ފެނަކައަށް ގެއްލުން ވާތީ 16 ރަށެއްގެ ނަރުދަމާ ޕްރޮޖެކްޓް ބާތިލްކޮށްފި، 170 މިލިއަން ގެއްލުން!

ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ފެނަކައާ ހަވާލުކުރި 16 ރަށެއްގެ ނަރުދަމާގެ ޕްރޮޖެކްޓްގެ މަސައްކަތްތައް އެއްބަސްވި ގޮތަށް ކުރިއަށް ނުގެންދާތީ، ކޮންސްޓްރަކްޝަން މިނިސްޓްރީއާ ދެމެދު ހެދި އެއްބަސްވުން ބާތިލްކޮށްފި އެވެ.

ފެނަކައިން މިއަދު ބޭއްވި ނޫސްވެރިންގެ ބައްދަލުވުމުގައި އެ ކުންފުނީގެ ޑިރެކްޓަރު އަބްދުލް ވާހިދު މުހައްމަދު ވިދާޅުވީ، ޓާމިނޭޝަންގެ މަސައްކަތްތައް ވަރަށް ބާރަށް ކުރިއަށް ގެންދާ ކަމަށެވެ. އޭނާ ވިދާޅުވީ، އެ ޕްރޮޖެކްޓަށް މިހާތަނަށް އެޑްވާންސް ފައިސާގެ ގޮތުގައި 518 މިލިއަން ރުފިޔާ ދޫކޮށްފައިވައިރު، ހޭދަކޮށްފައިވަނީ 92 މިލިއަން ރުފިޔާ ކަމަށެވެ.

"އެ ފައިސާ އެންމެ ރަނގަޅަކަށް ނޫން ޕްރޮޖެކްޓްގައި ބޭނުން ކުރެވިފައި ހުރީ. ޔަގީންކަމާ އެކު ދަންނަވާކަށް ނޭނގޭ. ހިސާބު ކިތާބު ބެލެހެއްޓިފައެއް ނެތް،" އޭނާ ވިދާޅުވި އެވެ.

ވާހިދު ވިދާޅުވީ، ފެނާއި ނަރުދަމާގެ އެހާ ބޮޑު މަސައްކަތެއް ފެށިއިރު، އެ ކުންފުނީގައި އެކަމަށް ބޭނުންވާ މެޝިނަރީތައް ނެތް ކަމަށެވެ. އެކްސްކަވޭޓަރާއި ލޮރީ އާއި ޕިކަޕް ފަދަ ތަކެތި ވެސް ތަކެތި ހޯދީ ކުއްޔަށް ނަގައިގެން ކަމަށް ވިދާޅުވި އެވެ.

އޭނާ ވިދާޅުވީ، އޭގެ ސަބަބުން ޕްރޮޖެކްޓްގެ ހަރަދުތައް އިތުރަށް ބޮޑުވި ކަމަށާއި އެ މަސައްކަތް ނުކުރެވި ހުއްޓިފައި އޮންނަ ދުވަސްތަކުގައި ވެސް ކުލި ދައްކަން ޖެހުމުން އިތުރަށް ހަރަދުތައް ބޮޑުވި ކަމަށެވެ.

"ޖުމްލަ 170 މިލިއަން ރުފިޔާގެ ގެއްލުން ވާނެ މި ޕްރޮޖެކްޓްތަކުން. ރަނގަޅަށް ރެކޯޑުތައް ބެލެހެއްޓިފައި ހުރި ނަމަ އެ އަށް ވުރެ ވެސް ގެއްލުން ބޮޑުވާނެ،" އޭނާ ވިދާޅުވި އެވެ.

ނަރުދަމާ ޕްރޮޖެކްޓް ހިންގަން ހަވާލުކުރި ރަށްތައް

- ބ. ދޮންފަނު

- ބ. ފެހެންދޫ.

- ބ. ފޮޅަދޫ.

