ކޮރަޕްޝަންގެ ތުހުމަތުވާ މުވައްޒަފުން ވަގުތުން ވަޒީފާއިން ވަކިކުރެވޭ ގޮތަށް ހަދަން ސަރުކާރަށް ލަފާ ދެނީ

ކޮރަޕްޝަންގެ ތުހުމަތުވާ މުވައްޒަފުން ވަގުތުން ވަޒީފާއިން ވަކިކުރެވޭނެ ގޮތަށް ހެދުމަށްޓަކައި ދައުލަތުގެ ކުންފުނިތަކުގެ ހިއުމަން ރިސޯސަސް އޮނިގަނޑަށް ބަދަލު ގެންނަން ސަރުކާރަށް ލަފާދިނުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ފާސްކޮށްފި އެވެ.

އެ ކޮމިޓީން ބޭއްވި ބައްދަލުވުމުގައި މަޖިލީހުގެ ނައިބު ރައީސް އަހުމަދު ނާޒިމް ވިދާޅުވީ ކޮރަޕްޝަންގެ މައްސަލަތައް އޭސީސީއަށް ހުށަހަޅައި، އެ ކޮމިޝަނުން ތަހުގީގުކޮށް ނިމެންދެން ކުންފުނިތަކުގައި މުވައްޒަފުންނަށް މިހާރު ދެމިތިބެވޭ ކަމަށެވެ. އެހެންވުމުގެ ސަބަބުން ކުންފުނީގެ ތެރެއިން އިތުރު ކޮރަޕްޝަން ހިންގުމުގެ ފުރުސަތު އެ މުވައްޒަފުންނަށް މަގުފަހިވާ ކަމަށް އޭނާ ވިދާޅުވި އެވެ.

"އަޅުގަނޑުގެ ހުށަހެޅުމަކީ ކޮރަޕްޝަނަށް މަގުފަހިވާ ގޮތަށް ހިނގާ ކަންތައްތައް ހުޓުވުމަށްޓަކައި އެންޓި-ކޮރަޕްޝަން ކޮމިޝަނަށް މިގޮތަށް ފާހަގަވެގެން ސަރުކާރަށް ހުށަހެޅޭ ކަންތައްތައް އަމަލީ ފިޔަވަޅު އެޅޭނެ ގޮތަށް ކުންފުނިތަކުން ހިއުމަން ރިސޯސް ޕޮލިސީއާ އެއްޗެހި ބަދަލުކުރުމަށް ކުންފުނިތަކަށް ނުވަތަ ސަރުކާރަށް އެންގުން،" ނާޒިމް ވިދާޅުވި އެވެ.

ނާޒިމް ވިދާޅުވި ގޮތުގައި، ކުންފުންޏެއްގެ މެނޭޖިން ޑިރެކްޓަރަކު ކުންފުނީގެ ބޯޑަށް އޮޅުވާލައިގެން ހަތް މިލިއަން ޑޮލަރުގެ ހިޔާނާތަކަށް މަގުފަހިވާ ގޮތަށް ސެޓުލްމަންޓް އެގްރީމަންޓެއް ހަދާފައި އޮތް މައްސަލައެއް މިހާރު ވެސް އޭނާ އިންނަވާ އެހެން ކޮމިޓީއަކުން އަންނަނީ ބަލަމުންނެވެ.

"މިހާރު ވެސް އެ ކުންފުނީގައި ތިބޭނެ އެކަން ކުރި މީހުންނާއި އެކަމަށް ވާގިވެރިވި މީހުންނާއި އެކަމަށް ލަފާދިން މީހުންނާއި ބާރުއެޅި މީހުން. އެހެންވީމަ އެކަމުގައި ބައިވެރިވެފައި ތިބި މުވައްޒަފުން ކުންފުނީގައި ތިބުމަކީ ރަނގަޅު ގޮތެއް ނޫން،" ނާޒިމް ވިދާޅުވި އެވެ.

"މިހާރު" އަށް އެނގިފައިވާ ގޮތުގައި، އެއީ ސްޓެލްކޯގެ ކުރީގެ މެނޭޖިން ޑިރެކްޓަރު އަހްމަދު ޝަރީފްއާ ގުޅޭ މައްސަލައެކެވެ.

ނާޒިމް ވިދާޅުވީ ކޮރަަޕްޝަނަށް ތުހުމަތުވާ މައްސަލައެއް އޭސީސީއަށް ހުށަހަޅައި ތަހުގީގަށް އެ މީހަކު "ފްލެގުވާ" ހިސާބުން ކޮމިޝަނުން ސަރުކާރަށް އެކަން އެންގުމުން އެ މުވައްޒަފަކު ވަގުތުން ވަޒީފާއިން ވަކިކުރެވޭނެ ގޮތަށް ވަޒީފާގެ އޮނިގަނޑު ބަދަލު ގެންނަން ޖެހޭ ކަމަށެވެ.

ނާޒިމްގެ މި ހުށަހެޅުއްވުމަށް ހަނިމާދޫ ދާއިރާގެ އެމްޑީޕީގެ މެމްބަރު އަބްދުލްގަފޫރު މޫސާ (ގަޕޯ) ތާއިދުކުރައްވައި، ކޮމިޓީގެ އިއްތިފާގުން ވަނީ އެގޮތަށް ފާސްކޮށްފަ އެވެ.