ފުލުހުންގެ ޕްރޮމޯޝަންތައް މަޑުޖައްސާލަން އޭސީސީން އެންގި އެންގުމަށް ތަބާނުވީ ޕީޖީ އޮފީހުގެ ލަފަައަކަށް: ދައުލަތް

ފުލުހުންގެ ޕްރޮމޯޝަންތައް މަޑުޖައްސާލަން އެންޓި ކޮރަޕްޝަން ކޮމިޝަން (އޭސީސީ) އިން އެންގި އެންގުމަށް އަމަލު ނުކުރީ ޕްރޮސެކިއުޓާ ޖެނެރަލްގެ އޮފީހުން ދިން ލަފައަކަށް ބިނާކޮށް ކަމަށް ފުލުހުންގެ ފަރާތުން ހައި ކޯޓުގައި ބުނެފި އެވެ.

ފުލުހުންނަށް ޕްރޮމޯޝަން ދިނުން މަޑުޖައްސާލަން މިދިޔަ އަހަރުގެ ނޮވެމްބަރު މަހު އެންޓި ކޮރަޕްޝަން ކޮމިޝަން (އޭސީސީ) އިން އެންގި އެންގުމަށް ފުލުހުން ތަބާނުވުމުން އެ މައްސަލަ އެ ކޮމިޝަނުން އޮތީ ސިވިލް ކޯޓަށް ހުށަހަޅައިފަ އެވެ. އަދި އެ މައްސަލަ ނިމެންދެން ޕްރޮމޯޝަންތައް މަޑުޖައްސާލުމުގެ އަމުރަކަށް އޭސީސީން އެދުމުން ސިވިލް ކޯޓުން ނިންމީ އެފަދަ އަމުރެއް ނެރެދެވެން ނެތް ކަމަށެވެ. އެހެންވެ، އެ މައްސަލަ އޭސީސީން އޮތީ ހައި ކޯޓުގައި އިސްތިއުނާފްކޮށްފަ އެވެ.

ހައި ކޯޓުގައި އިއްޔެ ބޭއްވި އަޑުއެހުމުގައި އެޓާނީ ޖެނެރަލްގެ އޮފީހުގެ ވަކީލް ވިދާޅުވީ އޭސީސީގެ އެންގުމަށް ތަބާނުވާން ފުލުހުން ނިންމީ ޕްރޮސެކިއުޓާ ޖެނެރަލްގެ އޮފީހުން ދިން ލަފައަކަށް ބިނާކޮށް ކަމަށެވެ. އަދި އޭސީސީން ކޯޓަށް މައްސަލަ ހުށަހެޅީ އޭގެ ފަހުން ކަމަށް ވަކީލް ވިދާޅުވި އެވެ.

ފުލުހުންގެ އިދާރީ ކަންކަމުގައި ގާނޫނީ ލަފާ ދިނުމާއި ކޯޓުތަކުގައި ފުލުހުން ތަމްސީލު ކުރުމުގެ ބާރު އޮންނަނީ އޭޖީ އޮފީހުން ކަމަށް ވާއިރު، ފުލުހުންގެ ޕްރޮމޯޝަންގެ މައްސަލާގައި ޕްރޮސެކިއުޓާ ޖެނެރަލްގެ އޮފީހުގެ ގާނޫނީ ލަފާ ހޯދީ ކީއްވެގެންތޯ ބެންޗުން ސުވާލުކުރެއްވި އެވެ.

"ފުލުހުންގެ ހިދުމަތް ތަމްސީލުކުރަން ވަޑައިގަންނަވަނީ ބަންޑާރަ ނައިބު. މިހެން އޮންނަ ކަމެއްގައި ޕްރޮސެކިއުޓާ ޖެނެރަލްގެ ލަފައަކަށް އަހަން ޖެހުނީ ކީއްވެގެންތޯ،" ބެންޗުގައި ހިމެނިވަޑައިގަންނަވާ ފަނޑިޔާރު މުހައްމަދު ފައިސަލް ވިދާޅުވި އެވެ.

ޖަވާބުގައި ދައުލަތުގެ ވަކީލް ވިދާޅުވީ އެކަން އެގޮތަށް ކުރި ސަބަބެއް މިވަގުތު ސާފުނުވާ ކަމަށެވެ.

