ސިޔާސީ ހޫނު މަޑުކޮށްލާ، މިއީ އަސްލު ހަނގުރާމައެއް ނޫން: ބައިޑެން

އެމެރިކާގައި "ސިޔާސީ ހޫނު" މަޑުކޮށްލުމަށް އެ ގައުމުގެ ރައީސް ޖޯ ބައިޑެން ގޮވާލައްވައިފި އެވެ.

ރިޔާސީ އިންތިހާބުގައި ވާދަކުރައްވާ ކުރީގެ ރައީސް ޑޮނަލްޑް ޓްރަމްޕް އަވަހަރާކޮށްލަން ދިން ނާކާމިޔާބު ހަމަލާއަށް ފަހު ގައުމާ މުހާތަބުކުރައްވަމުން ބައިޑެން ވިދާޅުވީ ސިޔާސީ މައިދާނަކީ އަސްލު ހަނގުރާމައިގެ މައިދާނެއް ނޫން ކަމަށެވެ.

"އަޅުގަނޑުގެ އެކުވެރި ރައްޔިތުން. އެމެރިކާގެ ސިޔާސީ މައިދާނުގެ ހޫނު މަޑުކުުރުމާ ބެހޭ ގޮތުން މިރޭ އަޅުގަނޑު ތިޔަ ބޭފުޅުންނާ ވާހަކަ ދައްކަން ބޭނުން،" އޯވަލް އޮފީހުގައި އިންނަވައި ދެއްވި ތަގުރީރުގައި ބައިޑަން ވިދާޅުވި އެވެ. "ސިޔާސީ ކަންކަމަކީ އެއްވެސް ހާލަތެއްގައި، އަސްލު މާނާގައި ހަނގުރާމައިގެ މައިދާނަކަށް ވެގެން ނުވާނެ، މީހުން މަރާ މައިދާނަކަށް އަދި އަމުދުން ވެގެން ނުވާނެ."

ބައިޑެން ވިދާޅުވީ އިންތިހާބު ކައިރިވަމުން ދިޔަ ވަރަކަށް އަހަރެމެންނަށް އޮތް އިމްތިހާނު ވެސް އުނދަގޫވާނެ ކަމަށާއި ސިޔާސީ ފޯރި ދާނީ ގަދަވަމުން ކަމަށެވެ.

"...ނަމަވެސް އަހަރެމެންގެ ގަބޫލުކުރުންތައް ދުވަހަކުވެސް އަނިޔާވެރިކަމާ ހިސާބަށް ގޮސްގެން ނުވާނެ... މިއީ [ހޫނު މަޑުކޮށް] ހަމަޖެހިލަންވީ ވަގުތު."

އޭނާ ވިދާޅުވީ މިއީ ގައުމު އެއްބައިވާންވީ ވަގުތު ކަމަށާއި އެ މީހަކު ގަބޫލުކުރަން ބޭނުންވާ ވާހަކަ އެކަނި އަޑުއެހުމުގެ ވިސްނުން ދޫކޮށްލަންޖެހޭ ކަމަށެވެ. އެމެރިކާގައި ދީފައިވާ ނުރައްކާތެރި ބައެއް ހަމަލާތަކުގެ ވާހަކައާ އެކު ބައިޑެން ވިދާޅުވީ މިފަދަ ހަމަލާތަކަކީ އާދައިގެ ކަމެއްގެ ގޮތުގައި ދެކެން ދޫކޮށްލެވިގެން ނުވާނެ ކަމަށެވެ.

މަދު ހާލަތެއްގައި ނޫނީ އޯވަލް އޮފީހުން ބަޔާންތައް ނުދެއްވާ ބައިޑެން މިހާރު ވަނީ ޓްރަމްޕަށް ދިން ހަމަލާއަށް ފަހު ސެކިއުރިޓީ ކަންކަމާ ގުޅޭ މިނިވަން ތަހުގީގެއް ކުރުމުން އަމުރުކުރައްވައިފަ އެވެ.

ޓްރަމްޕުގެ ކަންފަތަށް އަމާޒުވި ހަމަލާ ދިނީ 20 އަހަރުގެ މީހެއް ކަމަށްވާ ތޯމަސް މެތިއު ކްރޫކްސް، ކައިރީގައި ހުރި އިމާރާތެއްގެ ފުރާޅުމަތީގައި އޮވެ އެވެ. ސީކްރެޓް ސާވިސްގެ މެންބަރުން ވަނީ ހަމަ އެ ވަގުތު އޭނާއަށް ހަމަލާދީ މަރާލައިފަ އެވެ. މައްސަލަ ތަހުގީގުކުރާ އެފްބީއައި އިން ދަނީ ކްރޫކްސްގެ ފޯނު ހުޅުވޭތޯ ބަލައި ހަމަލާގެ މަގްސަދު ހޯދުމަށް މަސައްކަތްކުރަމުންނެވެ.