ޔުނިވާސިޓީއަކަށް ބަދަލުކުރަން މުއްދަތަށް ވުރެ ބަލަންވީ ކޮލިޓީއަށް: އިދާރާތައް

ކޮލެޖްތައް ޔުނިވާސިޓީއަކަށް ބަދަލުކުރުމުގައި އެތަނެއް ހިންގާ މުއްދަތަށް ވުރެ ބޮޑަށް ފެންވަރު ރަނގަޅު ތައުލީމް ފޯރުކޮށްދޭތޯ ގާނޫނުގައި ކަށަވަރުކުރުން މުހިއްމު ކަމަށް ރާއްޖޭގެ މަތީ ތައުލީމާ ގުޅޭ އިދާރާތަކުން މިއަދު ބުނެފި އެވެ.

ގާނޫނުގައި މިހާރު އޮންނަ ގޮތުން، ޔުނިވާސިޓީއެއްގެ ދަރަޖަ ލިބޭނީ ކޮލެޖެއް ގޮތުގައި މެދުނުކެނޑި ހިންގާތާ 20 އަހަރު ވުމުންނެވެ. އެކަމަކު މި މުއްދަތު ކުރުކޮށް، މެދުނުކެނޑި ހިންގާތާ 15 އަހަރުވެފައިވާ ނަމަ ޔުނިވާސިޓީއަކަށް ބަދަލުކުރެވޭ ގޮތަށް ހަދަން މާފަންނު ދެކުނު ދާއިރާގެ މެމްބަރު އަބްދުﷲ ރިފާއު (ބޮޗޭ) ވަނީ ގާނޫނަށް އިސްލާހު ހުށަހަޅުއްވައިފަ އެވެ.

މި މައްސަލަ ދިރާސާކުރަަން ގައުމީ ތަރައްގީ އާއި ތަރިކައިގެ ކޮމިޓީއަށް ފޮނުވުމުން، ބާއްވާ ބައްދަލުވުންތަކަށް މިއަދު ވަނީ ކަމާގުޅޭ އިދާރާތައް ހާޒިރުކޮށްފަ އެވެ.

އެ ބައްދަލުވުމުގައި ހަޔާ އެޑިއުކޭޝަން މިނިސްޓަރު ޑރ. މަރްޔަމް މާރިޔާ ވިދާޅުވީ ކޮލެޖެއްގެ ގޮތުގައި ހިންގާތާ ވަކި މުއްދަތެއް ވުމުން، އެތަނެއް ޔުނިވާސިޓީއަކަށް ބަދަލުކުރެވޭ ގޮތަށް ހެދުމަކީ އެންމެ އެދެވޭ ގޮތެއް ކަމަށް ދެކެވަޑައިނުގަންނަވާ ކަމަށެވެ. މުއްދަތަށް ވުރެން މުހިއްމީ އެތަނުގައި ފެންވަރު ރަނގަޅު ތައުލީމެއް ދިނުން ކަން މިނިސްޓަރު ފާހަގަކުރެއްވި އެވެ.

"އަޅުގަނޑުމެންގެ ވިސްނުން ހުރީ 15 އަހަރަކީ ކޮލެޓީ ތައުލީމުދޭ އިންސްޓިޓިއުޓެއް ނުވަތަ ކޮލެޖެއް ނަމަ [ޔުނިވާސިޓީއަކަށް ބަދަލުކުރަން] ވިސްނަން،" މިނިސްޓަރު ވިދާޅުވި އެވެ.

ގާނޫނުގައި މުއްދަތެއް ކަނޑައަޅާ ނަމަ މުހިއްމު ކަމެއްގެ ގޮތުގައި، މިނިސްޓަރު ވިދާޅުވީ، މަތީ ތައުލީމާއި ތަމްރީނު ދިނުމުގައި ކޮލެޓީ ހިފަހައްޓަން ބާރުއަޅާ ގޮތަށް އިސްލާހު ގެންނަން ޖެހެ އެވެ.

މިނިސްޓަރު ވިދާޅުވި ގޮތުގައި އެ މިނިސްޓްރީން ބޭނުން ވަނީ ރާއްޖޭގެ އިންސްޓިޓިއުޓްތަކަކީ ކޮލެޓީ ތަންތަނަށް ހެދުމަށެވެ.

