ރައީސް، ސައޫދީ އަދި އޮމާންގެ ފޮރިން މިނިސްޓަރާ ބައްދަލުކުރައްވައިފި

ރައީސް ޑރ. މުހައްމަދު މުއިއްޒު ސައުދީ އަރަބިއްޔާ އަދި އޮމާންގެ ފޮރިން މިނިސްޓަރާ އިއްޔެ ބައްދަލުކުރައްވައިފި އެވެ.

ރައީސް އޮފީހުން ބުނީ އެމެރިކާގެ ނިއު ޔޯކުގައި ކުރިއަށް ގެންދާ އދ.ގެ އާންމު މަޖިލީހުގެ 79 ވަނަ ބައްދަލުވުމުގެ ހަވާސާގައި ސައުދީގެ ފޮރިން މިނިސްޓަރު ޕްރިންސް ފައިސަލް ބިން ފަރްހާދް އަލް-ސައޫދްއާ ރައީސް މުއިއްޒު އިއްޔެ ބައްދަލުކުރެއްވި ކަމަށެވެ.

ސައުދީގެ ފޮރިން މިނިސްޓަރަކީ އާންމު މަޖިލީހުގެ ބައްދަލުވުމުގައި ބައިވެރިވާ ސައުދީގެ ވަފުދުގެ އިސްވެރިޔާ އެވެ.

އެ ބައްދަލުކުރެއްވުމުގައި ރައީސް މުއިއްޒު ވަނީ ރާއްޖެ އާއި ސައުދީއާ ދެމެދުގައި އޮންނަ ގާތް ގުޅުން ފާހަގަކުރައްވައި ރާއްޖޭގެ ތަރައްގީއަށް އެ ގައުމުން މެދުކެނޑުމެއްނެތި ދޭ އެހީތެރިކަމަށް ޝުކުރު އަދާކުރައްވައިފަ އެވެ. ފިސްކަލް ރިފޯމާއި ތައުލީމާއި ސިއްހަތާއި އިގުތިސާދީ ތަރައްގީ އާއި ހައްޖުގެ އަޅުކަމާއި އަދި އެ ނޫން ވެސް ދާއިރާތަކުން ރާއްޖެއަށް ބޭނުންވާ އެހީތެރިކަން ރައީސް ސައުދީގެ ފޮރިން މިނިސްޓަރާ ހިއްސާކުރެއްވި އެވެ.

ސައޫދީގެ ފޮރިން މިނިސްޓަރު ވަނީ އެ ގައުމުން ރާއްޖެއަށް ދޭ އެހީތެރިކަން އެ ގޮތުގައި ކުރިއަށް ގެންދާނެ ކަމުގެ ޔަގީންކަން ދެއްވައިފަ އެވެ.

އޮމާންގައި އެދިވަޑައިގަތީ ބަޖެޓް ސަޕޯޓަށް

އާންމު މަޖިލީހުގެ 79 ވަނަ ބައްދަލުވުމުގެ ހަވާސާގައި ރައީސް ވަނީ އިއްޔެ އޮމާންގެ ފޮރިން މިނިސްޓަރު އަދި އެ ބައްދަލުވުމުގައި އެ ގައުމުގެ ފަރާތުން ބައިވެރިވާ ވަފުދުގެ އިސްވެރިޔާ ސައްޔިދު ބިން ހަމަދް ބިން ހަމޫދް އަލްބުސައިދީއާ ވެސް މަޝްވަރާތައް ކުރައްވައިފަ އެވެ.

އެ ބައްދަލުކުރެއްވުމުގައި ދިވެހި ސަރުކާރުގެ ތަރައްގީގެ އެޖެންޑާ އޮމާންގެ ފޮރިން މިނިސްޓަރާ ރައީސް މުއިއްޒު ހިއްސާކުރެއްވި ކަމަށާއި އެ ގައުމުން ދޭ އެހީތެރިކަމަށް ވެސް ޝުކުރު އަދާކުރެއްވި ކަމަށް ރައީސް އޮފީހުން ބުންޏެވެ.

"މީގެ އިތުރުން އެމަނިކުފާނު ވަނީ ބަޖެޓް ސަޕޯޓާއި އިންފްރާސްޓްރަކްޗާ ތަރައްގީކުރުމާއި ޓީޗަރުން ތަމްރީނުކުރުމާއި އިންސާނީ ވަސީލަތް ތަރައްގީކުރުން ފަދަ ރާއްޖެއަށް އިތުރު އެހީތެރިކަން ބޭނުންވާ ދާއިރާތައް ފާހަގަކުރައްވައިފަ އެވެ،" ރައީސް އޮފީހުން ބުންޏެވެ.

ރައީސް އެމެރިކާއަށް ކުރައްވާ ފުރަތަމަ ރަސްމީ ދަތުރުފުޅުގައި އެކި ގައުމުތަކާއި ބައިނަލްއަގުވާމީ ޖަމިއްޔާތަކުގެ އިސްވެރިންނާ އަންނަނީ ބައްދަލުކުރައްވަމުންނެވެ.