އަލަންނާ އާއިލާއާ އެކު ރަންގަލި ރިސޯޓުގައި

އިންޑިއާގެ އިންޓަނެޓް ޕާސަނަލިޓީ އަލަންނާ ޕާންޑޭ އާއިލާއާ އެކު ޗުއްޓީއަށް ރާއްޖެ އަތުވެއްޖެ އެވެ.

އޭނާ ޗުއްޓީ ހޭދަކުރަމުން އަންނަނީ އދ. އަތޮޅުގައި އޮންނަ ލަގްޒަރީ ރިސޯޓް ކޮންޑްރަޑް މޯލްޑިވްސްގެ ރަންގަލި އައިލެންޑުގަ އެވެ. ނަމަވެސް އޭނާ ރާއްޖެ އައީ ސީދާ ކޮން ދުވަހަކު ކަމެއް އަދި ނޭނގެ އެވެ.

އެ ރިސޯޓުގައި ހުންނަ މޫދު އަޑީގެ ރެސްޓޯރެންޓުގައި ނަގާފައިވާ ވީޑިއޯއެއް އަލަންނާ ވަނީ އިއްޔެ އިންސްޓަގްރާމްގައި ހިއްސާކޮށްފަ އެވެ. އެ ވީޑިއޯގައި އޭނާއާ އެކު ދަރިފުޅު ވެސް ފެނެ އެވެ. އޭނާ ވިހެއީ މިދިޔަ އޮގަސްޓް މަހު އެވެ.

އަލަންނާގެ ދެމައިންނާ އެކު އޭނާގެ ފިރިމީހާ އައިވޯ މެކްކްރޭ ވީ ވެސް މި ދަތުރުގައި ބައިވެރިވެ އެވެ.

އައިވޯ އާއި އަލަންނާ އެންގޭޖުވީ ވެސް ރާއްޖޭގަ އެވެ. އެއީ ނޮވެމްބަރު 5، 2021 ގަ އެވެ.

އަލަންނާ އަކީ ބޮލީވުޑްގެ މަޝްހޫރު އެކްޓްރެސް އަނަންޔާ ޕާންޑޭގެ ކަޒިންއެކެވެ. އަދި މިހާރު ބޮލީވުޑަށް ތައާރަފުވާން އުޅޭ އާ އެކްޓަރު އާހާން ޕާންޑޭގެ ދައްތަ އެވެ.