ގެސްޓް ހައުސް މާރާމާރީ: ދެމީހަކު ހައްޔަރުކޮށް، ޝަރީއަތް ނިމެންދެން ބަންދަށް

ވަރަށް ބޮޑަށް ޒަހަމްކޮށްލާފައި އޮއްވައި މާލޭގެ ގެސްޓް ހައުސަކުން މިދިޔަ ހޯމަ ދުވަހު ފެނުނު މީހާއަށް އަނިޔާކުރި ކަމުގެ ތުހުމަތުގައި ދެ މީހަކު ފުލުހުން މިއަދު ހައްޔަރުކޮށްފި އެވެ.

އެ މައްސަލައިގައި ހައްޔަރުކުރީ އަހްމަދު މާޒިން އިބްރާހިމް، 23، މއ. ވޮއްކޮޅުގެއާގެ، މާލެ އާއި ފައުޒާން ޒަރީރު، 23، ފެރިސް، ކ. ތުލުސްދު އެވެ.

ފުލުހުން ބުނީ ކޯޓު އަމުރެއްގެ ދަށުން އެ ދެ މީހުން ހައްޔަރުކުރީ، ޒަހަމްތަކަކާ އެކު އޮއްވައި ފެނުނު މީހާއާ މެދުގައި މާރާމާރި ހިންގި ކަމުގެ ތުހުމަތުގައި ކަމަށެވެ.

އެ ދެ މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ގެންދިއުމުން ޝަރީއަތް ނިމެންދެން ބަންދުކުރަން އަމުރުކޮށްފައިވާ ކަމަށް ފުލުހުން ބުންޏެވެ.

ފުލުހުން ކުރިން ބުނި ގޮތުގައި، ގެސްޓް ހައުސްއެއްގައި އުޅޭ ދިވެހި ފިރިހެނެއްގެ ހަބަރެއް ނުވެގެން އޭނާގެ ކޮޓަރިއަށް ފުލުހުން ވަދެ ބެލިއިރު ފެނުނީ ޒަހަމްކޮށްލާފައި އޮއްވަ އެވެ. އެ މީހާއަށް އައިޖީއެމްއެޗްގެ އައިސީޔޫގައި ފަރުވާދިނެވެ.

ސްޓްރެޗާއަކަށް އަރުވައިގެން އެ މީހާ ގެސްޓް ހައުސް އިން ނެރެގެން ހޮސްޕިޓަލަށް ގެންދާ މަންޒަރު ފެންނަ ވީޑިއޯއެއް ވެސް ސޯޝަލް މީޑިއާގައި އާންމުވި އެވެ. އެ ވީޑިއޯ އިން ފެންނަ ގޮތުގައި، އޭނާގެ މޫނު އޮތީ ވަރަށް ބޮޑަށް ދުޅަވެފަ އެވެ.