ދިރާގުން ދޭ ލޯންޗް ލިބުމުގެ ފުރުސަތު ދެ ގުނަކޮށް، އިތުރު އޮފާތަކެއް

ދިރާގަށް 36 އަހަރު ފުރުމާ ގުޅިގެން، އެ ކުންފުނިން ދޭން ނިންމާފައިވާ ލޯންޗް ލިބުމުގެ ފުރުސަތު ދެ ގުނަކޮށް، ކަސްޓަމަރުންނަށް އިތުރު އޮފާތަކެއް ތައާރަފްކޮށްފި އެވެ.

ދިރާގު ހެޑް އޮފީހުގައި މިއަދު އޮތް ނޫސްވެރިންގެ ބައްދަލުވުމުގައި ދިރާގުގެ މާކެޓިން އެންޑް ކޮމިއުނިކޭޝަންސް މެނޭޖަރު ހަސަން ޝާރިހު އާދަމް ވިދާޅުވީ ދިރާގުން ފަށާފައިވާ "ވިން އަ ސްޕީޑް ބޯޓު" ޕްރޮމޯޝަން އިތުރަށް ފުރިހަމަ ކުރުމުގެ ގޮތުން، މި މަހުގެ ނިޔަލަށް މި ޕްރޮމޯޝަނަށް އެންރޯލްވާ ހުރިހާ ކަސްޓަމަރުންނަށް ލޯންޗް ލިބުމުގެ ފުރުސަތު ދެ ގުނަ ވާނެ ކަމަށެވެ. އަދި މިއަދުގެ ނިޔަލަށް އެންރޯލްކުރާ ހުރިހާ ކަސްޓަމަރުންނަށް ވެސް މި ފުރުސަތު ދެ ގުނަ ވާނެ ކަމަށް ބުންޏެވެ.

"ވިން އަ ސްޕީޑް ބޯޓު" ޕްރޮމޯޝަނުގައި މި މަހުގެ ފުރަތަމަ ދެ ހަފްތާގައި ބައިވެރިވާ ކަސްޓަމަރުންގެ މެދުގައި ކޮންމެ ދުވަހަކު ލަކީޑްރޯއެއް ކުރިއަށް ދާނެ އެވެ. މި ލަކީޑްރޯއިން ކޮންމެ ދުވަހަކު ގުރުއަތުން ހޮވޭ ކަސްޓަމަރަކަށް އައިފޯން 16 އެއް ލިބޭނެ އެވެ.

ދިރާގުން ދޭން ނިންމާފައިވާ ލޯންޗް ތަޖުރިބާ ކުރުމުގެ ގޮތުން، އެ މަރުކާގެ އެހެން ލޯންޗެއްގައި ރައްޓެހިންނާ އެކު ދަތުރެއް ހޯދުމުގެ ފުރުސަތު ސޯޝަލް މީޑިއާ ކޮންޓެސްޓެއްގެ ގޮތުގައި ދިރާގު ވަނީ ހުޅުވާލާފަ އެވެ. މިއީ 7 ރައްޓެހިންނާ އެކު ލޯންޗްގައި މަސް ދަތުރެއް ގޮސް، ފިނޮޅެއްގައި ބާބަކިއު ހެދުމަށް ދޭ ފުރުސަތެކެވެ.

މީގެ އިތުރުން ދިރާގުން ވަނީ ގޭމަރުންނަށް ހާއްސަ ލަކީޑްރޯއެއް ވެސް ވަނީ ތައާރަފްކޮށްފަ އެވެ. މި ލަކީޑްރޯގައި ދިރާގު ގޭމާސް ގިލްޑް ޕްލެޓްފޯމަށް މިމަހު ރަޖިސްޓްރީ ކުރާ ގޭމަރުންގެ ތެރެއިން ގުރުއަތުން ހޮވޭ އެއް ގޭމަރަކަށް ގޭމިންއަށް ހާއްސަ ހައި އެންޑް ޕީސީ ސިސްޓަމެެއް ލިބޭނެ އެވެ.

ދިރާގުން އަހަރީ ދުވަހަށް ތައާރަފް ކޮށްފައިވާ އިތުރު އޮފާތަކުގެ ތެރޭގައި އެޑްއޮން ގަންނަ ޕްރިޕެއިޑް ކަސްޓަމަރުންނަށާއި އެޑްއޮން އާއި ބޫސްޓާސް ގަންނަ ޕޯސްޓްޕެއިޑް ކަސްޓަމަރުންނަށް 10 ޖީބީއާ ހަމައަށް ހިލޭ ޑޭޓާ ލިބޭނެ އެވެ. އަދި ދިރާގުގެ ޕޯސްޓްޕެއިޑް 750ރ. އިން މަތީގެ ޕެކޭޖުތަކާއި ބްރޯޑްބޭންޑުގެ 350ރ. އިން ފެށިގެން މަތީގެ ޕެކޭޖުތަކުގެ ކަސްޓަމަރުންނަށް ސޮނީ ލިވްގެ 1 މަހުގެ ސަބްސްކްރިޕްޝަން ހިލޭ ލިބޭނެ އެވެ.

ދިރާގުގެ ބްރޭންޑް އެންޑް މާކެޓިން އެންޑް ކޮމިއުނިކޭޝަންސް ޑިރެކްޓަރު މުހައްމަދު މިރުޝާން ހަސަން ވިދާޅުވީ އެ ކުންފުނީގެ ކާމިޔާބީގެ ސިއްރަކީ ކަސްޓަމަރުން ކުރާ އިތުބާރު ކަމަށެވެ. އަދި އަހަރީ ދުވަހު ގިނަ ހަދިޔާތަކެއް ކަސްޓަމަރުންނަށް ދެނީ ކަސްޓަމަރުންގެ އަގުވަޒަން ކުރުމުގެ ގޮތުން ކަމަށް ވިދާޅުވި އެވެ.

ދިރާގުން މިއަދު ފާހަގަ ކުރަމުން ދަނީ އެ ކުންފުނީގެ 36 ވަނަ އަހަރީ ދުވަހެވެ.