ދައުލަތުން ބުނި ގޮތުގައި ކަންކަން ހުއްޓުވުމުގެ ބާރު އޭސީސީގެ ގާނޫނުގައި އެ ކޮމިޝަނަށް ދީފައި ނެތް ކަމަށެވެ. އަދި ބޯޑާ ކޮންޓްރޯލް ސިސްޓަމްގެ މައްސަލާގައި 2012 ވަނަ އަހަރު ސުޕްރީމް ކޯޓުން ނިންމި މައްސަލާގައި ވެސް އެގޮތަށް ކަނޑައަޅާފައިވާތީ އެ ބާރު އެ ކޮމިޝަނަށް ނެތްކަން ސާފުވާ ކަމަށް ދައުލަތުން ބުންޏެވެ.

ދައުލަތުން ބުނީ ކޮރަޕްޝަނަށް މަގުފަހިވާ ކަންކަން ހުއްޓުވުމުގެ ބާރު އޭސީސީއަށް ލިބުނު ނަމަވެސް، ފުލުހުންގެ ޕްރޮމޯޝަންތަކުގެ މައްސަލާގައި ގޯސްކޮށް ހިނގި ކަމެއް އޭސީސީއަށް ބުނެދެވިފައިނުވާ ކަމަށެވެ. އަދި އޭސީސީގެ އެންގުން އައީ ސިޓީއަކުން ކަމަށް ވެސް ދައުލަތުން ބުންޏެވެ.

ޕްރޮމޯޝަންތައް ނުހުއްޓުވައިފި ނަމަ އިއާދަ ނުކުރެވޭނެ ގެއްލުމެއް ދައުލަތަށް ނުލިބޭނެތޯ ބެންޗުން ސުވާލު ކުރެއްވުމުން ދައުލަތުން ބުނީ ޕްރޮމޯޝަންތައް ގޯސްކޮށް ދީފައި ހުރިކަން ސާބިތުވެއްޖެ ނަމަ ޕްރޮމޯޝަންތައް އަތުލުމަށް ހުރަހެއް ނެތް ކަމަށެވެ.

އެގޮތަށް ދައުލަތުން ބުނުމުން، ޕްރޮމޯޝަންގެ ދަށުން ފުލުހުންނަށް ދީފައިވާ ހުރި މުސާރަތައް އަނބުރާ ހޯދޭނެތޯ ބެންޗުން ސުވާލު ކުރެއްވި އެވެ. ޖަވާބުގައި ދައުލަތުން ބުނީ އޭސީސީން ކޯޓުގައި އަމުރަކަށް އެދުނުއިރު ވެސް ޕްރޮމޯޝަންތަކުގެ މުސާރަތައް ދީފައިވާ ކަމަށެވެ.

ރައްދުގައި އޭސީސީގެ ވަކީލުން ބުނީ ތަހުގީގުތަކާ ގުޅިގެން އަޅަންޖެހޭ ފިޔަވަޅުތައް އެޅުމުގެ އެހެނިހެން ބާރުތައް އެ ކޮމިޝަނަށް ލިބިގެންވާ ކަމަށް އެ ކޮމިޝަންގެ ގާނޫނުގައި ބުނެފައިވާތީ ކަންކަން ހުއްޓުވުމުގެ ބާރު އެ ކޮމިޝަނަށް ލިބޭ ކަމަށް ބަލަންޖެހޭ ކަމަށެވެ.

އެހެންވެ، ޕްރޮމޯޝަންތައް މަޑުޖައްސާލައިފި ނަމަ ފުލުހުންނަށް ލިބޭނެ ގެއްލުމަށް ވުރެ ޕްރޮމޯޝަންތައް ދިނުމުން ދައުލަތަށް ލިބޭނެ މާލީ ގެއްލުން މާ ބޮޑު ކަމަށް ބުންޏެވެ. އަދި އެކަން ހުއްޓުވަން އަމުރެއް ނެރެ ނުދީފިނަމަ އޭސީސީގެ ނިންމުންތަކަށް ތަބާނުވުމަކީ އާންމު ކަމަކަށް ވެގެން ދާނެ ކަމަށް ވެސް އޭސީސީން ބުންޏެވެ.

އެ މައްސަލާގެ އިތުރު ކަމެއް ސާފުކުރަން ނެތް ނަމަ ދެން އޮންނާނީ ހުކުމް އިއްވުން ކަމަށް ފަނޑިޔާރުންގެ ބެންޗުން އިއުލާން ކުރެއްވި އެވެ.

އެ މައްސަލަ ހައި ކޯޓުން ބައްލަވަނީ ފަނޑިޔާރު މުހައްމަދު ޝަނީޒް އަބްދުﷲ އާއި ފަނޑިޔާރު މުހައްމަދު ފައިސަލާއި ފަނޑިޔާރު މުހައްމަދު ސަލީމެވެ. ބެންޗުގެ ރިޔާސަތަކީ ފަނޑިޔާރު ޝަނީޒެވެ.