އައްޑޫގެ ގުޅިފައިވާ ރަށްތަކުން އަނެއްކާވެސް ކަރަންޓު ކެނޑެނީ، މި ފަހަރު ގަމުގެ ކޭބަލެއްގެ މައްސަލަ!

އައްޑޫގެ ގުޅިފައިވާ ރަށްތަކުން ކަރަންޓު ކެނޑޭ މައްސަލަ އަނެއްކާ ވެސް ބޮޑުވެއްޖެ އެވެ.

އައްޑޫގެ ގުޅިފައިވާ ރަށްތައް ކަމަށްވާ ހިތަދު އާއި މަރަދު އާއި މަރަދޫފޭދު އާއި ފޭދޫ އަދި ގަމުން މިދިޔަ ޖުލައި މަހު ވެސް ކަރަންޓު ކެނޑޭ މައްސަލަ ބޮޑުވެގެން އެތައް ބައެއްގެ ޝަކުވާ އިތުރުވި އެވެ.

އައްޑޫގެ ގުޅިފައިވާ ރަށްތަކުގައި އެންމެ މަތިން ކަރަންޓު ބޭނުންވާ ގަޑިތަކުގައި 12 މެގަވޮޓްގެ ކަރަންޓު ބޭނުންވެ އެވެ. ކަރަންޓު ފޯރުކޮށްދިނުމަށް ހިތަދޫގައި ބަހައްޓާފައި ވަނީ 20 ޖެނަރޭޓަރު ސެޓެވެ. އޭގެ ކެޕޭސިޓީއަކީ 26.8 މެގަވޮޓެވެ. އެކަމަކު އޭގެ ތެރެއިން ފަސް ޖެނަރޭޓަރު ހަލާކުވުމާ ގުޅިގެން އޭރު އުފެއްދުނީ 15 މެގަވޮޓެވެ.

އެހެންވެ ޕީކް ގަޑިތަކުގައި ކަރަންޓު ކެނޑޭ މައްސަލަ ބޮޑުވެ، އެންވަޔަރުމެންޓް މިނިސްޓަރު އިބްރާހިމް ތޯރިގު އޭރު ވިދާޅުވި ގޮތުގައި އެކަން ހައްލުކުރުމަށް 1.5 މެގަވޮޓުގެ އާ ޖެނަރޭޓަރެއް ގަނެފައިވެ އެވެ. އަދި މިދިޔަ މަހުގެ ތެރޭގައި އެ ޖެނަރޭޓަރު ބަހައްޓާނެކަމަށް ތޯރިގު ވިދާޅުވި އެވެ.

އައްޑޫ ސިޓީ ކައުންސިލުން އާންމުކުރި ވީޑިއޯ އިންޓަވިއުއެއްގައި މޭޔަރު އަލީ ނިޒާރު ވިދާޅުވީ، މި ފަހަރު ދިމާވީ ގަމަށް ކަރަންޓު ދީފައިވާ ހައި ވޯލްޓޭޖް ކޭބަލްގެ މައްސަލައެއް ކަމަށެވެ.

އެ މައްސަލަ ހައްލުކުރުމަށް ފެނަކައިގެ އިންޖިނިއަރުންގެ ޓީމަކުން މަސައްކަތް ކުރަމުން އަންނަ ކަމަށާއި އެކަމަކު އަދިވެސް މައްސަލަ ދިމާވެފައިވާ ކޭބަލް އޮތް ސަރަހައްދު ސާފު ނުވާ ކަމަށް ނިޒާރު ވިދާޅުވި އެވެ.

އޭގެ ސަބަބުން އައްޑޫގެ އެކި ސަރަހައްދުތަކުން ކަރަންޓު ކެނޑުމުގެ މައްސަލަ ދިމާވާ ކަމަށް އޭނާ ވިދާޅުވި އެވެ.

"ކޮންމެވެސް ގޮތަކުން މަސައްކަތް ކުރުމުގެ ތެރެއިން ލިބިފައިވާ ގެއްލުމާ އެކު، އެކަން ރަނގަޅު ނުކުރެވި އޮތީ. ގަމަށް ކަރަންޓު ދޭ ކޮންމެ ފަހަރަކު ޕަވާ ސްޓޭޝަނުން ކަރަންޓު ފެއިލް ކޮށްލަނީ. އެހެންވެ، އައްޑޫގެ އެކި ތަންތަނުން ކަރަންޓު ކެނޑެނީ،" ނިޒާރު ވިދާޅުވި އެވެ.

