އެއްބަސްވުން ބާތިލްކުރަން އޭސީސީން އެންގި އެންގުމަށް އެއްބާރުލުން ދޭނަން: ފެނަކަ

ސްރީލަންކާގެ ބަޔަކާ ހަވާލުކޮށްގެން 20 ރަށެއްގެ ނަރުދަމާ ނިޒާމް ގާއިމް ކުރުމަށް ފެނަކަ ކޯޕަރޭޝަނުން ވެފައިވާ އެއްބަސްވުން ބާތިލްކުރަން އެންޓި ކޮރަޕްޝަން ކޮމިޝަން (އޭސީސީ) އިން އެންގި އެންގުމަށް ތަބާވާނެ ކަމަށް ފެނަކަ އިން މިއަދު ބުނެފި އެވެ.

ކުރީގެ ސަރުކާރުގައި 20 ރަށެެއްގެ ނަރުދަމާ ގާއިމްކުރަން ލަންކާގެ ހޭކާބް ކުންފުންޏާ ފެނަކައިން ހަވާލުކުރީ މިދިޔަ ޖުލައި މަހު 866 މިލިއަން ރުފިޔާއަށެވެ. އެކަމަކު އޭސީސީން އިއްޔެ ވަނީ ލަންކާގެ ކުންފުންޏާ އެކު ހެދި އެއްބަސްވުން ބާތިލްކުރަން ފެނަކަ އާއި ފިނޭންސް މިނިސްޓްރީ އާއި ރައީސް އޮފީހަށް އަންގައިފަ އެވެ.

އެކަމާ ގުޅިގެން ފެނަކަ އިން ނެރުނު ބަޔާނެއްގައި ވަނީ އޭސީސީގެ އެ އެންގުމަށް އެ ކުންފުނިން ފުރިހަމައަށް އެއްބާރުލުން ދޭނެ ކަމަށާއި އެ ކުންފުނިން އަބަދުވެސް މަސައްކަތް ކުރާނީ ރައްޔިތުންނާއި އެ ކުންފުންޏަށް ވެސް އެންމެ ފައިދާ ހުރި ގޮތަށް ކަމަށެވެ.

އެ ބަޔާނުގައިވާ ގޮތުން އެ މަޝްރޫއު އެ ކުންފުނީގެ ދަށުން ކުރިއަށް ގެންދިއުމަކީ ރަނގަޅު ކަމެއް ނޫން ކަމަށް އޭރުގެ ސަރުކާރުގައި އެ ކުންފުނިން ވާނީ ބުނެފަ އެވެ. އަދި އެ މަޝްރޫއުގެ ސަބަބުން ފެނަކައަށް ދެމެހެއްޓެނިވި ފައިދާއެއް ނުކުރާނެ ކަމަށާއި އެ ކުންފުނީގެ މާލީ ހާލަތު ދަށްވެފައި އޮއްވާ އެ މަޝްރޫއު އަށް ބޮޑު ލޯނެއް ނަގަން ޖެހުމަކީ ވެސް ކުރިއަށް އޮތް ތަނުގައި އެހެން މަޝްރޫއުތައް ހިންގަން ފައިސާ ހޯދަން ދަތިވެދާނެ ސަބަބެއް ކަމަށް އޭރު އެ ކުންފުނިން ސަރުކާރުގައި ބުނެފައިވާނެ ކަމަށް އެ ބަޔާނުގައިވެ އެވެ.

"މިފަދަ ބޮޑު މަޝްރޫއުއެއް ހިންގާ ނަމަ މި ކުންފުނި ބަނގުރޫޓްވުމަކީ އެކަށީގެންވާ ކަމެއް ކަމަށް މި ކުންފުންޏަށް ގަބޫލު ކުރެވޭ ކަން ކަމާބެހޭ ފަރާތްތަކުގައި ދެންނެވިފައި ވާނެ އެވެ." އެ ބަޔާނުގައިވެ އެވެ.

އޭރު ފެނަކަ އިން ސޮއިކުރި އެއްބަސްވުމުގައިވާ ގޮތުން ދޮޅު އަހަރުގެ ތެރޭގައި 20 ރަށުގެ ނަރުދަމާގެ މަސައްކަތް ނިންމަން ޖެހެ އެވެ.