ހުއްދަ ނެތި ޑޮލަރު މާރުކުރާ ދެ ތަނެއް ބަންދުކޮށްފި

ހުއްދަ ނެތި، ގާނޫނާއި ގަވައިދާ ހިލާފަށް ޑޮލަރު މާރުކުރާ ދެ ތަނެއް ބަންދުކޮށްފި އެވެ.

ފުލުހުން ބުނީ މި ދެ ތަން ބަންދުކުރީ ފުލުހުންގެ އިންޓެލިޖެންސާއި އިކޮނޮމިކް މިނިސްޓްރީން ގުޅިގެން ހިންގި ދެ އޮޕަރޭޝަނެއްގައި ކަމަށެވެ.

ފުލުހުން ބުނި ގޮތުގައި މި މަހުގެ ތިން ވަނަ ދުވަހު ހިންގި ފުރަތަމަ އޮޕަރޭޝަނުގައި ވަނީ "ޓްރާންސްފާ މޯލްޑިވްސް" ގެ ނަމުގައި ހުއްދަ ނެތި ބޭރު ފައިސާ މާރުކުރުމުގެ ވިޔަފާރިކުރަމުންދިޔަ ތަނެއް ހުއްޓުވައި، އެތަން ބަންދުކޮށްފަ އެވެ.

ދެވަނަ އޮޕަރޭޝަނުގައި މިއަދު ވަނީ އެމްއެމްއޭ އިން ހުއްދަ ނުނަގައި ގަވާއިދާ ހިލާފަށް ބޭރު ފައިސާގެ މުއާމަލާތް ކުރަމުންދިޔަ ސޮވެނިއާ ވިޔަފާރިކުރާ ތަނެއް ބަލައި ފާސްކޮށްފައި ކަމަށް ފުލުހުން ބުންޏެވެ.

އެއީ ޗާންދަނީ މަގުގައި ހުންނަ "ކާށި ބޯޓު ސްވެނިއާ" ފިހާރަ އެވެ.

ފުލުހުން ބުނި ގޮތުގައި އެތަނަކީ އެމްއެމްއޭ އިން ނަގަން ޖެހޭ ހުއްދަތައް ނުނަގައި ބޭރު ފައިސާ ގަނެ ވިއްކުމުގެ މަސައްކަތް ކުރަމުންދާ ތަނެކެވެ. އެހެންވެ، އެ ފިހާރައަށް ދޫކޮށްފައިވާ ވިޔަފާރިކުރުމުގެ ހުއްދަ ވަގުތީ ގޮތުން ބާތިލުކޮށްފައިވާ ކަމަށް ފުލުހުން ބުންޏެވެ.

އެ އޮޕަރޭޝަނުގައި ވަނީ ބޭރު ފައިސާ މާރުކުރުމުގެ ހިދުމަތްދޭ ބައެއް ތަންތަަން ބަލައިފާސްކޮށް، ރަނގަޅު ކުރަންޖެހޭ ކަންކަން ރަނގަޅުކުރުމަށް ވެސް އިރުޝާދުދީފައި ކަމަށް ފުލުހުން ބުންޏެވެ.