- ބ. ކުޑަރިކިލު.

- ބ. ކިހާދޫ.

- ށ. ބިލެއްފަހި.

- ށ. ނޫމަރާ.

- ނ. ލަންދޫ.

- ނ. މިލަދޫ.

- ނ. މަގޫދޫ.

- ތ. މަޑިފުށި.

- ތ ދިޔަމިގިލި.

- މ. ރަތްމަންދޫ.

- މ. ނާލާފުށި.

- ލ. ކުނަހަންދޫ.

- އދ. ފެންފުށި.

ވާހިދު ވިދާޅުވީ، އެ ޕްރޮޖެކްޓުގެ ދަށުން ކޮންޓްރެކްޓަރުން މިހާތަނަށް ދޫކޮށްފައިވަނީ 55 މިލިއަން ރުފިޔާ ކަމަށެވެ. ނަމަވެސް، ކޮންޓްރެކްޓަރުންނަށް ދޭން 439 މިލިއަން ރުފިޔާ ކޮމިޓްމަންޓް ދީފައިވާ ކަމަށް ވިދާޅުވި އެވެ. އަދި މިވަގުތަށް މަސައްކަތް ނިންމައި، ފެނަކައިން ޒިންމާވާން ޖެހޭ 384 މިލިއަން ރުފިޔާ އެބައޮތް ކަމަށް ވެސް ވާހިދު ވިދާޅުވި އެވެ.

ޕްރޮޖެކްޓަށް ފޮނުވި މަސައްކަތުގެ މީހުންގެ މުސާރަ 45،000ރ. އަށް

ވާހިދު ވިދާޅުވީ، އެޕްރޮޖެކްޓްގެ ހުރިހާ މަސައްކަތެއް ވެސް ކޮށްފައި ހުރީ، ކުންފުންޏަށް އެންމެ ހަރަދު ކުޑަވާނެ ގޮތެއް ނުބަލައި، ބޮޑު ހަރަދެއް ދާ ގޮތަށެވެ. އެ ކުންފުނިން، ޕްރޮޖެކްޓްގެ ސައިޓުތަކަށް ފޮނުވި އެންމެ އާދައިގެ މަސައްކަތު މީހުންގެ މުސާރަ ވެސް 45،000ރ. އަށް އަރާކަން ފާހަގަކުރެވުނު ކަމަށް އޭނާ ވިދާޅުވި އެވެ

"މަސައްކަތުގެ މީހެއްގެ އެވްރެޖު މުސާރަ 45،000ރ. އަށް އެބަހުރި މި ކުންފުނިން ހަރަދު ކޮށްފައި، އާދައިގެ މަސައްކަތުގެ މީހެއް މުސާރަ އަށް މަހެއްގެ މައްޗަށް. އެހެންވެ އެއީ އެހާ ސަސްޓެއިނަބަލް މަސައްކަތެއް ކަމަށް އަޅުގަނޑުމެންނަށް ގަބޫލެއް ނުކުރެވޭ،" ވާހިދު ވިދާޅުވި އެވެ.

އޭނާ ވިދާޅުވިގޮތުގައި، މުވައްޒަފުންނަށް ކުރާ ހޭދަތައް ވެސް ރަނގަޅަށް ރެކޯޑު ކުރެވިފައި ނެތެވެ. އެންމެ މުވައްޒަފަކަށް 45،000ރ. ހަރަދު ކުރާ އިރު އެއީ ޕްރޮޖެކްޓުގެ ހަރަދެއްގެ ގޮތުގައި ބަލާފައި ނުވާ ކަމަށް ވިދާލުވި އެވެ.

