އިޓާލިއާ 90ގެ ތަރި ސްކިލާޗީ މަރުވެއްޖެ

އިޓަލީގައި 1990 ވަނަ އަހަރު ބޭއްވި ވޯލްޑް ކަޕުގެ މޮޅު ކުޅުންތެރިޔާގެ މަގާމާއި، ރަންބޫޓު ހޯދި އިޓަލީގެ ފޯވާޑް ސަލްވަތޯރޭ ސްކިލާޗީ އުމުރުން 59 އަހަރުގައި މިއަދު މަރުވެއްޖެ އެވެ.

އޭނާ މަރުވީ ޕަލާމޯގެ ސިވިކޯ ހޮސްޕިޓަލުގައި ކޮލޯން ކެންސަރަށް ފަރުވާ ހޯދަމުން އަންނަނިކޮށެވެ. އޭނާގެ ހާލަތު މީގެ ދުވަސްތަކެއް ކުރިން ރަނގަޅުވި ނަމަވެސް ހާލު ދެރަވުމުން އަނެއްކާ ވެސް އެޑްމިޓްކުރީ އެވެ. ރިޕޯޓްތައް ބުނާ ގޮތުގައި އޭނާގެ ހަށިގަނޑުން ކެންސަރު ފިލުވާލެވުނު ނަމަވެސް، އަނެއްކާ ވެސް އޭގެ އަސަރުތައް ފާހަގަވީ ކަމަށެވެ.

އޭނާ މަރުވުމުން އިޓަލީ ފުޓްބޯޅަ ފެޑެރޭޝަނާއި، އެ ގައުމުގެ ކްލަބްތަކުގެ އިތުރުން ފުޓްބޯޅަ އަށް ލޯބިކުރާ ގިނަ ބަޔަކު އަންނަނީ ހިތާމަފާޅުކުރަމުންނެވެ.

އިޓަލީގެ ފަގީރު ހިސާބަކަށް އުފަން ސްކިލާޗީ އިޓަލީ ލީގުގައި ފުރަތަމަ ފަހަރަށް މެޗެއް ކުޅުނުތާ އަހަރެއް ވެސް ނުވަނީސް، 1990 ވަނަ އަހަރުގެ ވޯލްޑް ކަޕް ސްކޮޑުން އޭނާ އަށް ފުރުސަތު ދިނުމުން ގިނަ ބަޔަކު ހައިރާންވި އެވެ. އޭރު އެ ޓީމުގައި ހުނަރުވެރި ފޯވާޑުން ތިބުމުން ބެލެވުނީ އޭނާ އަށް ކުޅެން ފުރުސަތު ވެސް ނުލިބޭނެ ކަމަށެވެ.

އެކަމަކު ފުރަތަމަ މެޗުގައި އޮސްޓްރިއާއާ ދެކޮޅަށް އިޓަލީ ކުޅުނުއިރު ފޯވާޑުންނަށް އަނިޔާގެ މައްސަލަތައް ދިމާވުމުން 75 ވަނަ މިނެޓުގައި އެރުވި އެވެ. އޭނާ އެރިތާ ދެ މިނެޓު ނުވަނީސް ލަނޑު ޖަހައި އިޓަލީ މޮޅުކޮށްދިނެވެ. އޭގެ ފަހުން ފުރަތަމަ އެގާރައިން ފުރުސަތު ލިބެން ފެށި އެވެ. އޭނާ ވަނީ ގްރޫޕް ސްޓޭޖުގައި ޗެކްސްލޮވާކިއާ ކޮޅަށާއި، ނޮކްއައުޓް ބުރުގައި އުރުގުއޭ، އަޔަލެންޑް، އަދި އާޖެންޓީނާ ކޮޅަށް ވެސް ގޯލް ޖަހައިފަ އެވެ. އަދި ތިން ވަނަ ހޮވި މެޗުގައި އިންގްލެންޑް އަތުން 2-1 އިން އިޓަލީ މޮޅުކޮށްދިނީ ވެސް ސްކިލާޗީ އެވެ.

ނަތީޖާއަކަށްވީ ވޯލްޑް ކަޕުގެ މޮޅު ކުޅުންތެރިޔާގެ މަގާމާއި، ރަންބޫޓު އޭނާ އަށް ލިބުމުންނެވެ. ޔުވެންޓަސް އާއި އިންޓަ މިލާނަށް ކުޅުނު ސްކިލާޗީ، އަށް އޭގެ ފަހުން އިޓަލީ ގައުމީ ޓީމުން ފުރުސަތު ލިބުނީ 1991 ގަ އެވެ. އޭނާ ވެފައިވަނީ އެންމެ މަދު މެޗެއް ކުޅެގެން އެންމެ ބޮޑު ތަފާތެއް ދެއްކި އިޓަލީ ކުޅުންތެރިޔާ އަށެވެ.