ހައްޔަރުކުރި މީހާ އޮތީ ޓްރަމްޕް އަވަހާރަކޮށްލަން ބޭނުންވާ ކަމަށް ބުނެ ނޯޓެއް ލިޔެފައި

އެމެރިކާގެ ކުރީގެ ރައީސް ޑޮނަލްޑް ޓްރަމްޕް އަވަހާރަކޮށްލަން ޓްރަމްޕްގެ ގޮލްފް ކޯސް ކައިރީގައި ފިލައި އޮއްވައި އަތުލައިގަތް މީހާ، އޭނާގެ މަގްސަދަކީ ޓްރަމްޕް އަވަހާރަކޮށްލުން ކަމަށް ބުނެ މީގެ ދުވަސްތަކެއް ކުރިން ލިޔެފައިވާ ނޯޓެއް އޮތް ކަމަށް އޭނާއާ ދެކޮޅަށް ކޯޓަށް ހުށަހެޅި ލިޔުންތަކުގައި ބުނެފި އެވެ.

"މިއީ ޓްރަމްޕް މަރާލުމުގެ ބޭނުމުގައި ކުރާ މަސައްކަތެއް،" ނޯޓްގައިވެ އެވެ.

މިދިޔަ ހޯމަ ދުވަހު ކޯޓަށް ހުށަހެޅި ލިޔުންތަކުގައި ޕްރޮސެކިއުޓަރުން ބުނެފައި ވަނީ ސެޕްޓެމްބަރު މަހުގެ 15 ވަނަ ދުވަހު ފްލޮރިޑާގައި ހިނގި ހާދިސާގެ އެތައް މަހެއް ކުރިން އެ ސިޓީ ނުވަތަ ނޯޓް ފެނިފައިވަނީ މައްސަލައިގައި ހެއްކެއްގެ ގޮތުގައި ހުށަހަޅާފައިވާ މީހެއްގެ ގޭތެރެއަށް ވައްޓާލާފައި އޮއްވައި ކަމަށެވެ.

އުމުރުން 58 އަހަރުގެ ރަޔަން ރައުތުގެ މައްޗަށް، ޓްރަމްޕް އަވަހާރަކޮށްލަން އުޅުމުގެ އިތުރުން އެހެން ދައުވާތަކެއް ވެސް ކުރެ އެވެ.

ކުރިން ލިޔެފައިވާ މި ނޯޓުގައި ވަނީ ޓްރަމްޕް އަވަހާރަކޮށްލަން ކުރި މަސައްކަތެއް ނާކާމިޔާބު ވުމުން އެ ވާހަކަ ކަމަށް ބެލެވެ އެވެ. "އަހަންނަށް ކުރެވެން ހުރި ކަމެއް ކޮށްފިން. ލިބެން ހުރި ހުރިހާ ވަސީލަތެއް ބޭނުންކޮށްފިން،" ނޯޓްގައިވެ އެވެ.

މި ސިޓީ ހުށަހަޅާފައިވަނީ ކޯޓު މަރުހަލާ ފެށުމުގެ ކުރިން ރައުތު ބަންދުގައި ބަހައްޓަންޖެހޭ ސަބަބު ބަޔާންކޮށް އެކަމުގެ ހެކީގެ ގޮތުގަ އެވެ. ކޯޓު ލިޔުންތަކުގައި ބުނެފައި ވަނީ އެ ސިޓީގެ އިތުރުން ހަތިޔާރާއި އިމާރާތް ކުރުމަށް ބޭނުންކުރާ ސާމާނާއި ހަތަރު ފޯނު އޮތް ފޮއްޓެއް އެ ހާދިސާ ހިނގުމުގެ ކުރިން ހެކިވެރިޔާގެ ގެއަށް ލާފައިވާ ކަމަށެވެ.

މިދިޔަ ސެޕްޓެމްބަރު މަހުގެ 15 ވަނަ ދުވަހު ރައުތު ހައްޔަރުކުރި ފަހުން އޭނާ ދުލެއް ނުކުރެ އެވެ.

ވެސްޓް ޕާމް ބީޗުގައި ހުންނަ ޓްރަމްޕްގެ ގޮލްފް ކޯހުގައި ހުރި ގަސްތަކެއްގެ ތެރޭ ރައުތު އޮއްވައި ސީކްރެޓް ސާވިސްގެ އެޖެންޓަކަށް ފުރަތަމަ ފެނުނީ މޫނު ކަމަށާއި އޭނާ އަތުގައި އޮތް ބަޑި ފެނުނީ ފަހުން ކަމަށް ޕްރޮސިކިއުޓަރުން ވަނީ ބުނެފަ އެވެ.

ފޯނުގެ ރެކޯޑްތަކުން ދައްކާ ގޮތުގައި އޮގަސްޓް މަހުގެ 18 ވަނަ ދުވަހުން ފެށިގެން ސެޕްޓެމްބަރު މަހުގެ 15 ވަނަ ދުވަހާ ދެމެދު ގާތްގަނޑަކަށް މަހެއްހާ ދުވަސް ވަންދެން ރައުތު އުޅުނީ ޓްރަމްޕްގެ މާ-އަ-ލާގޯ ރިސޯޓް ކައިރީގަ އެވެ.