ޓްރަމްޕް އަވަހާރަކޮށްލަން ދިން ކަމަށް ބެލެވޭ ބަޑީގެ ހަމަލާއެއްގައި ޒަހަމްވެއްޖެ

އެމެރިކާގެ ކުރީގެ ރައީސް ޑޮނަލްޑް ޓްރަމްޕް ރިޔާސީ އިންތިހާބުގެ ކެމްޕެއިންގައި ހޮނިހިރު ދުވަހު ބޭއްވި އެއްވުމެއްގެ ތެރޭ މީހަކު ބަޑިން ހަމަލާދޭން މަސައްކަތްކޮށްފި އެވެ.

އުމުރުން 78 އަހަރުގެ ޓްރަމްޕް ޕެންސިލްވޭނިއާގައި ބޭއްވި އެއްވުމެއްގައި ބަޑިން ހަމަލާދޭން މަސައްކަތްކުރީ އޭނާ ޕޯޑިއަމްގައި ވާހަކަ ދައްކަން ހުންނަވަނިކޮށެވެ.

ރަސްމީ އިދާރާތަކުން ބުނީ މި ހާދިސާ ތަހުގީގުކުރަމުން ގެންދަނީ ޓްރަމްޕް އަވަހާރަކޮށްލަން އުޅުނު މައްސަލައެއްގެ ގޮތުގައި ކަމަށެވެ.

ބަޑީގެ އަޑުފައްގަނޑާ އެކު ޓްރަމްޕް އޭނާގެ ކަނާތްފަރާތު ކަންފަތް މަތީ އަތް އެޅުއްވި އެވެ. އެއާ އެކު މޫނުމަތީގައި ލޭ ހުއްޓާ ފެނުނެވެ.

ސީކްރެޓް ސާވިސްގެ އެޖެންޓުން ހަމަ އެވަގުތު ސްޓޭޖަށް އަރައި ޓްރަމްޕް ވަށާލުމަށް ފަހު ހަރުކަށިކަމާ އެކު ޓްރަމްޕް ސްޓޭޖުން ބާލައިގެން ގެންދިޔަ އެވެ. އޭރު ވެސް ޓްރަމްޕް ގޮށްމުއްކަވައިގެ ހުންނަވައި މައްޗަށް އަތް ހިއްލަވައި، އޭނާ ހުންނެވީ ގަދަ ހިތްވަރުގައި ކަމުގެ ނިޝާން ދައްކާލި އެވެ.

އެމެރިކާގެ ނޫސްތަކުން ބުނި ގޮތުގައި ހަމަލާ ދިން ކަމަށް ތުހުމަތުކުރެވޭ މީހާ ވަނީ މަރާލައިފަ އެވެ. އަދި ހަމަލާއާ ގުޅުމެއް ނެތް އެހެން މީހަކު ވެސް އޭނާއަށް ހަމަލާ ދިނުމުގެ ތެރޭގައި މަރުވެފައިވާ ކަމަށް ބުންޏެވެ.

"ކުރީގެ ރައީސް ހުންނެވީ ސަލާމަތުން،" ސީކްރެޓް ސާވިސް އިން އެކްސްގައި ކުރި ޕޯސްޓެއްގައި ބުންޏެވެ.

ރިޕަބްލިކަންގެ ކެންޑިޑޭޓް ޓްރަމްޕްގެ ކެމްޕެއިނުން ވެސް ބުނީ ސިއްހީ ގޮތުން ބަލަންޖެހޭ ކަންކަން ބަލަމުން އަންނަ ކަމަށާއި ޓްރަމްޕް ހުންނެވީ ހެޔޮ ހާލުގައި ކަމަށެވެ. އަދި މި އަނިޔާވެރި އަމަލުގެ ވަގުތު ތަންފީޒީ އިދާރާތަކުން މަސައްކަތްކުރި ހަލުވިކަމާއި ފުރިހަމަކަމަށް ޓްރަމްޕް ޝުކުރު އަދާކުރައްވާ ކަމަށް ވެސް ބުންޏެވެ.

މި ހަމަލާ ދީފައި މި ވަނީ މިހާރުގެ ރައީސް ޖޯ ބައިޑެންގެ ސިއްހީ ހާލުކޮޅާ ހެދި އޭނާ ރިޔާސީ ރޭހުން ވަކިވެވަޑައިގަތުމަށް ޕްރެޝަރު ބޮޑުވެފައި ވަނިކޮށެވެ. ހަމަލާއަށް ފަހު ބައިޑެން ވިދާޅުވީ މިފަދަ އަނިޔާވެރި އަމަލުތަކަށް އެމެރިކާގައި ޖާގައެއް ނޯންނާނެ ކަމަށެވެ.

"ޓްރަމްޕް ސަލާމަތުން ހުންނެވީތީ އުފާކުރަން،" ބައިޑެން ނެރުއްވި ބަޔާނުގައި ވިދާޅުވި އެވެ. "ޓްރަމްޕާއި އޭނާގެ އާއިލާ އާއި ރެލީގައި ތިބި އެންމެންނަށް ވެސް އަޅުގަނޑުގެ ހެޔޮ ދުއާތައް ފޮނުވަން އަދި ޓްރަމްޕަށް އަވަސް ޝިފާއަކަށް އެދެން."

ބައިޑެންގެ ބަޔާން އޭނާ ވަނީ ޓީވީ މެދުވެރިކޮށް ވެސް ދެއްވައިފަ އެވެ. ގޭގައި ހުންނަވައި ދެއްވި ބަޔާނުގައި ވިދާޅުވީ މިކަހަލަ އަމަލުތައް ހިންގައިގެން ނުވާނެ ކަމަށެވެ.