ރާއްޖޭގެ އުމުރުން ދުވަސްވީ މީހުންގެ އާބާދީ 20،500 ގައި

ރާއްޖޭގައި މިހާރު ތިބީ 20،500 އުމުރުން ދުވަސްވީ މީހުން ކަމަށް ތަފާސްހިސާބުތަކުން ދައްކައިފި އެވެ.

ކޮންމެ އަހަރެއްގެ އޮކްޓޫބަރު 1 ގައި ފާހަގަކުރާ އުމުރުން ދުވަސްވީ މީހުންގެ ދުވަހާ ގުޅުވައިގެން، ސްޓެޓިސްޓިކްސް ބިއުރޯއާ ހަވާލާދީ ހައުސިން މިނިސްޓްރީން މިއަދު ވަނީ އުމުރުން ދުވަސްވީ މީހުންގެ ތަފާސްހިސާބުތަކުގެ ރިޕޯޓެއް ނެރެފަ އެވެ.

އެ ރިޕޯޓުގައިވާ ގޮތުން ރާއްޖޭގައި މިވަގުތު ތިބީ އުމުރުން ދުވަސްވީ 10،530 ފިރިހެނުންނާއި 10،023 އަންހެނުންނެވެ. އެއީ ރާއްޖޭގެ އާބާދީގެ ފަސް ޕަސެންޓެވެ.

އެ މީހުންގެ ތެރެއިން 63 ޕަސެންޓު މީހުން ހިމެނެނީ އުމުރުން 65 އަހާރާއި 74 އަހަރާ ދެމެދުގަ އެވެ. އަދި އުމުރުން 85 އަހަރުން މަތީގެ އާބާދީއަކީ ނުވަ ޕަސެންޓެވެ.

އުމުރުން 65 އަހަރާއި 74 އަހަރު:

އަންހެން: 6،335

ފިރިހެން: 6،668

އުމުރުން 75 އަހަރާއި 84 އަހަރު:

އަންހެން: 2،935

ފިރިހެން: 2،839

އުމުރުން 85 އަހަރުން މަތި:

އަންހެން: 753

ފިރިހެން: 1،023

އުމުރުން ދުވަސްވީ މީހުން އެންމެ ގިނައިން ދިރިއުޅެނީ މާލޭގަ އެވެ. އެއީ 6،669 މީހުންނެވެ. ދެވަނަ އަށް އެންމެ ގިނަ އައްޑޫގައި 1،802 މީހުން ތިބިއިރު، ހދ އަތޮޅުގައި އުމުރުން ދުވަސްވީ 1،303 މީހުން ތިބި ކަމަށް މިނިސްޓްރީގެ ތަފާސްހިސާބުން ދައްކަ އެވެ.

ރާއްޖޭގެ އުމުރުން ދުވަސްވީ މީހުންތެރެއިން 60 ޕަސެންޓު މީހުން އުޅެނީ މީހަކާ އިނދެގެންނެވެ. ވަރިވެފައި ތިބި މީހުންގެ ނިސްބަތް އުޅެނީ 11 ޕަސެންޓުގަ އެވެ. ހުވަފަތްވެފައި ތިބި މީހުން 20 ޕަސެންޓުގައި އުޅޭއިރު، ދުވަހަކު ވެސް މީހަކާ ނުއިނދެ ތިބި މީހުންގެ ނިސްބަތް އުޅެނީ އެއް ޕަސެންޓުގަ އެވެ.

ރާއްޖޭގެ ގައުމީ ޔުނިވާސިޓީ (އެމްއެންޔޫ) އިން 2020 ވަނަ އަހަރު އާންމުކުރި ދިރާސާއިން ދެއްކީ ރާއްޖޭގައި ދިރިއުޅޭ އުމުރުން ދުވަސްވީ މީހުންގެ ތެރެއިން 50 ޕަސެންޓަށް ވުރެ ގިނަ މީހުންނަކީ އެކަނިވެރިވެ، ޑިޕްރެޝަން ތަހައްމަލް ކުރާ މީހުން ކަމަށެވެ.

އުމުރުން ދުވަސްވީ ގިނަ މީހުން މިފަދަ ނަފްސާނީ ކަންކަން ތަހައްމަލުކުރާތީ، އެ މީހުންނަށް ފަރުވާ ދޭން ސަޕޯޓް ސިސްޓަމްތަކާއި ޕްރޮގްރާމްތައް ތައްޔާރުކުރަން ޖެހޭ ކަމަށް އެ ދިރާސާގައި ވެ އެވެ.

އޭގެ ތެރޭގައި އުމުރުން ދުވަސްވީ މީހުން ދިރިއުޅޭ ތަންތަނަށް ޒިޔާރަތްކޮށް އެ މީހުންނަށް ފަރުވާ ދެވޭނެ ފަދަ ސިއްހީ މަސައްކަތްތެރިން ތަމްރީންކުރުން ހިމެނެ އެވެ. އެ ޒިންމާ ސިއްހީ މަސައްކަތްތެރިންނާއި އެހެނިހެން އިދާރާތައް ގުޅިގެން ނަގަން ޖެހޭނެ ކަމަށް ވެސް ބުނެފައިވެ އެވެ.