"އަހަރުތަކެއް ވަންދެން ދިގު މުއްދަތަށް އެބަހުރި އެގޮތަށް ފައިސާ ހަރަދު ކުރެވިފައި. އެހެން މިދިވާ ސަބަބަކީ އެޗްއާރްގެ ޕޭރޯލްގައި ހުންނަ މުވައްޒަފެއް ލޭބަރުންގެ ގޮތުގައި ބޭނުން ކުރަނީ، ބޭނުން ކުރާ އިރު އޭނާ އަށް މަގާމުގެ ގޮތުން ލިބޭ މުސާރަ އާއި ރަށުން ބޭރަށް ދިޔައީމާ ލިބޭ އެލަވަންސްތަކާއި ހުރިހާ އެއްޗެއް އެއްކޮށްލީމާ އެބަ ލިބޭ 45،000ރ. މި ދާއިރާގެ ކޮންސަލްޓަންޓަކަށް ވެސް އެ ވަރުގެ މުސާރައެއް ނުލިބޭ،" އޭނާ ވިދާޅުވި އެވެ.

އޭނާ ވިދާޅުވީ، ކޮންސްޓްރަކްޝަން މިނިސްޓްރީން ފެނަކައާ ހަވާލުކުރި އަދަދަށް ވުރެ އިތުރަށް ސަބް ކޮންޓްރެކްޓަރުންނަށް ހޭދަކުރަން ޖެހޭ ގޮތަށް މަސައްކަތްތައް ހަވާލުކޮށްފައި ހުރި ކަމަށެވެ.

"މިސާލަކަށް އީއައިއޭ ހަދަން އަޅުގަނޑުމެން އެ ކޮމްޕޯނަންޓަށް ހަރަދު ކުރަން ނިންމާފައި އޮތީ ފަސް ލައްކަ ރުފިޔާ. އަަކަމަކު ސަބް ކޮންޓްރެކްޓް ކުރި އިރު އެވޯޑް ކޮށްފައި މި އޮންނަނީ އެ އަށް ވުރެ މާބޮޑު އަގެއްގައި. އެހެންވީމާ ފުރަތަމަ ފެށޭ ހިސާބުން ވެސް މީގައި މިވަނީ ގެއްލުން،" އޭނާ ވިދާޅުވި އެވެ.

ވާހިދު ވިދާޅުވީ، ޕަމްޕް ސްޓޭޝަންތައް ހެދުމަށާއި އާރްއޯ ޕްލާންޓު ހޯދުމަށް ވެސް ހަވާލު ކުރީ، ސަރުކާރުން އެ ޕްރޮޖެކްޓަށް ކަނޑައެޅި އަގުތަކަށް ވުރެ މާ ބޮޑު އަގެއްކައި ކަމަށެވެ. އާރްއޯ ޕްލާންޓަށް ސަރުކާރުން 7 މިލިއަން ރުފިޔާ އާއި 10 މިލިއަން ރުފިޔާއާ ދެމެދުގެ އަގުތަކެއްގައި ހުރި ނަމަވެސް ސަބް ކޮންޓްރެކްޓަރަށް ދީފައިވަނީ 10.5 މިލިއަން ރުފިޔާ އާއި 12 މިލިއަން ރުފިޔާއާ ދެމެދުގެ އަގެއްގަ އެވެ.

ފެނަކަ އިން އެ ޕްރޮޖެކްޓްތައް ފެށި އިރު ޕްރޮޖެކްޓުތައް އެންމެ ބޮޑަށް ހިންގި ރަށްރަށުގައި ވެސް މަސައްކަތް ނިންމާފައިވަނީ 15 ޕަސެންޓާ ހަމައަށެވެ. އެ ޕްރޮޖެކްޓްތައް ޓާމިނޭޓް ކުރި އިރު އެ ޕްރޮޖެކްޓަށް ފެނަކައިން ހޯދި 26 އާރް އޯ ޕްލާންޓްތަކާ މެދު ހަދާނެ ގޮތްތަކެއް ނިންމުމުގެ މަސައްކަތް ވެސް ކުރަމުން އަންނަ ކަމަށް ބުންޏެވެ.