މާނިއު މަގާމުން ވަކިކޮށް، ކަސްޓަމްސްގެ ވެރިއަކަށް ފުރަތަމަ ފަހަރަށް އަންހެން ބޭފުޅަކު އައްޔަން ކުރައްވައިފި

ކޮމިޝަނާ ޖެނެރަލް އޮފް ކަސްޓަމްސް ޔޫސުފް މާނިއު މުހައްމަދު އެ މަގާމުން ވަކި ކުރައްވައި، ފުރަތަމަ ފަހަރަށް ކަސްޓަމްސްގެ ވެރިއަކަށް އަންހެން ބޭފުޅަކު ރައީސް ޑރ. މުހައްމަދު މުއިއްޒު މިއަދު އައްޔަން ކުރައްވައިފި އެވެ.

މާނިއު އެ މަގާމުން ވަކިކުރެއްވުމަށް ފަހު، އަލަށް އައްޔަން ކުރެއްވީ ޑެޕިއުޓީ ކޮމިޝަނަރު އޮފް ކަސްޓަމްސްގެ މަގާމުގައި މިހާތަނަށް ހުންނެވި ފާތިމަތު ދިޔާނާ އެވެ. އޭނާއަށް މަގާމުގެ ފަތްކޮޅު ރައީސް އޮފީހުގައި މިއަދު ބޭއްވި ރަސްމިއްޔާތެއްގައި ރައީސް މުއިއްޒު ވަނީ ދެއްވައިފަ އެވެ.

މިއީ ކަސްޓަމްސްގެ ކޮމިޝަނާގެ މަގާމަށް އަންހެން ބޭފުޅަކު އައްޔަން ކުރެއްވި ފުރަތަމަ ފަހަރެވެ. ދިޔާނާ ކަސްޓަމްސްގައި މަސައްކަތް ކުރައްވާތާ 23 އަހަރު ވަނީ ވެފަ އެވެ.

ކަސްޓަމްސް އިން މާނިއު ވަކި ކުރެއްވުމަށް ފަހު، އޭނާ އައްޔަން ކުރެއްވީ ހޯމް މިިނިސްޓްރީގެ ސްޓޭޓް މިނިސްޓަރަކަށެވެ.

މާނިއުއަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި ނޭޝަނަލް އިންޓަގްރިޓީ ކޮމިޝަންގެ ރައީސްކަން ވެސް ކުރެއްވި ބޭފުޅެކެވެ. އޭނާ އޭރު މަގާމުން ވަކި ކުރައްވާފައި ވަނިކޮށް ކަސްޓަމްސްގެ ކޮމިޝަނާގެ މަގާމަށް އޭނާ އައްޔަން ކުރެއްވީ މިދިޔަ އަހަރުގެ ނޮވެމްބަރު މަހު އެވެ.