ހަޔާ އެޑިއުކޭޝަންގެ މި ހުށަހެޅުންތަކަށް ގައުމީ ޔުނިވާސިޓީ (އެމްއެންޔޫ) އިން ވެސް ތާއީދު ކުރި އެވެ.

އެމްއެންޔޫގެ ވައިސް ޗާންސެލަރު އައިޝަތު ޝެހެނާޒް އާދަމް ވިދާޅުވީ ކޮލެޖެއް، ޔުނިވާސިޓީއަކަށް ބަދަލުކުރާ ނަމަ ކިޔަވައިދޭ ކޯސްތަކުގެ 70 ޕަސެންޓް ވާން ޖެހޭނީ އެތަނެއްގެ އަމިއްލަ ކޯސްތަކަށް ކަމަށެވެ. އަދި އެތަނެއްގައި ކިޔަވައިދިނުމުގެ ޒިންމާއާ ހަވާލުވެ ތިބެން ޖެހޭނީ ދާއިމީ މުވައްޒަފުންނަށް ވާން ޖެހޭނެ ކަމަށް ވެސް އޭނާ ވިދާޅުވި އެވެ.

އިސްލާމިކް ޔުނިވާސިޓީ (އައިޔޫއެމް)ގެ ވައިސް ޗާންސެލަރު އައިޝަތު ވަހީދާ ވިދާޅުވީ 15 އަހަރުން ޔުނިވާސިޓީއަކަށް ބަދަލުކުރެވޭ ގޮތަށް ގާނޫނަށް ހުށަހަޅަން އުޅޭ އިސްލާހާ މެދު އެތަނުގެ ހިޔާލު ތަފާތު ކަމަށެވެ. ޔުނިވާސިޓީއެއްގެ ގޮތުގައި ހިންގަން އެންމެ ރަނގަޅު މުއްދަތަކީ 20 އަހަރު ކަމަށް ދެކެވަޑައިގަންނަވާ ކަމަށް އޭނާ ވިދާޅުވި އެވެ.

"މިހާރު ގެނެސްފައިވާ އިސްލާހުގައި އިންޑިކޭޓާ ތަކެއްލާން ބުނެފައި ވާތީ، އެ ބަދަލު ގެނެސްފި ނަމަ ގާނޫނު ވަރަށް އަވަހަށް ބަދަލުކުރަން ޖެހިދާނެ،" އޭނާ ވިދާޅުވި އެވެ.

މޯލްޑިވްސް ކޮލިފިކޭޝަން އޮތޯރިޓީގެ ސީއީއޯ މަރިޔަމް ފިޒާނާ ރަޝީދު ވިދާޅުވި ގޮތުގައި ގާނޫނަށް ގެންނަން އުޅޭ އިސްލާހާ މެދު އެ އޮތޯރިޓީން ވަނީ ފުޅާދާއިރާއެއްގައި މަޝްވަރާކޮށްފަ އެވެ. ކިޔަވައިދޭތާ 15 އަހަރުވުމުން، ޔުނިވާސިޓީއަކަށް ބަދަލުކުރެވޭ ގޮތަށް ހަދަން އެ އޮތޯރިޓީން ތާއީދު ނުކުރާ ކަމަށް އޭނާ ވިދާޅުވި އެވެ.

"ރާއްޖޭގެ ކިޔަވައިދިނުމުގެ ހާލަތަށް ރިއާޔަތްކޮށް އަހަރު މުހިންމު. އަޅުގަނޑު މި ސަޖެސްޓު ކުރަނީ ކުރިން އޮތް ގޮތަށް 20 އަހަރުގެ ގޮތުގައި ބާއްވަން. ނުވަތަ 15 އަހަރު ހަމަވުމުން ދެން އަންނަ ފަސް އަހަރަކީ ޔުނިވާސިޓީއަކަށް ބަދަލުވާން ދެން ފުރިހަމަ ކުރަން ޖެހޭ ކަންކަން ކުރާ އަހަރުތަކަށް ހަދަން،" ފިޒާނާ ވިދާޅުވި އެވެ.

ކަމާ ގުޅޭ އިދާރާތަކުގެ މި ހިޔާލުތައް އަޑު އެހުމަށް ފަހު މިއަދުގެ ކޮމިޓީ ނިންމާލީ އެހެން މުއައްސަސާތަކާ އެކު ވެސް އިތުރަށް މަޝްވަރާކޮށްގެން ގޮތެއް ނިންމަން އެއްބަސްވެގެންނެވެ.