އާތިކާގެ މައްސަލަ ބޮޑުވެފައި ވަނިކޮށް، ދިވެހި ބަހުގެ މިނިސްޓްރީ އަށް އާ ޕީއެސްއެއް

ދިވެހި ބަހާއި ސަގާފަތާ ބެހޭ މިނިސްޓްރީގެ އެކްޓިން ޕާމަނަންޓް ސެކްރެޓަރީ އާތިކާ އިބްރާހިމް އިސްވެ ހުންނަވައި، އެ ތަނުގެ ސިވިލް މުވައްޒަފުންނަށް ޖެއްސުންކޮށް، ބުލީކުރާ ކަމަށް ބުނާ މައްސަލަތަކެއް ފެންމަތިވެފައިވަނިކޮށް، އެ މިނިސްޓްރީ އަށް އާ ޕާމަނަންޓް ސެކްރެޓަރީ (ޕީއެސް) އެއް ސިވިލް ސާވިސް ކޮމިޝަން (ސީއެސްސީ) އިން މިއަދު ހަމަޖައްސައިފި އެވެ

އެ ކޮމިޝަނުން ބުނީ އެ މިނިސްޓްރީގެ ޕީއެސް އަކަށް މުހައްމަދު ޔާނިއު ހާޝިމް އައްޔަން ކޮށްފައިވާ ކަމަށެވެ.

އޭނާ ކުރިން ވަނީ ހައުސިން މިނިސްޓްރީ އަދި އިސްލާމިކް ޔުނިވާސިޓީގައި ވެސް މަސައްކަތް ކުރައްވައިފަ އެވެ.

ދިވެހި ބަހުގެ މިނިސްޓްރީގައި ކުރިން ޕީއެސްއަކަށް ހުންނެވީ ޝަމްއޫން ހަމީދެވެ. ނަމަވެސް، އޭނާގެ ފަސް އަހަރުގެ ދައުރު މިދިޔަ މާޗު މަހު ވަނީ ހަމަވެފަ އެވެ.

އެހެންވެ، އޭގެ ފަހުން އެ ދައުރު ފުރުއްވަމުން ގެންދެވީ ޑިރެކްޓަ ޖެނެރަލް އަކަށް ހުންނެވީ އާތިކާ އެވެ. ނަމަވެސް، އޭނާގެ އަމަލުތައް ހުންނަ ގޮތާ މެދު ހިތްހަމަނުޖެހި، ސިވިލް ސާވިސް މުވައްޒަފުންތަކެއް ވަނީ ސީއެސްސީ އަށް ޕެޓިޝަން ހުށަހަޅައިފަ އެވެ.

އެ ޕެޓިޝަންގައި ހުށަހަޅަން މަޖުބޫރުވީ މިނިސްޓްރީގެ ވެރިންގެ ގޮތުގައި ސީއެސްސީން ކަނޑައަޅާފައިވާ ބައެއް ވެރިން، ހާއްސަކޮށް އާތިކާ އެ ތަނުގެ މުވައްޒަފުންގެ ހައްގުތަކަށް ބެލުމެއް ނެތި، އުސޫލުތަކުގެ ބޭރުން އަދި ވަޒީފާގެ މަސްއޫލިއްޔަތުތަކަށް ރިއާޔަތް ކުރުމެއް ނެތި ބުލީކުރުމުގެ އުސޫލުން ކަންކަން ކުރަމުން ގެންދާތީ ކަމަށް ޕެޓިޝަންގައި އެވެ.

ބުލީކޮށް، އެ ވަގުތަކު ބޭނުންވާ މީހަކު ލައްވައި ބޭނުން ކަމެއް ކުރުވަމުން ގެންދިއުމުގެ ސަބަބުން، މަސައްކަތުގެ މާހައުލުގައި ނުތަނަވަސްކަމާއި ރުޅިވެރިކަމާއި ހިތްހަމަނުޖެހުން އުފެދި ވަޒީފާގެ މަސްއޫލިއްޔަތުތައް އޮޅުންބޮޅުންވެ، މަސައްކަތްކުރަން ދަތިވާ ހިސާބަށް އޮފީހުގެ ކަންކަން ބޮއްސުންލާފައިވާ ކަމަށް ވެސް ޕެޓިޝަންގައި ބުންޏެވެ.

އެކަމަކު، ޕެޓިޝަން ހުށަހެޅުމުން ވެސް ހައްލެއް ނުލިބި، ކުރިއަށް ވުރެ ކަންތައްތައް މާ ބޮޑަށް ގޯސްވުމުން، އެ މިނިސްޓްރީގެ މުވައްޒަފުންތަކެއް ވަނީ ރައީސް ޑރ. މުހައްމަދު މުއިއްޒާ ބައްދަލުކުރަން މިދިޔަ މަހު ރައީސް އޮފީހުގައި އެދިފަ އެވެ.

ދިވެހި ބަހާއި ސަގާފަތާ ބެހޭ މިނިސްޓްރީން މިދިޔަ މަހު ބޭއްވި ޕްރެސް ކޮންފަރެންސްގައި މިނިސްޓަރު އާދަމް ނަސީރު ވިދާޅުވީ މައްސަލަ ހުރި ކަމަށް ބުނާ މުވައްޒަފަކީ ވެސް އެ މިނިސްޓްރީގެ މަސައްކަތްތައް ވަރަށް ފަރުވާތެރިކޮށް އަދި ރަނގަޅަށް ކުރާ މުވައްޒަފެކެވެ.

އާތިކާގެ މައްސަލަ ރަސްމީކޮށް ހުށަހަޅާފައިނުވާ ކަމަށް އާދަމް ނަސީރު ވިދާޅުވެފައި ވެ އެވެ.