ބަދަލުހިފުމެއް ނެތި ޓްރަމްޕަށް ބައިޑެން ދެއްކެވީ ނަމޫނާ

މީގެ ހަތަރު އަހަރު ކުރިން ޑޮނަލްޑް ޓްރަމްޕް، މިހާރުގެ ރައީސް ޖޯ ބައިޑެންއާ ވާދަކުރައްވައި ރިޔާސީ އިންތިހާބުން ނާކާމިޔާބީއާ ކުރިމަތިވެ ވަޑައިގަތުމުން ބައިޑެން އަށް މަރުހަބާ ވިދާޅުވެ ބައްދަލު ނުކުރެއްވި ނަމަވެސް ބައިޑެން ނަމޫނާ ދައްކަވައިފި އެވެ.

ބައިޑެން އިއްޔެ ވަނީ ވައިޓް ހައުސްގެ އޯވަލް އޮފީހަށް ޓްރަމްޕް ގެންނަވައި މަރުހަބާ ވިދާޅުވެ ސަލާންކުރެއްވުމަށް ފަހު ވެރިކަން ބަދަލުކުރުމުގެ މަރުހަލާ އޮމާންކަމާ އެކު ކުރިއަށް ގެންދަވާނެ ކަމުގެ ޔަގީންކަން ދެއްވައިފަ އެވެ. އެކަމަކު މިއީ ބައިޑެންއާ މެދު ޓްރަމްޕް އަމަލުކުރެއްވި ގޮތުގެ އިދިކޮޅެވެ. ޓްރަމްޕް ވަނީ އިންތިހާބުގެ ނަތީޖާ ގަބޫލުކުރެއްވުމަށް ދެކޮޅުހައްދަވައި ބާރުތައް ހަވާލުކުރުމަށް ވެސް އެއްބާރުލުން ނުދެއްވައިފަ އެވެ.

އުމުރުން 78 އަހަރުގެ ޓްރަމްޕަކީ ޑިމޮކްރަސީއަށް ނުރައްކަލެއް ކަމަށް ތަކުރާރުކޮށް ވިދާޅުވެފައިވާ އުމުރުން 81 އަހަރުގެ ބައިޑެން ވަނީ ޓްރަމްޕް ވަޑައިގަތުމާ އެކު "ވެލްކަމް ބެކް" އޭ ވިދާޅުވެ ސަލާންކުރައްވައިފަ އެވެ. އަދި މީޑިއާއަށް އެ ބައްދަލުވުމުގެ ކުރު ތައާރަފެއް ދެއްވުމަށް ޓްރަމްޕުގެ އަރިހުން ބައިޑެން އެދިވަޑައިގަތެވެ.

މިދިޔަ ޖުލައި މަހު އިންތިހާބީ ރޭހުން ވަކިވެ ވަޑައިގެން، ނައިބު ރައީސް ކަމަލާ ހެރިސްއަށް ރިޔާސީ ޓިކެޓް ދޫކޮށްލި ނަމަވެސް އެ ބަދަލުން ވެސް މިދިޔަ ހަފުތާގެ ރިޔާސީ އިންތިހާބު ބައިޑެންގެ ޕާޓީއަށް ކާމިޔާބެއް ނުވި އެވެ. މިއީ ގިނަ ބަޔަކަށް ހައިރާންކަން ލިބުނު ނަތީޖާއަކަށް ވިޔަސް ބައިޑެން ޓްރަމްޕަށް ދެންނެވީ ވެރިކަން ބަދަލުވުމުގެ މަރުހަލާ ފަސޭހަކަމާ އެކު ގެންދެވޭނެ ކަމަށް އުންމީދުކުރައްވާ ކަމަށެވެ.

ޓްރަމްޕް ވަނީ 2021 ވަނަ އަހަރު އެމެރިކާގެ ގާނޫނު ހަދާ މަޖިލިސްކުރާ ގެ، ކެޕިޓަލް. އަށް އޭނާގެ ސަޕޯޓަރުން ވައްދައި ބޮޑެތި ހަމަނުޖެހުންތައް ހިންގައިފަ އެވެ. އަދި ރިޔާސީ އިންތިޚާބުގެ ކެމްޕެއިން ވެސް ބައިބައިވުން ބޮޑުވާ ގޮތަށް ކުރިއަށް ގެންދެވި ނަމަވެސް ވައިޓް ހައުސްއަށް އެނބުރި ވަޑައިގަތުމަށް ފަހު ވާހަކަ ދެއްކެވީ ސުލްހަވެރިކަމުގެ ރާގުގަ އެވެ.

"ސިޔާސީ ކަންކަމަކީ އުނދަގޫ ކަމެއް. ގިނަ ހާލަތްތަކުގައި އެއީ މާ ރީތި ދުނިޔެއެއް ވެސް ނޫން. މިއަދު މި ފެންނަނީ ރީތި ދުނިޔެއެއް، އަޅުގަނޑު އެކަން ބަލައިގަންނަން،" ޓްރަމްޕް ވިދާޅުވި އެވެ.

ޓްރަމްޕް ވިދާޅުވީ ވެރިކަން ބަދަލުވުމުގެ މަރުހަލާ އަކީ "ވީހާވެސް އޮމާންކަމާ އެކު" ކުރިއަށް ގެންދަންޖެހޭ މަސައްކަތެއް ކަމަށެވެ. އެކަމަކު އޭނާ އެހެން ވިދާޅުވި އިރު ޖެނުއަރީ މަހުގެ 20 ވަނަ ދުވަހު ރައީސްކަމުގެ ހުވާ ކުރެއްވުމުގެ ކުރިން ޓްރާންސިޝަން ޓީމުން ސޮއިކުރަންޖެހޭ ގާނޫނީ ބައެއް މުހިންމު ލިޔުންތަކުގައި އަދި ހުރީ ސޮއި ނުކޮށެވެ.