ ތެރޭގައި ވެސް ރަމީޒު ހިމެނޭއިރު، ސަރުކާރުގެ ފުރަތަމަ ދުވަސްކޮޅު ރަމީޒު ވަރަށް އިސްކޮށް ހަރަކާތްތެރި ވެސް ވި އެވެ. ނަމަވެސް، މިފަހުން ސަރުކާރުގެ ހަރަކާތްތަކުން ރަމީޒެއް ނުފެނެ އެވެ.

ޝަމްނާޒް އަކީ އާދަމް ރަމީޒުގެ ކުރީގެ އަނބިކަނބަލުންނެވެ. އެ ދެ ބޭފުޅުންގެ ދަރިން ވެސް ތިބިއިރު، މި ފަހުން ރަމީޒު ވަނީ ޝަމްނާޒު ވަރި ކުރައްވައިފަ އެވެ.

މީގެ ކުރިން ޝަމްނާޒް ހުންނެވީ މާލެ ސިޓީ ކައުންސިލްގެ މެންބަރަކަށެވެ. ރައީސް މުއިއްޒު ވެރިކަމަށް ވަޑައިގެންނެވުމުން އޭނާ އެ މަގާމުން އިސްތިއުފާ ދެއްވި އެވެ. ޝަމްނާޒް އެންމެ ފުރަތަމަ އައްޔަން ކުރެއްވީ މުލީއާގެއަށެވެ.