އާތިކާގެ މައްސަލަ ރަސްމީކޮށް ހުށަހަޅާފައެއް ނެތް، އެއީ ފަރުވާތެރި މުވައްޒަފެއް: މިނިސްޓަރު

ދިވެހިބަހާއި ސަގާފަތާ ބެހޭ މިނިސްޓްރީގެ އެކްޓިން ޕީއެސް އާތިކާ އިބްރާހިމް އިސްވެ ހުންނަވައިގެން އެތަނުގެ ސިވިލް ސާވިސް މުވައްޒަފުންނަށް ޖެއްސުންކޮށް ބުލީކުރާ މައްސަލަ ރަސްމީ ސިފައެއްގައި ހުށަހަޅާފައި ނުވާ ކަމަށް މިނިސްޓަރު އާދަމް ނަސީރު މިއަދު ވިދާޅުވެއްޖެ އެވެ.

އާތިކާގެ މައްސަލައަކީ، ދިވެހިބަހާއި ސަގާފަތާ ބެހޭ މިނިސްޓްރީގެ 22 މުވައްޒަފަކު ސޮއިކޮށް، ސިވިލް ސާވިސް ކޮމިޝަން (ސީއެސްސީ) އަށް ހުށަހެޅި ޕެޓިޝަނަކާ ގުޅިގެން ބަލަމުންދާ މައްސަލައެކެވެ. ރައީސް އޮފީހުގައި މިއަދު ހަވީރު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ އެ މައްސަލައާ ގުޅިގެން މިނިސްޓްރީގެ ބަހަކީ ކޮބާތޯ ސުވާލުކޮށްފަ އެވެ.

އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ އާތިކާގެ މައްސަލަ ރަސްމީކޮށް ހުށަހަޅާފައި ނުވާ ކަމަށެވެ.

"އެންމެ ކުރުކޮށް ދަންނަވަންޏާ މިނިސްޓްރީއަށް ތިކަން ރަސްމީކޮށް އެނގިފައެއް ނެތް. އަޅުގަނޑާ ހަމައަށް ތިކަމާ ބެހޭ އެއްވެސް މައްސަލައެއް ހުށަހެޅިފައެއް ނެތް،" މިނިސްޓަރު ވިދާޅުވި އެވެ.

މިނިސްޓަރު ވިދާޅުވި ގޮތުގައި މައްސަލަ ހުރި ކަމަށް ބުނާ މުވައްޒަފަކީ ވެސް އެ މިނިސްޓްރީގެ މަސައްކަތްތައް ވަރަށް ފަރުވާތެރިކޮށް އަދި ރަނގަޅަށް ކުރާ މުވައްޒަފެކެވެ.

"މިނިސްޓްރީގެ މަސައްކަތްތައް ވަރަށް ބުރަކޮށް ވަރަށް ޒިންމާދާރުކޮށް ކުރައްވާ އެތައް ބޭފުޅުންނެއް އެބަ ތިއްބެވި. ދެން ވަކި ބޭފުޅަކަށް އަމާޒުވެފަ އޮތީމަ އޭނާއާ ގުޅޭ ގޮތުން ވެސް ދަންނަވަން އޮތީ ވަރަށް ބުރަކޮށް ހަވާލުކުރާ ކޮންމެ މަސައްކަތެއް ގަޑިއަށް ނިންމަވާ ފަރުވާތެރި މުވައްޒަފެކޭ. ރަނގަޅަށޭ މަސައްކަތް ކުރައްވަމުން ގެންދަވަނީ."

މިނިސްޓަރު އެގޮތަށް ވިދާޅުވިއިރު ރައީސް އޮފީހުގެ ޕްރެސްގައި މިއަދު އާތިކާ ވެސް ބައިވެރިވެވަޑައިގަތެވެ. އަދި އެ މިނިސްޓްރީން ފާއިތުވި ދުވަސްތަކުގައި ކޮށްފައިވާ މަސައްކަތްތައް އެ ޕްރެސްގައި އޭނާ ހިއްސާކުރެއްވި އެވެ.

އެ މިނިސްޓްރީގެ ސިވިލް މުވައްޒަފުންގެ ޕެޓިޝަންގައި ބުނީ އެ ޕެޓިޝަން ހުށަހަޅަން މަޖުބޫރުވީ މިނިސްޓްރީގެ ވެރިންގެ ގޮތުގައި ސީއެސްސީން ކަނޑައަޅާފައިވާ ބައެއް ވެރިން، ހާއްސަކޮށް، އާތިކާ އެ ތަނުގެ މުވައްޒަފުންގެ ހައްގުތަކަށް ބެލުމެއް ނެތި، އުސޫލުތަކުގެ ބޭރުން، ވަޒީފާގެ މަސްއޫލިއްޔަތުތަކަށް ރިއާޔަތް ކުރުމެއް ނެތި ބުލީކުރުމުގެ އުސޫލުން ކަންކަން ކުރާތީ ކަމަށެވެ. އަދި އެ ވަގުތަކު ބޭނުންވާ މީހަކު ލައްވައި ބޭނުން ކަމެއް ކުރުވަމުން ގެންދިއުމުގެ ސަބަބުން، މަސައްކަތުގެ މާހައުލުގައި ނުތަނަވަސްކަމާއި ރުޅިވެރިކަމާއި ހިތްހަމަނުޖެހުން އުފެދި ވަޒީފާގެ މަސްއޫލިއްޔަތުތައް އަދާކުރަން ދަތިވާ ހިސާބަށް އޮފީހުގެ ކަންކަން ބޮއްސުންލާފައިވާ ކަމަށް ޕެޓިޝަނުގައިވެ އެވެ.

މިދިޔަ މަހުގެ 29 ގައި އެކްޓިން ޕީއެސްއަކަށް އާތިކާ ހަމަޖެއްސިއިރު، މުވައްޒަފުންގެ ތުހުމަތުތަކާ ގުޅިގެން "މިހާރު" އިން އޭނާއަށް ސުވާލުކުރުމުން ވެސް ޖަވާބެއް ނުދެ އެވެ.