"ފެނަކައިގެ އިންޖީނިއަރުން އަދިވެސް މަސައްކަތް ކުރަމުންދަނީ. އަދިވެސް މުޅިން ހެން މައްސަލަ ދިމާވެފައިވާ ކޭބަލްގެ ސަރަހައްދު ވަކި ނުވޭ."

ނިޒާރު ވިދާޅުވީ ހިތަދޫގެ ކަރަންޓު ކޭބަލަކަށް ވެސް މައްސަލަ ދިމާވެފައިވާކަން ފާހަގަކޮށް، އެކަން ވެސް ހައްލުކުރުމަށް މަސައްކަތް ކުރަމުން އަންނަ ކަމަށެވެ.

ނިޒާރު ވިދާޅުވި ގޮތުގައި އައްޑޫގެ މަގުތައް ހެދުމުގެ ބޮޑު މަޝްރޫއުއެއް ކުރިއަށް ގެންދާއިރު މަގުތަކުގެ އަޑީގައި ވަޅުލާފައިވާ ބައެއް ކޭބަލްތަކަށް ވެސް ގެއްލުން ދަނީ ލިބެމުންނެވެ. އެކަމަކު އެ ލިބޭ ގެއްލުން ވަގުތުން ފާހަގަނުކުރެވޭ ކަމަށް އޭނާ ވިދާޅުވި އެވެ.

އެހެންވެ، މިހާރު ދިމާވެފައިވާ މައްސަލަ ހައްލުކުރަމުން އަންނަ ކަން ފާހަގަކުރައްވައި، ރައްޔިތުން ކެތްތެރިކަމާ އެކު ފެނަކައިގެ މަސައްކަތަށް އެއްބާރުލުން ދިނުމަށް ނިޒާރު އެދިވަޑައިގަތެވެ. އަދި އައްޑޫގެ ކަރަންޓުގެ މައްސަލައަށް ދާއިމީ ހައްލެއް ބޭނުންވާ ކަމަށާއި އެކަން ހައްލުކުރުމަށް އެކި މަސައްކަތްތައް މިހާތަނަށް ވެސް ކުރެވިފައިވާ ކަމަށް ނިޒާރު ވިދާޅުވި އެވެ.

އޭނާ ވިދާޅުވީ އައްޑޫގެ އިގްތިސާދާއި ރައްޔިތުން ތަހައްމަލުކުރަމުންދާ އުނދަގޫތަކަށް ހިތާމަކުރައްވާ ކަމަށެވެ.

މިކަމަށް [ކަރަންޓުގެ މައްސަލަ] އަށް ބޭނުމީ ދާއިމީ ހައްލެއް. އައްޑޫގެ އިގްތިސާދާއި ރައްޔިތުން ތަހައްމަލުކުރަމުން މިދާ އުނދަގޫތަކަކީ އަޅުގަނޑުމެން ހިތާމަކުރާ އަދި މިކަން ހައްލުކުރުމަށް އެތަކެއް މަސައްކަތްތަކެއް ކުރެވެމުންދާ ކަމެއް. އެކަމަށް ދާއިމީ ހައްލެއް އަދިވެސް ނުލިބޭ،" ނިޒާރު ވިދާޅުވި އެވެ.

އައްޑޫގެ ކަރަންޓަށް ދިމާވެފައިވާ މައްސަލަ ހައްލުކުރުމަށް މިދިޔަ އޭޕްރީލް މަހުގެ ތެރޭގައި ފެނަކައިން ވަނީ ޗައިނާގެ ޑޮންފެން އިލެކްޓްރިކް (ޑީއީސީ) އާ ހަވާލުކޮށްފަ އެވެ.

އައްޑު އަށް ދިމާވެފައިވާ ކަރަންޓު މައްސަލަ ރަނގަޅު ކުރުމަށްޓަކައި ވި އެއްބަސްވުމުގެ ދަށުން 30 މެގަވޮޓްގެ ކަރަންޓު ބޭނުންކުރެވޭ ގޮތަށް އެންމެ ޒަމާނީ ވަސީލަތްތަކާ އެކު، ޕަވާޕްލާންޓެއް ބަހައްޓާނެ ކަމަށް ފެނަކައިން ބުނެ އެވެ.