ޖަލުގައި ޑްރަގް ގެންގުޅުމުން އުމުރަށް ޖަލަށްލާން ހުކުމްކޮށްފި

މާފުށީ ޖަލުގައި ޑްރަގް ގެންގުޅުނު ގައިދީއަކު އުމުރަށް ޖަލަށްލާން ކްރިމިނަލް ކޯޓުން ހުކުމްކޮށްފި އެވެ.

މާފުށީ ޖަލުގައި ހުކުމް ތަންފީޒު ކުރަމުން ދަނިކޮށް ޖެނުއަރީ، 2016 ގައި ގައިދީއެއްގެ އަތުން މަސްތުވާތަކެތި ފެނުނީ އޭނާ ލައިގެން ހުރި ބޮކްސާގެ ތެރޭގައި ފޮރުވައިގެން އުޅެނިކޮށެވެ. ކަރެކްޝަންސްއިން ހިންގި އެ އޮޕަރޭޝަންގައި 30 ގްރާމަށް ވުރެ ގިނަ ޑައިމޯފިން ފެނިފައިވެ އެވެ.

ކްރިމިނަލް ކޯޓުން މިދިޔަ ބުރާސްފަތި ދުވަހު ކުރި ހުކުމުގައިވަނީ އޭނާ އެ ދައުވާއަށް އިންކާރުކުރި ނަމަވެސް މަސްތުވާތަކެތި ފެނުނީ އޭނާ ލައިގެން ހުރި ބޮކްސާގެ ތެރެއިން ކަމަށް ވާތީ އޭނާގެ ހަގީގީ ހިޔާޒަތުގެ ދަށުން މަސްތުވާތަކެތި ފެނުނުކަން ސާބިތުވާ ކަމަށެވެ. އަދި އެތަނުން މަސްތުވާތަކެތި ފެނުނު ކަމަށް އޭނާ އިންކާރު ނުކުރާއިރު، އެ ތަކެއްޗަކީ މަސްތުވާތަކެތި ކަން އޭނާއަށް އެނގޭކަން ސާބިތުވާތީ އޭނާގެ މައްޗަށް ކުށް ސާބިތުވާ ކަމަށް ހުކުމުގައިވެ އެވެ.

އެހެންވެ، ހުކުމުގައިވަނީ އޭނާ އުމުރަށް ޖަލަށްލުމާ އެކު އެއް ލައްކަ ރުފިޔާއިން ޖޫރިމަނާކޮށް، އެ ފައިސާ އެއް މަސް ތެރޭގައި ދައުލަތަށް ދެއްކުމަށެވެ.